दुबई । ‘ङाला रिमठिम, ङाला गौरव’ बिबा उद्घोष लासि सामाजिक गे लाजिबा तामाङ समाज युएई अबुधाबी क्षेत्रीय समितिसे २०२५ अप्रिल १९ गते कामरेकुनु MARINA WALK CARNIVAL FESTIVAL -2025 सांस्कृतिक गेताङ ङ्योइसाङ लाबा मुला ।

नेपालला छार दिङ २०८२ ला दुइसाङरि चु गेताङ स्होबा हिन्ना । गेताङ ङ्यासेला ८ ङ्ह्यामाहेन्से मरिना मल ङ्हाच्छा तासेला मुला ।

तामाङ समाज युएई अबुधाबी क्षेत्रीय समितिला मुख्यगाउराइ जयराम वाईबा तामाङला आन्सार गेताङ समाजला अबुधाबी क्षेत्रीय समितिला चोहो लवाङ दोर्जे लामाला चोहोदानरि, छ्या–न्होरचोहो ओसेम गेताङ संयोजक दया स्याङतान तामाङला संयोजकरि तासेला मुला ।

मुख्यगाउराइ जयराम वाईबा तामाङला आन्सार युएईरि गेलाचिबा ज्योज्योआले, नानाआङाला ग्युइल (कला) उन्बाला लागि गिक्छा रेम खुल्ला ग्लारि सांस्कृतिक गेताङला ङ्योइसाङ लाबा हिन्ना ।

युएईरि मुबा मोक्कोन नेपाली ज्योज्योआले, नानाआङादा गेताङरि बोकिन्बारि समाजे म्होइजेन लाबा मुला । गेताङरि दोगाबाजुगुदा फ्रि इन्ट्री मुला ।