याम्बु २८ ड्वाफ्रे । यान्पाङ थेन ग्रा प्रविधिलोन्पो पृथ्वीसुब्बा गुरुङसे राष्ट्रिय तामसोर समिति (रासस)रि तामाङ ग्योइला तामसोर सेवा तिबारि ग्रान पिन्बा मुला ।

तामाङ स्योमि गेन्दुनसे राससरि तामाङ ग्योइला तामसोर सेवा तिबारि ह्रिसि पिन्बा ज्ञापनस्योला ताङरि लोन्पो गुरुङसे चु ग्रान पिन्बा हिन्ना । थेसे पाङ्जि, ‘योनान तामाङ ग्योइला तामसोर सेवा राससरि तिसेला मुला ।’

दाते रासससे नेपाली, अंग्रेजी, बाइ थेन मैथिली ग्योइरि तामसोर सेवा पिन्सिकेन खाबा मुला । बागमती प्रदेश सरकारसे नोन तामाङ ग्योइदा गेदोइला ग्योइ घोषणा लाबा दिङ गि छ्योजिन्बा मुला । सन् २०२१ ला ह्युल्बा ज्याबा आन्सार नेपालरि १४ बुम २३ तोङ्जा बिमा ल्हाना तामाङ ग्योइ पाङ्बाकादे मुला ।

ज्ञापनस्यो पिन्बारि सांसद तारा लामा, तामाङ स्यो गेन्दुनला चोहो नेत्र तामाङ, ह्रोम्हि सहिला लामा थेन डोल्मा मनाङ्थेन, गाउराइजुगु जिबी लामा थेन मिक्साङ वाईबा, नेपाल तामाङ घेदुङला केन्द्रीय ह्रोम्हि बिलाम मुक्तान, तामाङ डाजाङला तेबा ओसेम फोनिजला न्होरचोहो अर्जुनबहादुर तामाङ थेन फोनिजला ह्रोम्हि अमिर लामातेन स्यान्दो स्योमिकादे दोबा मुबा ।

दाते तामाङ ग्योइरि तामाङ डाजाङ लालातिरेम स्योस्यो थेन तामाङ डाजाङ अनलाईन नियमित तेसिकेन खाबा मुला । नेपाल टेलिभिजन, रेडियो नेपाल थेन गोरखापत्ररि तामाङ ग्योइला तासमोर छिपा थेन प्रसारण तासिकेन खाबा मुला ।

(छिगला अर्थः स्योमि– पत्रकार, गेन्दुन– संघ, यान्पाङ– संचार, ग्रा– सूचना, लोन्पो– मन्त्री, ग्रान– प्रतिबद्धता, ड्वाफ्रे– जेठ, स्यो– पत्र, गेदोइ– कामकाजी, बुम– लाख)

भिडियो किन्बाः हर समय अनलाईन ग्याम