याम्बु । चर्चित व्हाइब्रिखेन टेक तामाङला गिक्छा एकल ङ्यासे २०८२ बेने १४ गते कामरेकुनु ताबाकेन मुला । कमलादीला प्रज्ञा प्रतिष्ठानरि तामाङला एकल ङ्यासे व्हाइब्रिखेन गेदुङ नेपालसे स्हेङ्बा हिन्ना ।

गेताङ कामरेकुनु रेला ४ ङ्ह्यामाहेन्से तिसेला मुला । चु गेताङ ‘व्हाइब्रिखेन टेक तामाङ सांगीतिक ङ्यासे २०८२’ मिनरि तासेला मुला ।

व्हाइब्रिखेन तामाङला दातेदोनारि ग्यार्जाछा व्हाइकादे रेकर्ड ताजिन्मुला । एकल ङ्यासेरि व्हाइब्रिखेन तामाङसे ब्रिबा छार थेन खेबाः लासि १७ वटा लोकप्रिय व्हाइकादे प्रस्तुत लासेला मुला । गेताङला लागि दाम्बा व्हाइकादे ‘नेपाल मेरो घर, आमा, स्वर्ग सुख, मिठा मिठा बोली, जित्नेहरुको पनि, आफ्नै धड्कन, मन पर्छ, अल्झिरह्यो याद, नजिक यति भएर पनि, तिमी सागर, तिमीलाई पराईको, अँगालोमा बेरिरहुँ, जन्मिखेली, मै खुकुरी, माथि माथि लेकमा, जोर मादलको तालैमा, स्वर्ग झैं सैलुङ्गला छ्याम ल्होलो काइपा काइमोकादेसे कोसेला मुला ।

ङोन्छाङ ह्रोल्ज्याङ्ला छ्याम अग्रज काइपा काइमोहेन्से दातेला लोकप्रिय काइपा काइमोदोनासे व्हाइ कोसि म्हिदा ताङ्ना लासेला मुला ।

गेताङरि दिप श्रेष्ठ, किरण प्रधान, शिव परियार, राजेशपायल राई, अन्जु पन्त, सत्यराज आचार्य, संगीता राना प्रधान डेबिड शंकर, रुपक चौधरी, प्रदिपराज पाण्डे, कन्काइष्ट राई, सन्जय तुम्ब्रोक, सुमिना लो, रेश्मा बमजन, अस्मिता अधिकारी, प्रल्हाद तिमिल्सिनातेन थेला चर्चित व्हाइकादे होङ्सेला मुला ।

गेताङदा सभ्य, भव्य थेन सुसंस्कृत स्होबारि गेताङ डिछ्याबा थेन समन्वय समिति नोन स्होबा मुला । व्हाइब्रिखेन गेदुङला चोहो व्हाइब्रिखेन बसन्त बित्यासी थापाला संयोजकत्वरि स्हेङ्बा समितिला ह्रोम्हिकादेरि अशोककुमार राई, सुमन पण्डित ‘बैरागी’ टिका राई (शिव), कन्काइष्ट राई, शशी लुमम्बु, सुशील केसी, अर्जुनबहादुर घलान थेन गोपालचन्द्र राई मुला ।

‘टेक तामाङ सांगीतिक ङ्यासे २०८२’से सामाजिक सशक्तीकरण थेन सांस्कृतिक ल्हेछ्यारि सुताइ प्रेरणा पिन्बारि ह्रो तासेला ङ्योइसाङकादेला अपेक्षा मुला । ङ्योइसाङ गेन्दुनला चोहो ओसेम गेताङ डिछ्याबा समितिला संयोजक थापासे एकल ङ्यासेदा भव्य स्होबारि खाजिबाइ गे लेङ्ना आथान्बा ग्रा पिन्जि ।

थापासे पाङ्जि, ‘नेपाल प्रज्ञा प्रतिष्ठानला ङ्हाच्छाला कुलपति ओसेम विशिष्ट ग्योइकाइब्रिखेन बैरागी काइँलाला ग्रेनडोन्बोरि तासेला गेताङरि सांगीतिक थुमला लोकप्रिय ओसेम विशिष्ट म्हिकादेसे रुङ्बा बोकिन्सेला मुला । नेपाली ह्रोल्ज्याङ ल्हेछ्याला लागि नोन चु गेताङला ङ्योइसाङ लाबासे नोन व्हाइ ह्रोल्ज्याङ सम्बन्धित गेन्दुन, छोङनाम, समाजसेवी, स्योमि थेन ह्रोल्ज्याङचेमो मुतेबा ङोन्छाङ ह्रोलाबारि अपेक्षा थेन म्होइजेन लाला ।’

थापाल आन्सार गेताङरि व्हाइह्रोल्ज्याङदा चेगाइ लाबा च्याखेन थेन ङ्यान्खेनदा निशुल्क लिरि टिकटला डिछ्या लाबा मुला । वि.सं. २०५० दिङरि ‘छाल आउँदा सम्झनाको’ गिक्छा व्हाइ बाबा तामाङ नेपाली ह्रोल्ज्याङ थेन ग्योइकाइरि थेनआताना क्रियाशील मुला ।

थेला ह्युल भावधाराला व्हाइ थेन व्हाइखा पोपा– ‘माटोको आवाज’, ह्युल भावधाराला व्हाइ पोप ‘स्वदेश’, आधुनिक व्हाइपोपा ‘जीवनसाथी’, आधुनिक व्हाइपोपा ‘आमा’, आधुनिक व्हाइपोप ‘नाता’, भजन पोप ‘भक्तिसागर’, ह्युल भावधाराला व्हाइ थेन व्हाइखापोप ‘नेपाल आमा’ ह्राङ्बा कृति सार्वजनिक ताबा मुला बिसाम ल्हानान पाण्डुलिपी खाबा तयारीरि मुला ।

नेपाली ह्रोल्ज्याङ थुमरि योगदान पिन्सिकेन खाबा तामाङ प्रहरी अतिरिक्त महानिरीक्षक (एआइजी) सुताइ हिन्ना । दाते थे याम्बु उपत्यका प्रहरी गेदिमला गेदिम प्रमुख तासि ह्युल सेवारि समर्पित मुला ।

(छिगला अर्थः बेने– असार, व्हाइब्रिखेन– गीतकार, गेदुङ– संघ, बेने– असार, कामरे– शनिबार, ग्यार्जाछा– सयौं, खेबाः– पुरानो, प्रत्यक्ष, ह्रोल्ज्याङ– वाद्यवादन/संगीत/बाजागाजा, होङ्बा– गुन्जनु, डिछ्याबा– व्यवस्थापन, ह्रोम्हि– सदस्य, ल्हेछ्या– प्रबर्धन, गेन्दुन– संस्था, ग्योइकाइब्रिखेन– साहित्यकार, थुम– क्षेत्र, रुङ्बा– बाक्लो, छोङनाम– व्यवसायी, स्योमि– पत्रकार, चेमो– प्रेमी, म्होइजेन– अनुरोध/आग्रह, चेगाइ– माया, च्याखेन– दर्शक, ङ्यान्खेन– स्रोता, डिछ्या– व्यवस्था)