तामाङ सोसाइटी अफ सिड्नि (न्यु साउथ वेल्स) ला ब्रेच्छा जोम्ना थुम्बा मुला । २२ जुनरि अस्ट्रेलियाला साउथ वेल्सरि ताबा जोम्नाग्यम राज पाख्रीन तामाङला चोहोदानरि छार कार्यसमिति स्होबा मुला ।

जोम्नासे ह्रोचोहोकादेरि ग्यानक वाइबा, सृजना लामा थेन मोहन तामाङदा दाम्बा मुला । ओराङनोन लासि ग्रेन गाउराइरि योगेश सांगे योन्जन, गाउराइरि डोमा तामाङ, न्होरचोहोरि सुर्य तामाङ, न्होर ह्रोचोहोरि नरेस लामा तामाङदा दाम्बा मुला । सांस्कृतिक गाउराइरि सनिता लामा, ह्रोसांस्कृतिक गाउराइरि लोब्साङ लामा, युवा संयोजकरि उमेश तामाङ मुला ।

छार कार्यसमितिला ह्रोम्हिकादेरि सुजन तामाङ, कपिल तामाङ, छेडुप पाख्रिन, फ्युबा तामाङ थेन अनिता पाख्रिन तामाङ दाम्बा मुला । निर्वाचन समितिला ह्रोम्हिकादेरि अरुण तामाङ, टिकाराम तामाङ थेन किशोर लामा मुबा ।

प्रवासरि चिसि तामाङ ह्युल्बाला ग्योइ, रिमठिम थेन प्रिबादा सोना थेन छार्नाल्हेना लाबा उद्देश्य किन्सि ठोङ्बा गेन्दुनला जोम्नारि तामाङ ह्युल्बाकादेसे उत्साहपुर्ण बोकिन्बा ह्रोचोहो सिर्जना लामा गोलेसे ग्रा पिन्जि ।  

गेताङरि सिड्निरि मुबा तामाङ अगुवाकादे, आदिवासि जनजातिला ल्होलो गेन्दुनला प्रतिनिधिकादेसे बोकिन्बा मुबा । विशेष डोन्बोकादेरि हेम बहादुर तामाङ (नेपाल तामाङ घेदुङला स्हेङ्खेन ह्रोम्हि) मुबा बिसाम जोम्नाला ठोङ्सेङ गेताङरि आदिवासि जनजाति फोरम अस्ट्रेलियाला चोहो लक्ष्मन गुरुङ, तमु समाज सिड्निला चोहो हिपति गुरुङ, याक्थुम चुम्लुङ अस्ट्रेलियाला चोहो शसि सुब्बा, छिरिङ तेन्जिङ लामा (चोहो नेपाल लोकतान्त्रिक फोरम ) छ्यामला डोन्बोकादेसे ज्याबाम्हान्बा ल्हेङ्बो थान्बा मुबा ।