दशक दशक केवानाङ 
आफेबा ग्रान फाबा म्हिसे 
फेसि थारेङ निमाहेन्से
खाला बिबाम डान्बा जेक्खे चिम । 
ख्लासि निबासे दोसि खाला बिबा
ग्युरु ब्योङ्बा स्योङ
खान्डो दोसि खाबाह्राङ ताबा चिम । 
बाफ, खासु ओम वर्षा
विज्ञानरि जेक्खे सोबा चिम । 
म्लेगे लाबा बुल्खु डान्बा
खाटा चिइ लाबा चेगाइ पोर
फुङ्ग छोन फेल्बा श्याम श्वेत तस्वीर
म्हाङनाङ तिगा तिगा पाङ्सि
ओस्सोन ओस्सोन आङ्चिला । 
थे डान्बाला डिहिनाङ
म्हेन्दो दोसि सार्ला
ङा मदहोस भँमरा । 
थेलान ख्यारख्युर खुइखुइ फ्याङ्चिबा ताला । 
म्हाङजुगु म्राङ्बाकेन लाबा
ङाला फगत कोरा डान्बारि
थे निमाहेन्से ङाला ङोन्छुपजुगु
डान्बाजुगुला ल्हिबा दोइ पुइसि
याकार ब्राबाकेन मुला
छ्यामनोन ल्हाम लाला बिबा
एसे दाम्बा ग्यालामरि
दुःखद वियोगान्त रापला पात्र दोबा ङा
च्यार्बा चेगाइला अल्पछेरिन ताबा डोङ्बा
पालेकि ए हिन्ना कि ङा ? 
चेतना म्हाबाकेन लामा
थुमथुम ताइला ङाफिरि 
बिलौना लाबान लाबा हुल गि सार
ङा ह्राङ्से ह्राङ्दान म्लेसि
आवेशरि आक्रोशित ताबान
डोङ्बा स्योरि हस्ताक्षर लाबारि राजी ताला । 
साझा दोइ पुइबा ग्रान बोसि
कोशेली लिस्ह्रुग पिन्बा ज्याबा थेला उपहार
म्लेनोन आखाम्बा स्हेर थेन क्राबा
पश्चाताप थेन निराशा ङाला दुर्दशा
प्रयास लाबा, क्राबा थेन गुर्बा । 
याखारगि दुइ, याखारगि जेबा ङ्हाउ
ङाइ लाबा चेगाइला जेसुम
डान्सि महसुस लाजि । 
ङा थेला
जेसेमला ग्योइरि स्याचिबा
फगत कोरा कल्पनारि
फगत आनुप्बा ग्यामरि
फगत मिछाम बाम्बा मिला ङोन्छाङरि
दिङ्छाहेन्से म्लेबा बाङ लाबा कोसिसरि
तासाइ, दुइतेन खाजिबा डान्बा
सन्दर्भतेन खाचिबा डान्बा
छ्यातेन खाचिबा डान्बा
ङातेन नोन सिला ताला
सातान खाचिबा अदृष्य डान्बा । 
अदृष्य डान्बा । 

पाँचखाल, काभ्रेपलान्चोक, दातेः लिमासोल, साईप्रस ।

दोःबा : यकिना अगाध