याम्बु २३ म्हेनिङ, नारे । नेपाल ग्युइसेरकि अक्षयकोष, नेपालसे छात्रवृत्ति ओसेम ह्रापह्रुप गेताङ स्हेङ्बा मुला । गेताङ नेपाल तामाङ घेदुङला संघीय गेदिम, चुच्चेपाटी याम्बुरि म्हेनिङ २५ गते नारेकुनु स्ह्योला १०ः३० ङ्ह्यामा तासेला मुला ।

चु गेन्दुनसे न्होरकि स्ह्रुगरि कमजोर थेन जेहेन्दार बिजाबुमोदा गुणस्तरीय ग्युइसेर डुप्बा लाबाला लागि ह्रो ताना लाबा दोन्तासे छात्रवृत्ति बोठाबा गेताङ स्हेङ्बा हिन्ना । नेपाल सरकारला कानुन आन्सार स्वीकृत याङ्माहेन्से चु गिक्छा ङोन्छाङ गेताङ लाइ लाबा हिन्ना । चुबिमा ङ्हाच्छा गेन्दुनसे न्हाङस्ह्रुगरि ह्रो लासिकेन खाबा मुबा ।

खाबा रेरि गेन्दुनदा झान कोङ्ना लासिकेन चुला थुमदा ल्हेना लासिकेन दुर्गम, विकट नाम्साला जेहेन्दार, असहाय बिजाबुमोदा प्रोत्साहन लिस्ह्रुग ह्रो लाबाला छ्याम बिजाबुमोदा ग्युइसेरग्याम बन्चित ताबारि आपिन्बारि खाम्दे कोशिस लासेला विश्वास थान्बा मुला ।

२५ गते तासेला गेताङरि मोक्कोन बुद्धिजीवि ओसेम तामाङ ज्योज्योआले, नानाआङा, स्योमिजुगुसे बोकिन्सि ह्रो लापिन्बारि कोषसे म्होइजेन लाबा मुला ।

(छिग दोनः ग्युइसेरकि– शैक्षिक, म्हेनिङ– असोज, नारे– बिहीबार, गेन्दुन– संस्था, न्होरकि– आर्थिक, स्ह्रुग– रुप, ग्युइसेर– शिक्षा, बिजाबुमो– बालबालिका, दोन्ता– उद्देश्य, डुप्बा– प्राप्ति, ङोन्छाङ– प्रत्यक्ष, न्हाङस्ह्रुग– आन्तरिक रुप, लिस्ह्रुग– स्वरुप, स्योमि– पत्रकार)