डान्सि–डान्सि
म्लेबा अभिनयला गेरेमरि
नाम्सा निबा ग्यालाम आम्लेसाइ नोन
म्लेजिन्बा म्हिह्राङ्बा दोसि
शहरला ङोआसेबा गल्लीकादेरि
ह्योङ्सि–ह्योङ्सि कोर्बाकेन मुला ।
खाइमाइ छ्योबा व्हा आछ्योबा
छिङ्गाइ म्हाङकादेला स्क्रीप्ट ब्रिनाब्रिनान
ब्लाप्बा मुला । 
कादे रेकादेला फोइदान म्लेसि
याम्बुला इज्जत दोसि
ब्योङ्बाकेन लाबा बागमतीला कुनिरि राप्सि
सन्त नेता भट्टराई ह्रेम्बोरछेला म्हाङ
मेलाम्ची डान्सि
म्हाना लाबाकेन मुला, फुइबा क्युइला
न्हुपला छितिजसे दिनि ग्लोङ्केन लाबा तिरेङ्यासे
ङा केबा चेमो नाम्सा ग्याम
ङाला ह्राङ्बान छिङ्गाइ म्हाङकादे म्राङ्बारि 
छिँवाल गि अल्लारे आलेकादे खाजि
ङातेन जामाकुनु म्हुना छ्याम चिजि
खाराङ्बा मुला नाम्सा–
ओम नाम्सा निबा ग्यालाम ? 
आलेकादेसे बिबाकेन मुबा–
ज्योज्यो ए नाम्सारि मुमा बिमा
ल्हानान पोबा मुला । 
ङ्हाच्छाला ग्याम, ग्यालामकादे
खानाङए डुइसे ल्हुबा मुला । 
खानाङए बनमारा थेन अरेली पुजुसे गाप्बा मुला 
खानाङए भौतिक विकासला विकल्प दोबा
डोजर आतंकसे तहसनहस स्होबा मुला । 
ज्योज्यो !
दारे नाम्सा निबा ङ्हाच्छाला जाजाग्याम
डान्बारि सोचिबा मुला । 
म्हाङकादेरि छ्योङ्चिबा याङ्ला । 
थेनोन जातुकु दुइला केवा थोसि । 
नाम्सा दोसिनिबा ग्यालामला दुरि ल्हाना थारेङ आरेमुबा
तासाइ, उत्साहित तासि म्हाइबारि खाबा
आम्हाबा म्हाङजुगुला म्हाइबासे
दुरि ल्हानान थारेङ स्होजि । 
बिबाकेन मुबा आलेकादे–
ङ्यान्बाकेन मुबा ङा । 
ङाला नाम्सा निबा ग्यालाम
सुनसान ताबा मुला रो दार्से
मापदण्ड ख्योल्सि स्होबा छिङ्गाइ ग्यालामकादे
छिङ्गाइ म्हाङकादेतेन छ्याम
बर्खा दुइरि डुइ दोसि ब्योङ्ला रो 
सेर्खा ल्हागतिमा हेन्से
ग्यालाम क्राछिगरि पारित ताबा बजेटला सदुपयोग 
स्होला रो ला डु दोनाला ग्यालम दोसि
थे स्होबाकेन लाबा ग्यालाम तासि
नाम्सा दिमला सौंन्दर्य
नाम्सा दिमला तोबा
नाम्सा दिमला ह्याल लिउजुगु
ब्योन ओम छामे निर्यात ताबा लाला
थारेङ थारेङ म्हाङकादे म्हाइबा पालेरि 
आधारभूत तोबा बार्बुस्हे
मुतेबा मुतेबा थोक आयात ताला । 
आलेकादेसे बिबाकेन मुबा–
ज्योज्यो !
नाम्सा ओम नाम्सा निबा ग्यालामरि
तिल्मा बिमा तिनि
ल्हानान फेबा मुला ।

पाँचखाल–११, काभ्रेपलान्चोक , दाते– लिमासोल, साईप्रस ।

(छिगला अर्थः गेरेम– अभियान, फुइबा– तिर्खा, चेमो– प्रिय, ख्योल्बा– छलेको, क्राछिग– शीर्षक, पाले– निहु, बार्बुस्हे– सामाग्री)

दोःबा : यकिना अगाध