आले आङाजुगु !
चु आलिशान महल
स्होसिमाम तयार ताजिन्जि
दारे एनिकादे चुग्याम निबारि खाम्सेला मुला । 
ह्राङ्ला मुतेबा बाङ ल्हागाब लासि
एन्छे साप्रा थाजि
देनः युजि 
एन्ना काते ह्रोजुगु
साप्रा न्हाङरिन ल्हुजि ।
तासाइ एन्छे आँटसे गे लाजि 
युङ्बा थेन कोङ्बा सेमसे
संकल्प थेन फाइसे
बालुवा, कल्पना थेन सिमेन्टसे
मुतेबा इट्टा इट्टा डिक्ना लासि
आबोबा थेन कोङ्बा डेङ राप्ना लाजि । 
छत चुह्राङ्बा मुला कि–
थे ग्याम या स्योङ्मा
मु थुर्बारि खाम्ला ह्राङ छोर्ला । 
ओम झ्यालकादे थेह्राङ्बान–
क्षितिज च्याबा मि ह्राङ्बा
म्रापकादे ... शानदार डेन !
ह्राङ्ला काङ, पाखुरा
ओम मिछामकादेला बाङसे एसे
ग्यार्जाछा दिङ टुबा
चु छोन्बोखेप्बा महल स्होजि । 
थेलिच्छा एन्छे
पिङ्छ्युप नार्कापाङ्ला पाङ्ग्याल
म्हेन्दोला वान
झरना थेन ग्योइ नोन स्होपिन्जि । 
थेलिच्छा गोङ्मा गोङ्मारि 
रंगीविरंगी ह्याल युपिन्जि । 
छेप्बारि सिल्बा
ओम हाङ्बारि डोइखाबा
मुतेबा डिछ्याबा लापिन्जि । 
ओम गोङ्मा गोङ्मारि 
ह्रोल्ज्याङ थेन स्याबाला सामान
ठिक ग्लारि थानपिन्बा मुला । 
खार्पा, गिलास थेन बोतलकादे
मुतेबा सजप लापिन्बा मुला । 
च्याङ्ना छिगरि बितोमा
सुख, सुविधा थेन ह्राङ्बाङला 
याखारगि सुरक्षित इलाका
बिले
याखारगि झिलीमिली स्वर्गन स्होपिन्बा मुला । 
चु मेहनत थेन लगनशीलताला लागि
एन्दा ल्हानान ल्हानान थुजेछे
दारे एनि चुग्याम निबारि खाम्सेला मुला । 
खानाङ निसे बिसि थाङ्योइगो–
खानाङ निम्हान्बा थेरिन निउ
दातेला लागि
थे माङ व्हाङ ख्वाबा साला दोपरि 
खानाङ टहरा युबा मुला
थेदा नोन खाली लापिन्गो । 
थेलिच्छा सेम निबा ग्लारि निबारि 
एनि ह्राङ्बाङ मुला । 
ङान्ना जिम्मेवारी जिन्जि
दारे मिनेट गिला लागि नोन
एनि चुरि चिआम्याङ
फिरग्याप ह्युलला डोन्बोतेन छ्याम
महामहिम ज्यान्गाबाकेन मुस्ह्युला ।
अफिसरकादे खाबाकेन मुला
न्हुपला ह्रोल्ज्याङ्ला छ्याम
तिसेला मुला उन्मादक स्याबा । 
गेताङ तिगेन लाजिन्बा मुला
दारे चुरि एन्ना गेनोन तिगा ताला ले ?
एन्दा चुरि म्राङ्सि
तिगा म्हान्ला थेनिकादेसे ? 
खिदि मुबा क्वान, धुलोसोक्खे ल्हुइ
ठिक तोसोसे पाङ्बा
ओम या ह्योङ्बा ग्युइ नोन आरे । 
थेन्ना सेमनिबा थेन रहररि
कादे ग्रेन धक्का परतिला
ओम ङान्ना कादे ग्रेन बेइज्जत ताला ?
चु दिमदा
चोदे चिटिक्क थेन कोङ्ना स्होबारि 
एन्छे नाख्रु सुताइ म्याप्बा थाहा मुला
का थेन टु ओस्बान स्होजि
तासाइ थेला बोरि
ज्याला पिन्जिन्बा मुला 
सुङ ब्रोइखाबा स्होसि 
थुजेछे नोन पिन्जिन्बा मुला
दारे एन्दा तिगा तोजि ? 
एनि चुग्याम निबारि ङ्यान्चिबा आरे
एन्ना लिला हाउभाउए पोबा मुला 
शायद ह्राङ्ला चु ग्रेन थेन जेबा रचनाफिरि
एन्दा लोभनोन ल्हागतिबा मुसिम
चुदा ख्लासिमाम नितोमा सेम स्हुखासि चिबा मुसिम । 
चुह्राङ्बाम ताबारि खाम्ला !
तासाइ चुला अर्थ
एन्ना याग्याम स्होबा
मुतेबा स्हे एन्ना ताला बिबा आरे ले । 
थेह्राङ्लासिम मुतेबा जाम्बुलिङ एन्ना ताला
ओम ङानि दोप्ताकादे खानाङ निसे ? 
डान्थान्गो !
दोप्ता, दोप्ता दोला
गेनाम, गेनाम नोन ताला
एन्ना गे गेलाबा हिन्ना
ङान्छे थेदा भोगचलन लाबा हिन्ना
एन्छे जाम्बुलिङ स्होबा हिन्ना
ङान्छे थेदा रमाइलो लाबा हिन्ना । 
ह्राङ्ला गेला मुतेबा रोरो
एन्छेन याङ्तोला बिसि म्हान्जि बिसाम
ङ्हाच्छाला केबाला एन्ना कर्मसे
एन्दा अभावला नर्करि बोर्चिबा ताखाम्ला । 
विश्वास लाउ, 
धर्मबिमा स्यान्दो खाजिबाइ ग्यालाम आरे । 
दारे एनि चुग्याम निबारि खाम्ला
तिगा एनि चुग्याम निबारि सेम आरे ? 
चु भव्य महलरि 
चुरिन चिबा सेम मुला ? 
चु गलैंचाजुगुरि काङ जुबा सेम मुला ? 
आहो ! चुमि लोभ लालच नोन आउदिन ताजि 
सारसर अन्याय नोन ताजि । 
ठिम थेन डिछ्याफिरि सोझोन आक्रमण हिन्ना । 
स्यान्दोलन सम्पत्ति कब्जा लाबा
ओम जाम्बुलिङदा फ्लिङसोबा
मोक्कोन बिमा मुख्य अपराध हिन्ना । 
ङान्छे चुह्राङ्बा खाजिबाइ दुइरि ताआपुङ
च्यागो चु भाइचाराला नुर आहिन । 
चुमि लडाइला
सिबा व्हा सोबाला नुर हिन्ना । 
तासाइ नोन ङान्ना काब्योङ्गाइ बिबा सेम आरे
ङान्दाम अमन, चयन थेन सुख सुविधा सेम निला । 
तासाइ एन्छे बाध्य ताना लासाम
ङान्छे ठिमला ह्रो किन्तोला
पुलिस नोन
ओम खाँचो ताजि बिसाम
सेना नोन ङ्योइतोला । 
ङान्छे नाङ्पिन्छेला मुला
एन्ना यासे स्होबा
चु स्वर्गरि चिबा
एन्ना रहरदा नाङ्पिन्छेला मुला । 
आहिन्साम निउ
टाङ्बा सम्बन्धकादे
ओम उजाड मिकादेला
लाबा लुङ्सुर, दोप ओम हिक्कुकादेला
डोङ्बा, ग्याप्बा ओसेम अभावकादेला
ह्राङ्लान उजाड जाम्बुलिङरि 
कुटिसि कुटिसि फिर्ता निउ ।

(छिगला अर्थः देनः– जग, ह्राङ्बाङ– स्वतन्त्र, दोप्ता– मालिक, गेनाम– मजदुर, जाम्बुलिङ– संसार, रोरो– फल, ठिम– कानुन, डिछ्या– व्यवस्था)

दोःबा : यकिना अगाध