हेराङ २६ बेल्बो । गोदावरी ११ चापागाउँरि मुबा बज्रबाराही लाथान ख्राङ्गारि नारे गुरु ङ्ह्याकुनु जाम्बुलिङ साङ दिवसला दुइसाङरि ‘ज्याम्याङ कुस्याब आध्यात्मिक दर्शन केन्द्र’ला स्हेङ्बारि ङ्हीछा दिङ छ्युकुला गेताङ ताजि ।
गेताङरि स्हेङ्खेन धर्मगुरु टुल्कु साङ्गे शेब्दुप तेनजिन रिन्पोछेतेन खेन्पो, लोपोन्लामा, लामा गुरुकादे ओसेम गेन्दुनला ह्रोम्हिकादेसे बोकिन्बा मुबा । चु साङ जाम्बुलिङला रक्षक, धर्मपाल, इष्टदेव थेन भुमिदेवकादेदा ङ्योइसाङ लाबाला लागि चाङ्ना लाबा छ्योकु विधि हिन्ना । थेतासि चु छ्योकुदा जाम्बुलिङ साङ बिबा लामुला ।
दैवी प्रकोप, नोइ, नाबा आतागाइ बिसि ‘ज्याम्याङ कुस्याब आध्यात्मिक दर्शन केन्द्र’से जाम्बुलिङ साङ दुइसाङरि छ्योकु लाबा हिन्ना । गेन्दुनसे चुपाल्छे बौद्धमार्गीकादेला चाङ्मा ग्ला चापागाउँला बज्रबाराही लाथानरि साङ लाबा हिन्ना ।
मन्जुश्री तत्व ज्योतिष फाउन्डेशन नेपालला गाउराइ निरोज जिम्बाला आन्सार साङ गेताङरि स्हेङ्खेन ह्रोम्हिकादे, आजीवन ह्रोम्हि, मणिपा आमाकादे, उपासक– उपासिकातेन धार्मिक म्हिकादेसे बोकिन्बा मुबा ।
(छिगला अर्थः हेराङ– ललितपुर, बेल्बो– असार, नारे– बिहीबार, स्हेङ्खेन– संस्थापक, गेन्दुन– संस्था, ह्रोम्हि– सदस्य)
तपाईको प्रतिक्रिया दिनुहोस