याम्बु २९ बेल्बो । बौद्धनाथ थुम फेल्गेबा समितिसे ह्राङ्ला २९ छा दिङ्साङ गेताङ दाङ्जि । कामरे दक्षिणढोकाला रोयल प्यालेसरि धर्मगुरु लोसाङ नाम्ग्याल रिन्पोछेला ङोन्छाङरि ताबा हिन्ना । गेताङला ग्रेन्पोडोन्बो रक्षालोन्पो मानवीर राई मुबा बिसाम विशिष्ट डोन्बो सांसद् सन्तोष चालिसेतेन ल्होलो गेदुङ–गेन्दुनकादेला प्रतिनिधिकादे मुबा ।
गेताङ समितिला चोहो राजकुमार लामाला चोहोदानरि ताबा मुबा । गेताङरि समितिला गेकाठाक्पा मोहनकुमार लामासे ज्याबाम्हान्बा सेमताम थान्बा मुबा । थेसे समितिला उद्देश्य, खाबा दिङ्ला योजनाकादे थेन मास्टर प्लानफिरि जानकारी पिन्बा मुबा ।
दिङ्साङ्ला दुइसाङरि बौद्ध धर्म, रिमठिम, परम्परा थेन अमुर्त सम्पदाला अनुसन्धान थेन ख्युरछ्यारि उल्लेखनीय योगदान पिन्बा म्हिकादेदा डेन लाबा मुबा । गेताङरि बौद्ध वडा नं. ६ न्हाङ्ला खेह्युल्पाकादे थेन ल्होलो सामाजिक गेदुङ–गेन्दुनकादेदा नोन डेन लाजि ।
गेताङरि बौद्ध थुमला समुचित डिछ्याबा, ख्युरछ्या ओसेम पूर्वाधार फेल्गेबाला लागि तयार लाबा ‘बौद्ध मास्टर प्लान’ सार्वजनिक लाबा मुबा । चु योजनासे बौद्धनाथ थुमदा धार्मिक, सांस्कृतिक थेन पर्यटन दृष्टिकोणसे अझ डिछ्याना थेन समृद्ध स्होबा उद्देश्य किन्बा मुला ।
ग्रेन्पोडोन्बो लोन्पो मानवीर राईसे ह्राङ्ला सम्बोधनरि बौद्ध थुमला धार्मिक, ऐतिहासिक थेन सांस्कृतिक महत्वला चर्चा लासिकेन चु थुमला फेल्गेबा थेन समृद्धिरि ह्राङ्ला तर्फग्याम तोबा ह्रो लासेला ग्रान पिन्जि ।
गेताङरि ल्होलो सांस्कृतिक प्रस्तुतीकादे सुताइ उन्बा मुबा । गेताङरि स्थानीयम्हि, बुद्ध धर्मालम्बी, गेदुङ–गेदुङ ओसेम सरोकारवालाकादेसे उल्लेखनीय बोकिन्बा मुबा ।
(छिगला अर्थः खास्योर– बौद्धनाथ, थुम– क्षेत्र, फेल्गेबा– विकास, गेदुङ–गेन्दुन– संघ–संस्था, गेकाठाक्पा– कार्यकारी निर्देशक, ख्युरछ्या– संरक्षण, खेह्युल्पा– जेष्ठनागरिक, डिछ्याबा– व्यवस्थापन, डिछ्याना– व्यवस्थित, ग्रेन्पो– प्रमुख, ग्रान– प्रतिबद्धता)
तपाईको प्रतिक्रिया दिनुहोस