याम्बु २४ गोने । नेपाल आदिवासी जनजाति स्योमि गेन्दुनछेन (फोनिज) रामेछापसे ह्राङ्ला २६ छा स्हेङ्बा दिङ्साङ ल्होलो गेताङला छ्याम दाङ्जि । कामरे मन्थलीरि आयोजित गेताङरि गेन्दुनसे जोङला गोरङ्ही स्योमिदा नगदला छ्याम डेन लाबा हिन्ना ।

आदिवासी जनजातिला थुमरि खोजमुलक तामसोर ब्रिबारि सक्रिय योगदान पिन्बा बिसिमाम नेपाल स्योमि गेन्दुनछेन रामेछापला ङ्हाच्छाला चोहो बद्रि नयाँघरेदा ‘खोज स्योमि पुरस्कार’ पिन्बा हिन्ना । थेदा नगद थेन डेनस्यो पिन्बा हिन्ना ।

चुह्राङ्नोन लासि नेपाल प्रेस युनियन रामेछापला चोहो ज्ञानु श्रेष्ठदा ‘नेपाल आदिवासी जनजाति स्योमि दिङ पुरस्कार’ ग्याम डेन्बा लाबा मुला ।

फोनिज रामेछापसे ‘नेपाल आदिवासी जनजाति स्योनाम दिङ पुरस्कार’ निबा दिङ ङिसहेन्से थेन ‘खोज स्योनाम पुरस्कार’ ब्लि दिङहेन्से निरन्तर बोलासि खाबा मुला ।

गेताङरि ‘पर्यटन ल्हेछ्यारि स्योमिला भुमिका’ नुररि अन्तरक्रिया गेताङ नोन ताबा मुबा । गेताङरि फोनिज रामेछापला ङ्हाच्छाला चोहो नवराज श्रेष्ठसे गेन्दुनगत गेस्यो  थान्बा मुबा बिसाम गाउराइ सुमित्रा थोकरसे पर्यटन ल्हेछ्यारि स्योमिला भुमिका नुरला गेस्यो थान्जि । गेस्योफिरि बोकिन्बा स्योमिजुगुसे ह्राङ्ह्राङ्ला धारणा थान्बान पर्यटन फेल्गेबाला लागि प्रभावकारी स्योनाम तोबा तामरि बाङ पिन्जि ।

गेताङला चोहोदान फोनिज रामेछापला चोहो कुमार श्रेष्ठसे लाबा मुबा । थे दुइसाङरि मन्थली नगरपालिकाला नगरग्रेन्पो लब श्रेष्ठसे मन्थली नगरपालिकासे पर्यटन फेल्गेबाला लागि ल्होलो योजना स्होसि कार्यान्वयन लाचिबा ग्रादाङ पिन्जि । थेसे स्थानीय सांस्कृतिक सम्पदा, प्राकृतिक जेसुम, थेन ऐतिहासिक महत्व थोबा ग्लाजुगुला प्रचार प्रसाररि स्योमिला भुमिका महत्वपुर्ण ताबा पाङ्बान छ्यागेला अपेक्षा थान्जि ।

फोनिज बागमती प्रदेशला चोहो युवराज श्रेष्ठ, नेपाल स्योमि गेन्दुनछेनला केन्द्रीय ह्रोमि नवराज पथिक, ङ्हाच्छाला चोहोजुगु हिमाल ढुङ्गेल, बिद्र नयाँघरेतेन स्यान्दोसे ज्याबाम्हान्बा सेमताम थान्सि फोनिज रामेछापला स्योनाम थुमरि पिन्बा योगदानला प्रशंसा लाबा मुबा ।

स्हेङ्बा दिङसाङला दुइसाङरि डेन्बा ङ्हीनोन स्योमिसे ह्राङ्से याङ्बा डेनदा जिम्मेवारीला लिरि किन्सिमाम खाबा रेरि झान जिम्मेवार थेन सत्यनिष्ठ स्योनाम लासेला ग्रान थान्जि ।

(छिगदोनः स्योमि– पत्रकार, गेन्दुनछेन– महासंघ, गेन्दुन– संस्था, डेन– सम्मान, डेन्बा– सम्मानित, स्योनाम– पत्रकारिता, ल्हेछ्या– प्रबर्धन/संबर्धन, गेस्यो– कार्यपत्र, फेल्गेबा– विकास, ग्रादाङ– जानकारी, जेसुम– सौंदर्य, छ्यागे– सहकार्य, ह्रोमि– सदस्य, ग्रान– प्रतिबद्धता)