याम्बु १५ यान्दे । नेपाल प्रज्ञा प्रतिष्ठानसे तेबा तामाङ ग्योइला ‘याम्बुलिङ’ स्योस्यो तिनि कमलादीला प्रज्ञा दिमग्रेनरि विमोचन ताजि । स्योस्योला विमोचन ग्रेनडोन्बो प्रतिष्ठानला कुलपति भुपाल राईसे लाबा मुबा ।

ग्रेनडोन्बो राईसे प्रतिष्ठानसे तामाङ ग्योइला स्योस्यो तेम्याङ््मा ह्राङ्दा ताङ्बा खाबा पाङ्जि । ‘नेपालरि मुबा नेपालीजुगुला आमाग्योइदा खालाइसे बेवास्त लाला आदे ।’ थेसे पाङ्जि, ‘ग्योइ ग्युइला मुहान हिन्ना ।’

थेसे ह्राङ्ला ग्योइदा चेगाइ लाबासे जेक्खे ह्राङ्ला अस्तित्व कोङ्ह्रावा लाबारि खाम्ला पाङ्जि ।

गेताङला चोहो प्राज्ञ ओसेम आमाग्योइ विभाग थुछापा प्राज्ञ राजन मुकारुङसे तामाङ ग्योइला चु ‘याम्बुलिङ’ तेबारि ह्राङ्से ल्हानान पहल लाबा ताम थान्जि । ‘चु ङ्हाच्छा खाबा प्रज्ञा प्रतिष्ठानला म्हिजुगुसे खाइमाइ तामाङ ग्योइला महत्वदा आगोनि ।’ थेसे बिजि, ‘थेन्छे खस नेपाली ग्योइदा जेक्खे ख्युरछ्या लासि तामाङ ग्योइदा व्हाबा गे लाजि ।’

ग्योइखेन्पो अमृत योन्जन तामाङला पहलरि चु ‘याम्बुलिङ’ स्योस्यो तेबारि सफल ताबा हिन्ना । प्रज्ञा प्रतिष्ठानसे स्योस्यो तेबा आप्ता लासाइ नोन ह्रेङ्बा दुइदोना कोल्चिबा मुबा । चुबिमा ङ्हाच्छाला डिक्खेन थेत्माइसे स्योस्यो तेबारि आखाम्बासे छार डिक्खेन खासि तयारी लामा ‘याम्बुलिङ’ तेबारि गाइबा हिन्ना ।

गेताङरि डिक्खेन थेत्माइग्याम गेडिक्खे ईन्द्रकुमार तामाङसे ह्राङ्निसे याम्बुलिङदा खाम्देदोना स्तरीय स्होबारि बाङ्लाबा पाङ्जि ।

डिक्खेन थेत्माइला ह्रोमि ओसेम प्रज्ञा प्रतिष्ठानला आमाग्योइ विभागला ह्रोमि रचना मोक्तानसे तामाङ ग्योइला स्योस्यो तेसि तामाङ ग्योइकाइ थुमरि ह्रोलाबा बिसि प्रतिष्ठानला पदाधिकारीकादेदा थुजेछे पिन्बा मुबा ।

प्रतिष्ठानला ह्रोमिगाउराइ धनप्रसाद सुवेदीसे डेन सेमताम थान्बा चु गेताङला संचालन प्राज्ञ चेतनाथ धमलासे लाबा मुबा ।

म्हेनिङ लिच्छा खाबा याम्बुलिङला सेङराप बो स्होबा निर्णय नोन लाबा मुला । चुला लागि तामाङ ब्रिखेनजुगुदा राप, तुनराप, साराप पुइकाबाला लागि म्होइजेन लाबा मुला ।  

(छिगदोनः व्हााबा– हेला, चेगाइ– माया, कोङ्ह्रावा– सुरक्षा, ह्रोमिगाउराइ– सदस्यसचिव, आप्ता– निर्णय, सेङराप– आख्यान)