याम्बु । बौद्ध धर्मला महान योगि मिलारेपाला केवारापदा किन्सि स्होबा चेमा ‘मिरारेपा’ मण्डला थिएटररि ओन्सिचिबा मुला । चुनोन सोङराति १८ कुनुहेन्से याम्बुला थापागाउँ बानेश्वररि मुबा मण्डला थिएटररि ओन्बारि तिबा चु चेमा तापाग्रेन २१ कुनुदोना ओन्सेला मुला । चेमा च्याबारि खाबाकादेला संख्या उत्सहजनक मुबा काठाक्पा बुद्धि तामाङसे पाङ्बा मुला ।
११ छा शताब्दिरि तिब्बतरि केबा किन्बा सिद्ध ब्रिखेन थेन बौद्ध धर्मका तान्त्रिक योगि मिलारेपाला केवारापदा किन्सि स्होबा चेमाला परिकल्पना थेन काठाक्पा बुद्धि तामाङ छ्यामरि उमेश तामाङसे लाबा मुला । चाङ ङ्योन हेरुकसे ब्रिबा रापदा रबिन तामाङसे चेमारि पोबा हिन्ना । चेमाला गोछापा थुछापाला स्ह्रुगरि गुरु कोशिस लोब्साङ वाईबा मुला ।
कलाकारकादे रुपेश लामा, रमिला मोक्तानm विकास लामा, सानुमाया तामाङ, रस्मिला तामाङ, रिया लामा, बिजय तामाङ ब्लोन, बलबहादुर राई, मिलन कार्कीm मणिकुलुङ राई, रोहनी लामा, पुसकार कार्की मुला । ओराङनोन लासि विश्व स्याङ्बो, सबिता थिङ, सुनिता दोङ, सुदिप खतिवडा, बिजय टुबा, रत्न मंगल, टासी लामा, अजय लामा, पवनकुमार गोले थेन सबिता तामाङसे चेमा मिलारेपारि क्लाङ्बा मुला ।
चु चेमारि मिलारेपासे ग्युइ साधनाला लागिरि लाबा संर्घष थेन पापदा ख्लासि धर्मला ग्यालामरि ब्राबा तामकादेदा छोन्बो ओन्बारि म्हाइबा मुला । मिलारेपाला तान्त्रिक साधनाथोला प्रेरणादायी रापदा ओन्बा चेमा छ्योआछ्यो घण्टा ङिरि ओन्बा बाङ लाबा मुला ।
चु चेमा मण्डालारि रेदाङसेन लनिरे ख्लासि ङ्यासे साढे ५ हेन्से च्याबारि खाम्सेला मुला । काम्रे कुनु बिसाम दिन्सेला १ ङ्ह्यामानोन शो मुला ।
(छिगकि दोनः तापाग्रेन– मंसिर, काठाक्पा– निर्देशक, थुछापा– संयोजक, स्ह्रुग– रुप, लानिरे– सोमबार)
तपाईको प्रतिक्रिया दिनुहोस