झरीरि बाम्सिकेन ब्रामा सेम ताङ्बा ङाला लागि तिनिला सिमसिमे नाम तिगाइ आहिन्मुबा । तासाइ नोन छ्याम मुबा ल्यापटप थेन डकुमेन्टजुगुला सेफ्टीला लागि कुल्चिबा बाइकदा सडक कुनिरि थेनथान्सि ङामला भट्टी न्हाङरि वाङ्जि । ङामथामा वीरअस्पताल मुसि मुतानाम म्हिला भीड आउदिन रुङ्बा म्राङ्मुबा भट्टीरि । थेह्राङ्मि कादेम ङा ह्राङ्नोन झरी ख्योबाला लागि नोन भट्टीरि क्रुबारि वाङ्बा मुसिम । जि थुङ्सि गुर्बा खेप्पा म्हिह्राङ भट्टी गुरि गुर्चिबा मुढा छेङ्सिमाम चिजि । चुनोन दुइरि आउदिन जेबा छामे खाजि ओम ङ्हाच्छा हेन्सेन ङोसेबा ह्राङ्लासि, ‘ज्योज्यो ह्राङ तिनि थारेङनोन ब्रास्ह्युबा हिन्ना ?’ बिसि ङ्योइजि ।

ङाइ तिगाइ ताम छुम्तोला ह्राङ आछोर्नि ओम देन्बा निसाल पिन्जि, ‘आहिन, ह्राङ्लान अफिस त्रिपुरेश्वरग्याम हिन्ना आङा ।’

बर्खाला नाम खानाङ थेन्ताला ओम झन्झन् स्हार्सि ताइबारि चुजि । थेह्राङ्नोन लासि थेनोन ङामरि खासि पाङ्जि, ‘ज्योज्यो निसेला हिन्ना ?’ थेह्राङ्बा झरीरि निबा ताम नोन आखानि । नाम थेन्तामाहेन्से निला आङा बिसि ङा ह्राङ्ला ब्यागला डायरी तेसि ओर्बारि चुजि । थेनोन जाकि क्याथाङ ल्हेजि ओम स्यान्दो ग्लारिक्यार मि कोर्बारि चुजि ।

छ्योआछ्यो २० मिनेट लिच्छा नाम थेन्ताजि । ङा भट्टीग्याम माङ्ग्यार थोन्जि । सडक कुनिरि नामसे फ्योरबाम्बा ह्राङ्ला बाइक म्राङ्सि दया ल्हागतिजि । ङामरि निसि यासे स्योम्ब ज्योरि बाइक फिरि मुबा क्युइ फ्याजि ।

ओ कोन्ज्योसोम खाराङ्बा आश्चर्य ! बाइक स्टार्ट लाइ जेक्खे तिगा लामुबा थेनोन छामे लेप तासि ङाला बाइकफिरि क्रेजि । ङा अवाक ताजि । ओम, चोननोन निजि । ‘ज्योज्यो ब्राइले ल्हा ह्रेच्छाक नोन म्हाले । पाजि ग्यार्जा सोमनोन म्हाले ।’ क्योलोलो ङाइ गोजि थेमि यौनकर्मीगा चिम बिबा ताम । खान्दामान नाम ताइबालिच्छा होन्दोलोङ मुबा वातावरण तासाइ ङाला सेमरि बिसाम तिक्खुरि लाबा लुङ्सुर चलतिबारि चुजि । ङा दातेनोन मौन मुबा । ङाला जोर मि थेनोन छामेरिक्यार स्योन्तोलोङ ताचिबा मुबा । ङाला मौनतासे थेसे तिगा म्हान्ग्याम खाइ बिज, ‘छ्या ! खाराङ्बा हिन्ना चु ज्योज्योम योना ब्राउले ।’ मौनतादा बोसिकेन ङाइ पाङ्जि, ‘प्लिज आङा ङा थेह्राङ्बा तोसोला म्हि आहिन । ङादा ख्लागो बिसि थेग्याम स्योर्बारि म्हाइजि ।’ तासाइ राम्हेला न्हाब्याङ्ला तिम्रा ह्राङ थे ङाला बाइकरि लेप ताचिजि । बाइकग्याम फाप्नोन आफाप्नि ।

नाम ताइबा लिच्छाला वाताबरण तासि मुसिम म्हिला चाप झन् झन् ल्हेबाकेन मुबा । सडक कुनि थेन सडकरि गाडीला चाप नोन ओस्बान मुबा तासाइ ङाला पाले आरेबा सेमसे बिबाकेन मुबा, ‘चु मुतेबा म्हिसे ङादा च्याचिबा मुला । ङादा ब्रेबाकेन मुला कि ल्हौ च्यागो यौनकर्मीतेन साइ लाबाकेन मुला बिसिमाम ।’ हिन्बा नोन हिन्ना, ङोन्छाङला वीर अस्पताल थेन ख्यारख्युरला मोक्कोन दिमसे नोन ङान्दा च्याबाकेन मुबा । चोतेबारिन ङाला चेमो प्रिय चमेलीदा डान्जि, आपाला ग्याम च्याबाकेन लाबा जामे इलुदा डान्जि ओम डान्जि क्योलोलो कुरि लापलेप ताबारि दोगाबा जा जेहेनदा नोन ।

ल्हे ङेसिकेन थेसे झान बिबाकेन मुबा, ‘ज्योज्यो चोतेबा दुइरिम दोसिन जिन्छेला । खान्दामान म्हिला कालाङ्बासे असहज ल्हागतिचिबा सेम नोन बोताजि गोर ङ्हि गुट दोसिमाम । गिक्खे सेमसे बिबाकेन मुबा ‘निउ शेरे निउ’ मौका चुनोन हिन्ना । ग्यामला फुन्टि खाल्छेगा आह्राप ले ? दोसि स्यान्दो सेमसे बिबबाकेन मुबा ‘ताजि शेरे ए चुह्राङ्बा आचाङ्बा ग्यालामरि ब्राला आदे । ए याखारगि बौदिक म्हि समाजदा सकारात्मक छ्यो पिन्तोबा म्हि नोन चुह्राङ्लासि ब्राजि बिसाम ए न्हाङ्ला चेतनासे एदा केसेला मुला । चुह्राङ्लासि ह्राङ्लान सेमनोन युद्ध लाबारि चुमाहेन्से ङा ल्हानान दुइ अन्यौलरि परतिजि । थेनोन दुइरि ङाला ङोन्छाङ ङ्हाच्छाला सभासद दायाँ बायाँ छामेकादे ख्वाइसिमाम नसारि ह्योङ्चिबा म्राङ्जि । ङादा थेग्याम ह्यार्तोबा मुबा ङ्यान्दि थे सभासददा आउदिन ब्लोसिमाम ङाइ राप ब्रिबा लाबा लामुबा ।

थेतासि थे छामेदा बोर्सिमाम थेसे पाङ्बान ग्यालाम दाङ्जि । वीर अस्पतालला न्हुपला कुङ्ग्याल महाबौद्धला गल्ली गल्ली ४, ५ मिनेटला छ्योङ्बा लिच्छा याखारगि छोङ्खाङ ङ्हाच्छा बाइक थेन्थान्पुङ्जि । बाइकदा गिक्खेन अलपत्र ताना लासि थान्सि क्युइफुइबा तारङाह्राङ थेनोन छामेला लिच्छा लिच्छा वाङ्जि । तला ङ्लिा चाम क्रेजिन्माहेन्से ज्याङ कुङ्ग्यालला म्राप ठोक्बारि चुजि । ओस्सोनमि लोङ्बा सेम थेरि स्यान्दो नोन मुबाचिम बिबा थाहा याङ्माहेन्से झाननोन लोङ्जि । तासाइ नोन ह्राङ्ला सेमदा सोसि नार्तुला च्योदोरिक्यार दोगाबा चस्मादा ह्योजुम्बिसे तोर आङ्पुइजि । गोङ्रोङ्ग म्राप ठ्वाङ्जि । योना योना चस्मा न्हाङ्ला ङाला मि थेरिक्यार निजि । ङोन्छाङ मुबा गाङ्साल लिखन्डि लिरि याखारगि छामे । थेला यारि जिन्गे लाबा चुरोटला ठुटा मुबा बिसाम सुङ्फिरि फुङ्ग रेबा मुस्कान । तासाइ नोन थेसे बिबाकेन मुबा–

‘ओइ सरिसा थे म्हागेन हिन्ना ।’

ङाइ गोबाकेन मुबा थेसे ङादा याखारगि यौनप्यासी, यौन तृप्तीला लागि ह्रेच्छाकदा खाबा हिन्ना बिबा थाहा ताना तानान चेमा लाबाकेन मुला बिसिमाम ।

‘हिन्ना हिन्ना एलान म्हागेन हिन्ना ।’ बिबान सरिसा, खाल्छे ङादा बोर्सि निबा मुबा थे न्हाङरि वाङ्जि । ङाचा म्राप माङ्ग्यारनोन कोल्जि । ङा ह्राङ्बा ग्यार्जाछादा नाका स्होजिन्बा मैयाँजुगुसे ङादा ओस्सोन खानाङ ख्लासेला मुला ले ।

‘छिः कादे पेबारि सेबा चु म्हागेन मि’ बिसिमाम ङादा न्हाङरि छेङ्जि । छ्याम नोन निबा सरिसा न्हाङरि क्वान पोबाकेन मुनाम ! ङा न्हाङरि वाङ्मा कादे योना म्याक्सीरि ङेचिबा चिम । हिन्बाम ल्हुइला बित्ता सोमला क्वान स्युसि बोराह्राङ्बा म्याक्सी हाल्बारि कादेन दुइ ल्हागतिला ले ?

कोठाला खान्दामान छ्यालाङछ्योलोङ क्वानकादे ठाम्चिबा मुबा । थेह्राङ्नोन लासि ठाम्चिबा मुबा चुरोटला ठुटाकादे । खाइ थेनि तिगा ताम लाबाकेन मुबा कोठाला गुरि राप्सिमाम स्याउस्याउ सिउसिउ ।

ङाइ च्याबाकेन मुबा कोठाला खान्दामान । खाजिबाइ गेस्ट हाउसला कोठा ह्राङ छोर्बा थे कोठा ह्रेङ्बा आकारला मुबा । न्हाङरिन बाथरुम टोइलेट एटेच कोठाला म्राप ङामरि बोक्टो छोनला फ्याजिन्बा थेन खान्दामान मेसे क्रोसि गालगाल ताबा सोफा मुबा । शायद, चुनोन सोफारि चिसिमाम साइ लाबा मुसिम थेनिकादे ह्राङ्ला ग्राहकतेन बिले ग्राहक ल्हाना तामा पालो ब्रान्पुङ्मुसिम ।

कोठाला डेङरिक्यार खानाङए लिपिस्टिकदार सुङसे लाबा च्याबोला डाम लेपलेप नोन म्राङ्मुबा बिसाम खानाङए अस्पस्ट छोर्बा फोन नम्बरजुगु । चोत्तेरिन ङादा म्हागेन बिबा छामेसे ह्राङ्ला लेडिज ब्यागग्याम तेसिमाम आउदिन ज्याबाथाङ खाबा परफ्युम छार्जि । थेला थाङ ङाला नार्तुला गालरि नोन तोइबारि दोगाजि । थेनोन पफ्र्युमला थाङसे बिसे व्हा सेमहेन्सेन तिगाइ आगोना बिसे ङाला जोर मि थे छामेला काङ्फ्ला हेन्से थोबोदोना स्याबारि चुजि । ओहो ! कादे डिक्बा ङ्हेजाङ, कादे तार मुला काङ्सु, तुन्बा समिस, तुन्बान मिनिस्कट, कादे जेसुम ! खाल्छे बिला चुनिकादेदा यौनकर्मी ? कादे योना ङाला सुङग्याम्से ‘वाउ बेऔतिम्हेन्दो’ बिबा छिग प्योला थोन्जिम थाहान आतानि । सायद जेबा स्हेला खाल्दामानसे नोन प्रशंसा लाला । चु प्राकृतिक ताम हिन्ना ।

दोसि नोन ङाइ संयमता किन्जि । ङाइ थेह्राङ लाला आदे तिल्दाबिसाम ङा ह्युलला याखारगि सचेत नागरिक जेक्खे आताना याखारगि रापब्रिखेन मुबा । ङाइ समाजदा विसंगतिग्याम सचेत लातोबा मुबा ओम समाजरि घट्तिबा क्योङ घट्ना परिघट्नादा ।

सायद् थेन्ना ताम जिन्जिन्बा मुबा थेतासि थे माङ्ग्यार थोन्बाकेन मुबा ओम निर्धक्कला छ्याम बिबाकेन मुबा– ‘म्हागेन ! फिरि ब्युटिफुल हाउडला पुल ! हि हि हि ।’ खाइ थेसे तिगा तिगा बिबारि म्हाइबा मुबा ङाइ आगोनि । ल्हा होइ म्हागेन ज्याना लासि चिउ ओम इन्जोई लासि निउ, दोसि थाम्लेगोले ।’ चुह्राङ बिबान थे कोठाग्याम थोन्जि ।

कोठारि सरिसा थेन ङा बिमा खालाइ आरेमुबा । थे बु आरेबा सोफा थेन खान्दामान ठाम्चिबा क्वान बिमा । थे चोदे योना ङाला ङामरि खासिमाम छिल्याप ताबारि चुजि कि थेला या ङाला ल्हुइनाङ स्याबाकेन मुबा बिसाम थेला सुङग्याम अस्लिल छिगजुगु स्योर्बाकेन मुबा ।

शायद थेसे म्हानिज स्यान्दो ग्राहकह्राङ थेला चु आज्याबा हर्कतग्याम ङा मोहित तासि ङाजा खहरे स्योङ ब्योङ्सेला मुला । थेह्राङ्मि ङाला गिक्खे सेमसे बिबाकेन मुबा चु छल्काब ताबो यौवनला फुइबादा मुठीसे ज्योर्सि डुङपिन्गे । ओम, या ङ्हिसे ङ्हेप्सि ताइना लापिन्गे थेला सेखी । तासाइ थेह्राङ लाबारि ङाला न्हाङ्ला सेमसे पटक्कान आपिन्नि । ओम, अचेतानाला गाप्बा मानसपटलरि चेतनाला छ्योकु म्रातोबा मुबा ।

थेला वेश्या स्योम्बारि नोन ङा मौन म्राङ्सि थे चोननिजि । ओम, बिबारि चुजि, ‘ज्योज्यो ! तिगा लाचिबा योना लास्ह्युगो ले । ङादा स्यान्दो ग्लारि निबारि हतार मुला ।’

थेसे पाङ्गे लाबा ताम ङाइ गोजि ओम ग्यार्जा सोम आहिन पर्सग्याम तेसि ग्यार्जा ङ्हाला नोट थेला ङ्हाच्छा थानपिपन्जि । थेलिच्छा थे हैरान ताजि । दङ्ग नोन ताजि । ग्यार्जा ङ्हाला नोट यारि क्लाङ्सिकेन ‘चु मुतेबा ङादा ?’ बिसिमाम स्याबारि चुजि । थेलिच्छा ङादा सहज छोर्जि थेला बारेरि गोबारि ओम ह्राङ्ला वास्तविकता पाङ्बारि । ङाइ ह्राङ्ला वास्तविकता पाङ्बान थेला यथार्थ, ङ्हाउ थेन दातेला नाछाल गोबारि म्हाइजि । सायद थेसे ङाला मिन चु ख्यारख्युर थेबा तातोला । अचम्म म्हान्सिमाम ‘ओहो ! ह्राङ्नोन हिन्ना रापब्रिखेन ?’ बिबान वापवाप ताबारि चुजि ओम ह्राङ्ला वास्तविकता माङ्ग्यार आबाबा सर्तरि ह्राङ्लाबारे चुह्राङ्लासि पाङ्जि, ‘ज्योज्यो ङा याखारगि निम्न वर्गीय दिमम्हेला ह्रोमि हिन्ना ।’

थेसे ह्राङ्ला ल्हुइला राप ङ्हाच्छा पाङ्सिकेन बोर्जि, ‘१० डा डोबाकेन लामान ब्रेल्साङ ताजि । ओम, दिङ गिरिन कोला न्हाजि । कोलाला लिउला लागि  लागि ह्रेम्बो मलेसिया ब्रास्ह्युजि तासाइ ७, ८ दिङ्दोना फ्लिकदोसि आज्योन्गानि । तिगाइ अत्तो पत्तो नोन आयाङ्नि । ओम, ङा बाध्य तासि नाम्साला याखारगि ङेङ्गोर परतिबा एजेन्टला लिच्छा वाङ्सि दुबईरि छाबारि निबा निधो लाजि । हिन्ना ज्योज्यो ! सम्पतिला मिनरि याखारगि कोला थेन अंशरि बोल्हागतिबा ब्ले व्हारा मुबा । थेनोन बन्धकी थान्सिमाम निजि । नाम्साग्याम याम्बु दोगातेमा ङाइ ह्राङ्ला अस्मिता जेक्खे आहिन मुबा जाजाकार न्होरनोन थेनोन एजेन्टदा फुल्जिन्बा मुबा ।

थेनोन एजेन्टसे दुबईरि बिउटीपार्लरि गे याङ्ला बिसिमाम पुइजि तासाइ थेरि दोमा याखारगि रेस्टुरेन्टरि स्याबा गे लातोजि । खासिमि जिन्जि आलाइ खाराङ्लासि ? ह्राङ्ह्राङ्बान स्यान्दो नेपाली नाना आङा थेन फिह्युल्पा छामेकादेदा च्यासिमाम सेम गोना लाजि । बाध्य तासिमाम थेनोन गे लाजि । कादे योनान दुइला छालसे दिङ ङ्हि थाजिन्जिम, पत्तोन आतानि । ङा होसरि खामा ङा ल्हुइ ङ्हिला ताजिन्जिम । थेर्ला कानुन आन्सार फिह्युल्पा गेलाबा म्हि थेह्राङ्लासि फो पुइबा नाछालरि आथान्बा चिम । थेतासि योनायोना ङादा नेपालरि फ्लिकदोसि पुइगाजि ।

खाबामि खाजि दारे तिगा लासे ? न्होर आछानाना नेपालरि खाजि ओम जाजाकार मुबा न्होरसे क्युरेट लाजि । थेलिच्छामि नोन सोतोबा चिम ज्योज्यो । थेतासि क्यो चुह्राङ्बा गे लाबारि बाध्य ताजि । तासाइ नोन चुह्राङ्लासि सोबारि खानाङ देबाः मुला ले ज्योज्यो ? फिह्युलरिम ङोआसेबा नकाबधारीसे सुताइ ताङ्सिमाम न्होर पिन्सिमाम यौनप्यास मेटाप लाला । तासाइ चुरिम बर्दीवालाहेन्से तोच्चा ओहदाला हाकिम बिबाजुगुसे नोन ङान्ना यौन शोषण लासि लिसोजा मुबा न्होर नोन ब्यान्सि बोर्ला ।’

थेसे चोत्ते पाङ्तेमा ङाला मिग्याम खहरे होन दोसिमाम ब्योङ्जिन्बा मुबा । तासाइ नोन ङाइ ह्राङ्दा सम्हालाप लातोबा मुबा ओम सम्हालाप लाजि । चोदे ङाला थे हालत थाहा याङ्जि बिसाम थेसे ह्राङ्ला यथार्थ पाङ्बारि नोन खाम्सेला आपाङ्बारि नोन खाम्सेला । कादे कमजोर तिङ चिम चुला बिसिमाम । चु दुइतेमा मिरक्वाङ्क्वाङसे दिनिदा दुर्सारि सासिमाम दोगे लाजिन्बा मुबा ।

थेतासि चुग्याम ङा योनान थोन्तोबा मुबा । दिमरि जाजामे ङालान ग्यालाम च्याबाकेन मुसिम बिबा चिन्तासे कटकट सेम चाचिजि । चोदे ल्हाना ह्राङ्ला राप स्हुस्हेर ङातेन ल्हुबासे थेदा स्यान्दो ग्यार्जा ङ्हाला नोट पिन्जि । थेसे किन्बारि ङ्यान्बा आरेमुबा । बिबाकेन मुबा, ‘ज्योज्यो ह्राङ्से ङातेन थेह्राङ्बा आज्याबा तिगाइ लास्ह्युबा आरे । ङाइ खाराङ्लासि किन्से चोथेबा न्होर ?’

ङाइ बिजि, ‘चु ङाला ग्याम्से एदा ज्याबा ग्यालामरि वाङ्बारि ओम तिगाइ जाजा गे लाबारि लाबा ह्रो हिन्ना । थान्गो चु ओम खाम्ला बिसाम चु नाम ख्लासि खाजिबाइ स्यान्दो डेन्बाकि गे लाउ ।’

सेमरि स्हुला मिग्योइ थोसिमाम फेजि । दोसि तिक्खुरि ताङ्बा नोन खाजि याखारगि गतिलो राप स्याप्बासे । तासाइ नोन सेमसे बिबाकेन मुबा, ‘चु निरीह सरकार थेन प्रशासनसे ह्याङ मोक्कोनदा तिगाइ न्हा तिगाइ हिसाबसे शोषण लाबाकेन मुला । सरिसा आङा ! चिन्ता थालाउ । तिरे ह्याङ्ला नोन रे खासेला मुला । थेकुनु एह्राङ्बान यौनकर्मीला फेबान इज्जत तासेला मुला । एह्राङ्बान स्यान्दो नेपाली नाना आङासे दुबईला रेस्टुरेन्टरि खालाइला स्याबास्हे दोसिमाम क्लाङ्बास्हे दातोसेला आरे । न्हा ओम साउदी, कुबेत, ओमन थेन लेबनानरिक्यार खादामा दोसिमाम खालाइला ग्याप्बा दोतोसेला आरे । न्हा ओम ङाह्राङ्बा बुमछा छारिब्योनकादे साउदी, कतार दुबइला दिनिरि क्रोतोसेला मुला, न्हा ओम मलेसियारि म्हुनरे परिश्रम लाबा धनसे बेश्याजुगुदा न्हातोसेला मुला ।’

बिरेन्द्रनगर–१ चितवन ।

(छिगकि दोनः ख्योबा– छल्नु, क्रुबा– ओत लाग्नु, देन्बा– सत्य, निसाल– उत्तर, ज्यो– शैली, चेमो– प्रिया, कालाङ्बा– हल्ला, आचाङ्बा– अपवित्र, छ्यो– दिशा, केबा– सराप, ङ्यान्दि– कारण, कुङ्ग्याल– मोड, सोसि– सम्हालेर, चेमा– नाटक, नाछाल– अवस्था, ह्रोमि– सदस्य, डा– कक्षा, ब्रेल्साङ– विवाह, ङ्हाउ– विगत, लिउ– भविष्य, छाबा– कमाउन, तिम्रा– किर्ना, फिह्युल्पा– विदेशी, देबाः– सजिलो, फिह्युल– विदेश, तोच्चा– उच्च, होन– भेल÷बाढी, मिरक्वाङक्वाङ– जुनकिरी, नाम– पेशा, डेन्बाकि– सम्मानको, स्हु– दुःख, बुमछा– लाखौं)

दोःबा : यकिना अगाध