काभ्रे ६ तापाग्रेन । रोशी गाउँपालिका–१२ शिखरपुररि स्हेङ्गे लाबा ‘साङ्दोपालरी’ गुम्बा ग्युइसेर भवन (बौद्ध ग्युइसेर लोप्खाङ स्कुल) तिनि काप्तोनछेनला गुङरि शिलान्यास लाबा मुला ।

गेताङला ग्रेन्पोडोन्बो गाउँपालिका चोहो दिनेश लामा मुबा । चोहो लामासे फेल्गेबा योजनाला तिताङ रेम शिलान्यासदा गाङ्साल सफलता याङ्बा संकेत बिबान दारे चु योजना खाजिबाइ हालतरि अधुरो आख्लासेला प्रतिवद्धता व्यक्त लाजि । थेसे रोशी गाउँपालिकाला मोक्कोन वडारि ताङ्से बौद्ध ग्युइसेर लोप्खाङ स्हेङ्सेला योजनाबारे ग्रादाङ नोन पिन्जि ।

गेताङरि बागमती प्रदेश योजना आयोगला ह्रोमि गुणराज मोक्तानसे चु परियोजना प्रदेश सरकारला अनुदानरि रोशी गाउँपालिकाग्याम्से कार्यान्वयन तासेला ग्रादाङ पिन्जि । थेसे गुम्बा स्हेङ्बाला लागि प्रत्यक्ष बजेट विनियोजन लाबारि आखाम्बा तासाइ समुदायरि बौद्ध ग्युइसेर आडुप्बा थेन लामा गुरु बाबारि महँगो ताबा परिस्थितिदा ध्यानरि थान्सि ‘बौद्धग्युइसेर लोप्खाङ’ स्हेङ्सेला अवधारणा तयार लाबा पाङ्जि ।

वडाचोहो बसन्त कुमार तामाङसे ह्राङ्ला वडारि खाली मुबा सा बौद्ध धर्म ब्रेल्चिबा दोन्तारि सदुपयोग ताइ लाबासे सन्तोष व्यक्त लाबान बौद्ध ग्युइसेर खेडोब पृष्ठभूमिग्याम खाबा पाङ्जि । थेसे जनप्रतिनिधि हैसियतसे योजनादा सफल स्होबारि निरन्तर ह्रो लासेला प्रतिबद्धता उन्पाङ्जि ।

लामा गुरु पेमा दोर्जे मोक्तानसे २५६९ दिङ ङ्हाच्छा बुद्ध धर्म जाम्बुलिङनाङ फेल्ना लाबा उल्लेख लाबान शिखरपुरला प्राकृतिक वातावरण ध्यान–तपस्या थेन बौद्ध ग्युइसेरला लागि उपयुक्त ताबासे योजना सफल तासेला विश्वास व्यक्त लाजि ।

गेताङरि काइपा चन्द्रकुमार मोक्तानले ज्याबाम्हान्बा सेमतामला छ्याम ह्रोङ्लान व्हाइ कोबा मुबा । नेपाल तामाङ घेदुङला संघीय ह्रोमि बिलाम मोक्तानसे दुर्सागाङ्ला चाङ्मा सारि गुम्बा ग्युइसेर भवनला शिलान्यास ताबा बिबा दिङ्छाहेन्सेला सामूहिक आकांक्षा साकार ताबा क्षण बिसि पाङ्जि । थेसे फेबा विचार व्हा ग्यालठिपा कुर्बा बिमा फिरि रेसि नाम्सला सामूहिक फेल्गेबादा प्राथमिकता पिन्तोबारि बाङ पिन्जि । ‘समुदाय डिक्जि बिसाम गुम्बा जेक्खे आहिन सडक, ल्हुइथाङ, ग्युइसेर मोक्कोन थुमरि चमत्कार म्राङ्ला’ थेसे पाङ्जि ।

खिम्जे जोङ सिन्धुली, सुनकोसी–१ ला जनप्रतिनिधि छेडुप मोक्तानसे फेल्गेबाला गति तीव्र स्ह्रुगमा ङ्हाच्छा वाङ्चिबा म्राङ्सि ताङ्बा व्यक्त लाजि । स्थानीय लोप्खाङ गणेश माध्यमिक लोप्खाङला प्रधानाध्यापक तिर्थलाल मोक्तानसे ज्याबाम्हान्बा सेमताम थान्बा मुबा । दाछोकला व्हनाग्याम पेमा वाङ्ज्यु मोक्तानसे डेन सेमताम थान्जि । गेताङला सञ्चालन बिजबहादुर भोम्जानसे लाबा मुबा बिसाम देबराज मोक्तानसे चोहोदान लाबा मुबा ।

(छिगकि दोनः ग्युइसेर– शिक्षा, तापाग्रेन– मंसिर, काप्तोनछेन– विशेष समारोह, ग्रेन्पो– प्रमुख, फेल्गेबा« विकास, ग्रादाङ– जानकारी, ह्रोमि– सदस्य, आडुप्बा– अभाव, ब्रल्चिबा– सम्बन्धि, दोन्ता– उद्देश्य, खेडोब– अध्ययण, उन्पाङजि– जनाए, फेल्ना लाबा– फैलाएको, चाङ्मा– पवित्र, ग्यालठिपा– राजनीतिक, दाछोक– समिति, व्हना– तर्फ)