सर्लाही । नेपाल तामाङ घेदुङ बागमती नगर दाछोकसे सोनाम ल्होछारला दुइसाङरि ग्रेन गेताङ आयोजना स्हेङ्गे लाबा मुला ।

स्योमि जोम्नाछेन ङ्योइसाङ लासि खाबा तापा ६ गते सोनाम ल्होछारला दुइसाङरि तामाङ घेदुङ बागमतीसे ग्रेन गेताङ आयोजना लासेला उन्पाङ्बा हिन्ना । मुतेबा दिङह्राङ सोनाम ल्होछारला दुइसाङरि बागमती नगरपालिकाला भरत ग्योइलिङसे ङोसेबा बागमती तारङा ग्योइ पाङ्ग्यालरि तामाङ घेदुङसे ग्रेन रिमठिमकि गेताङ लासेला थुछापा संजय भ्लोन (एसके)से पाङ्जि ।

चु दिङ तापा ५ गते सोनाम ल्होछार परतिबा मुला । तामाङ समुदायसे छार दिङला स्ह्रुगरि दाङ्बा सोनाम ल्होछार चु दिर्ङ सापुख्रि ल्होदा बिदाइ लासि ता ल्होदा डेन लासि दाङ्बाकेन मुला । तामाङ समुदायला ग्योइ, हिगि, गोइलो, संस्कार रिमठिमकि ख्युरछ्या थेन ल्हेछ्या ताना लाबा दोन्ताला छ्याम नेपाल तामाङ घेदुङ बागमती नगर दाछोकसे क्योङ दिङ सोनाम ल्होछार प्रिबा दाङ्सिकेन खाबा हिन्ना ।

ल्होछारला दुइसाङरि आयोजित गेताङरि ग्याल्साङ ओसेम स्थानीय कलाकारजुगुला प्रस्तुती तासेला नेपाल तामाङ घेदुङ बागमती नगर चोहो रोशन लामासे ग्रादाङ पिन्जि । गेताङरि कलाकारजुगु फुलकुमार बोम्जन, विशाल काल्तान, सुमिना लो, रेश्मा बम्जन, उर्गेन दोङसे ह्राङ्ह्राङ्ला व्हाइ कोसेला मुला । छ्यामरि, चर्चित मोडलजुगु याङ्गी दोङ, रिया लामा थेन स्थानीय कलाकारला नोन प्रस्तुती तासेला थेसे पाङ्जि ।

११ बुम १५ तोङ्जा ल्हागतिसेला आन्मान लाबा चु गेताङरि तामाङ समुदायला उद्योगी, छोङ्नापाला छ्याम चु समुदायदा चेगाइ लाबा व्यक्तित्वजुगुग्याम ह्रो किन्सेला आयोजकसे उन्पाङ्बा मुला । चुह्राङ्बा गेताङसे चु समुदायला दोङराप म्हाइबा, ख्युरछ्या लाबाला छ्याम ग्योइ थेन रिमठिमला ख्युरछ्यारि टेवा दोसेला नेपाल तामाङ घेदुङ बागमती नगर दाछोक गाउराइ चन्द्रबहादुर जिम्बाला पाङ्बा मुला ।

चु समुदायला हिगिला छ्याम दोङरापरि म्राङ्बा विविधतादा सुताइ स्ह्रुगगिरि बाबारि चु सङ्गठनसे गे लाबा थेसे पाङ्जि । सोनाम ल्होछारदा छार दिङला स्ह्रुगरि दाङ्बा तामाङ समुदायसे चु रे ह्राङ्बिमा ग्रेन दिमथेमेग्याम तार टिका थेन मोलक किन्सि ओसेम ज्याबास्हे चासि दाङ्बा परम्परा मुबा घेदुङला चोहो लामासे पाङ्जि ।

(छिगकि दोनः दाछोक– समिति, स्योमि– पत्रकार, जोम्नाछेन– सम्मेलन, तापा– माघ, उन्पाङ्बा– जनाएको, ग्योइलिङ– ताल, रिमठिमकि– सांस्कृतिक, थुछापा– संयोजक, स्ह्रुग– रुप, ख्युरछ्या– संरक्षण, ल्हेछ्या– प्रबर्धन, दोन्ता– उद्देश्य, प्रिबा– पर्व, ग्याल्साङ– राष्ट्रिय, ग्रादाङ– जानकारी, बुम– लाख, तोङ्जा– हजार, छोङ्नापा– व्यवसायी, चेगाइ– माया)