सिन्धुपाल्चोक । बागमती प्रदेश सरकारला थुङ्क्युइ, ऊर्जा ओसेम सिँचाइ ब्लोन माननीय कृष्णकुमार तामाङसे तापा ४ गते मेलम्ची नगरपालिका वडा नं. ११ ला फट्टेरि स्होइ लाबा पक्की पुलला सम्भाव्यता खेडोबला लागि ग्लाला अनुगमन लाबा मुला । अनुगमनरि मेलम्ची नगर ग्रेन्पो आइतमान तामाङ, स्यानग्रेन्पो उमा प्रधान ओसेम वडाचोहोतेन ल्होलो टोली मुबा । जनहित ओसेम फेल्गेबा स्हेङ्बा गेरि निरन्तर प्रतिबद्ध जनप्रतिनिधिजुगुला सक्रियताला छ्याम थे पुल स्होसेला सम्भावना कोङ्बा हिन्ना ।

ब्लोन तामाङला काठाक्बारि पुल स्होबाला तिताङ रेम न्हाङरि सम्भाव्यता खेडोब (Feasibility Survey) तिनि हेन्सेन प्राविधिक टोलीसे तिबा मुला । चु खेडोबसे पुलला उपयुक्त ग्ला, डिजाइन ओसेम प्राविधिक तिलोला नुप्बा विश्लेषण लासि परियोजनाला सफल कार्यान्वयनला लागि ग्यालाम उन्सेला मुला ।

ग्लाला अनुगमन लिच्छा ब्लोन तामाङसे पुल स्होबाला लागि तिनिला निरीक्षण ओसेम सम्भाव्यता खेडोबला तिबाला छ्याम मेलम्चीला स्थानीय बासिन्दा थेन जनप्रतिनिधिजुगुरि ताङ्बा ओम गाबोला वातावरण स्हेङ्सेला पाङ्जि । थेसे चु परियोजनासे मेलम्चीला ङ्हाउदान सुदृढीकरण थेन ह्युल्बाला केवास्तर थिग्युनरि महत्वपूर्ण योगदान तासेला विश्वास व्यक्त लाजि । छ्यामरि, पुल स्होमा यातायात, छोङ थेन सामाजिक ब्रेल्बादा कोङ्ना लासिकेन मेलम्ची नगरपालिकाला मुतेबा फेल्गेबा प्रक्रियारि छार युगला तिचुबा धारणा थान्जि ।

नगर ग्रेन्पो आइतमान तामाङसे फट्टे पुल स्होमा मेलम्चीला लागि गर्वला नुर ताबा उल्लेख लाबान चुसे स्थानीय ह्युल्बाला पहुँच सहज स्होबा थेन रेदाङ्सेला केवारि सकारात्मक प्रभाव परतिसेला पाङ्जि । थेला आन्सार चु परियोजनासे मेलम्ची जेक्खे आताना क्योङ सिन्धुपाल्चोक जोङ्ला फेल्गेबारि कोशेयुङ्बा सावित तासेला मुला । पुल स्होबाला छ्याम यातायातरि सहुलियत, पर्यटन ल्हेछ्या थेन स्यान्दो फेल्गेबाला सम्भावनाजुगु ठ्वाङ्सेला अपेक्षा नोन थेसे व्यक्त लाजि ।

ग्रेन्पो प्रशासकीय अधिकृत निमेष मिश्रसे स्थानीय ह्युल्बाला सक्रिय बोकिन्बा थेन ह्रो आरेना खाजिबाइ नोन महत्वपूर्ण परियोजना सफल ताबारि आखाम्सेला उल्लेख लाबान मोक्कोनदा पुल स्होबा प्रक्रियारि यातेन्बारि आग्रह लाजि ।

तिनिला ग्लाला अनुगमन गेताङरि स्यानग्रेन्पो, वडा नं. ८, ९, १० थेन ११ ला वडाचोहोजुगु, ङ्हाउदान फेल्गेबा काठाक्खाङ हेटौंडाला प्राविधिक टोली, सुरक्षाकर्मी, यान्पाङमि, समाजसेवी, बौद्धिक व्यक्तित्व ओसेम स्थानीय बासिन्दाजुगुसे तोतेबा बोकिन्बा मुबा ।

(छिगकि दोनः ब्लोन– मन्त्री, खेडोब– अध्ययण, ग्रेन्पो– प्रमुख, फेल्गेबा– विकास, काठाक्बा– निर्देशन, तिताङ– प्रारम्भिक, रेम– चरण, तापा– पुस, तिलो– पक्ष, गाबो– उत्साह, ङ्हाउदान– पूर्वाधार, थिग्युन– सुधार, ब्रेल्बा– सम्बन्ध, तिचुबा– सुरुआत, ल्हेछ्या– प्रबर्धन, यातेन्बा– हातेमालो, स्यानग्रेन्पो– उपप्रमुख, काठाक्खाङ– निर्देशनालय)