सिन्धुपाल्चोक ८ ड्वाफ्रे । मेलम्ची नगरपालिका न्हाङरि मुबा लोप्खाङजुगुरि लिच्छाला दुइरि ग्युइसेरला गुणस्तररि उल्लेख्य थिग्युन ताबा नगर ग्रेन्पो आइतमान तामाङ पाङ्बा मुला ।

श्री शीतलादेवी माध्यमिक लोप्खाङला ६५ छा दिङ्साकाप्तोन गेताङरि सुङरे ह्राङ्ला धारणा थान्बान नगर ग्रेन्पो तामाङसे ग्युइसेर नोन समृद्ध समाज स्हेङ्बाला मेरुदण्ड ताबा उल्लेख लाजि । थेसे ग्युइसेररि लाबा लगानी खाइमाइ खेरो आनिसेला धारणा व्यक्त लाबान नगरपालिकासे लोप्खेनजुगुला उज्ज्वल लिउ स्हेङ्बाला लागि ग्युइसेरकि ङ्हाउदान फेल्गेबा, प्रविधिमैत्री शिक्षण ओसेम गुणस्तरीय लोप्बारि खाजिबाइ कञ्जुस्याइँ आलाबा पाङ्जि ।

नगर ग्रेन्पो तामाङसे खाबा रेरि झन प्रभावकारी ग्युइसेरकि गेताङजुगु सञ्चालन लासेला प्रतिबद्धता सुताइ उन्पाङ्जि ।

लोप्खाङ डिछ्याना दाछोकला चोहोला चोहोदानरि स्योल्बा गेताङरि स्यानग्रेन्पो उमा प्रधान, वडा नं. ५ ला वडाचोहो राजु रायमाझी, वडा नं. ९ ला वडाचोहो किरण दीप खड्का, वडा नं. १० ला वडाचोहो अमृत खनाल, ङ्हाच्छाला वडाचोहो भक्तबहादुर खड्काला छ्याम लोप्बोन, अभिभावक, लोप्खाङ डिछ्याना दाछोकला पदाधिकारी ओसेक स्थानीयवासीजुगुला उल्लेखनीय ङोन्मुबा ।

(छिगकि दोनः ग्युइसेर– शिक्षा, थिग्युन– सुधार, दिङ्साकाप्तोन– वार्षिकोत्सव, सुङरे– शुक्रबार, लिउ– भविष्य, ग्युइसेरकि– शैक्षिक, ङ्हाउदान– पूर्वाधार, फेल्गेबा– विकास, उन्पाङ्बा– जनाएको, डिछ्याना– व्यवस्थापन, दाछोक– समिति, स्योल्बा– सम्पन्न, स्यानग्रेन्पो– उपप्रमुख, ङोन्मुबा– उपस्थिति थियो)