सुनसरी ३०–३१ ड्वाफ्रे । नेपाल तामाङ संघ, कोशी प्रदेशला गिक्छा जोम्ना नेपाली कांग्रेसला ग्रेनगाउराइ गगन थापाला ग्रेनडोन्बोरि सुनसरीला इटहरीरि भव्य लिरि ताजि ।

तामाङ सेलो, डम्फु स्याबा थेन तामाङ गोइलो क्वान्सि तामाङकादेसे जोम्नारि बोकिन्बा मुबा ।

गेताङरि ग्रेनडोन्बो गगन थापासे तामाङ समुदायला सांस्कृतिक सम्पदा, ग्योइ थेन ङोसेबा ख्युरछ्यारि राज्य थेन समुदाय गुङरि ह्रोगे लातोबा तामरि बाङ पिन्जि । थेसे तामाङ समुदायला योगदानदा डेन लासि खाबा रेरि ङामग्याम्से ह्रोगे लासेला ग्रान पिन्जि ।

जोम्नारि प्रदेशनाङ ग्याम प्रतिनिधिकादेसे उल्लेखनीय बोकिन्बा मुबा । गेताङरि छार नेतृत्व दाम्बा, संगठन सुदृढीकरणला योजना थेन सामाजिक विकासरि समुदायला भुमिकादा प्रभावकारी स्होबा नुररि नुप्बा काठुइ लाबा मुबा ।

जोम्नासे सुवास मोक्तानदा निर्विरोध निर्वाचित लाबा मुला । छार कार्यसमितिला ह्रोचोहोकादेरि रोहित तामाङ, पदम तामाङ थेन जामेकोलाग्याम कोपिला तामाङदा दाम्बा मुला ।

कार्यसमितिला गाउराइरि देवेन्द्र तामाङ, छ्यागाउराइकादेरि पासाङ तामाङ, प्रिति तामाङ मुला ।

कार्यसमितिला ह्रोम्किादेरि यज्ञ प्रसाद बल, अपिल लामा, मनिराज तामाङ, युवराज तामाङ, किशोर तामाङ, कुमार तामाङ, मदन स्याङ्बो, बहादुर तामाङ, कृष्ण बहादुर तामाङ, निर्मल तामाङ, धनबहादुर तामाङ, चन्द्रबहादुर तामाङ, दिनेश तामाङ, सुमिर बम्जान, मनोज तामाङ, बहादुर तामाङ, प्रेम कुमार तामाङ, दिनेश तामाङ, डेनि तामाङ, आकाश ब्लोन तामाङ, शिवराज तामाङ दाम्बा मुला ।

कोशी प्रदेशला चोहोरि ह्राङ्दा दाम्माहेन्से सुवास मोक्तानसे बिजि, ‘नेपाल तामाङ संघ, कोशी प्रदेशला संगठ कोङ्बा स्होबाला छ्याम तामाङला याङ्ताम थेन ङोसेबाला लागि ङाइ सक्रिय भुमिका क्लाङ्सेला मुला । संघरि इमानदार थेन मेहनती कार्यकर्तादा नेतृत्वरि बाबा ग्रान पिन्ना ।’