नुवाकोट । ककनी गाउँपालिकासे तामाङला माउलिक ग्युइल थेन रिमठिमला ख्युरछ्या थेन ल्हेछ्याला लागि ल्होलो गेताङकादे स्हेङ्बा मुला ।

गाउँपालिकाला न्होर ओसेम प्राविधिक ह्रोरि ओम जोङ लघु उद्यमी गेन्दुन, नुवाकोटला ङ्योइसाङरि ङिसरेला तालिम पिन्बा हिन्ना । तालिमरि तामाङ जातला परम्परागत स्याबा, गोइलो, साव्हाइ, ह्रोल्ज्याङ, रिमठिम थेन संस्कृतिजुगुफिरि व्यवहारिक थेन सैद्धान्तिक ग्युइ पिन्बा मुबा ।

दिनिरे जिन्बा गेताङरि नेपाल सरकारला ङ्हाच्छाला गाउराइ वेगेन्द्र शर्मा पौडेलसे तामाङला माउलिक रिमठिमसे नेपाली ङोसेबादा समृद्ध स्होबा बिसि पाङ्जि । थेसे चुह्राङ्बा गेताङसे स्थानीय स्तररि रिमठिम सोना छार्ना लाबारि महत्वपुर्ण योगदान पिन्सेला सेमताम थान्जि ।

गेताङरि ककनी गाउँपालिकाला चोहो सुमन तामाङ ‘सज्जन’से पाङ्जि, ‘ह्याङ्ला समुदाय न्हाङरि लाबा ल्हानान साइ मुबा सांस्कृतिक सम्पदाला ख्युरछ्या लाबारि चुह्रङ्बा गेताङकादे तोमुला ।’ गाउँपालिकासे चुह्राङ्बा पहलदा सातान प्राथमिकतारि थान्सेला चोहो तामाङसे पाङ्जि ।

तालिमरि प्रयोग ताबा बार्बुकादे डम्फु १५ थान, टुङ्ना १ थान, गोइलो म्रिङ्कोला थेन ह्रेमकोला लासि १६ थान रिमठिम गेदुङला ककनी चोहो कमल तामाङदा पिन्बा मुबा ।

तालिमरि लोप्बोनकादेसे ह्राङ्से लोप्बा तामाङला स्याबा, व्हाइ, गोइलो थेन रिमठिम उन्बा मुबा । बोकिन्बाकादेसे चुह्राङ्बा गेताङसे ह्राङ्जुगुदा ह्राङ्ला समुदायफिरि गौरव लाबारि प्रेरणा पिन्बा बिसि पाङ्जि ।

गेताङरि गाउँपालिका ह्रोचोहो मिठुमाया लामासे चुह्राङ्बा तालिमसे जामेकोला थेन छारिब्योनकादेदा खाइबा स्होबाला छ्याम ह्राङ्ला ङोसेबा फिरि गर्व लाबा छोरुवा पिन्सेला ताम थान्जि । थेसे लिउरि नोन चुह्राङ्बा गेताङदा थेनआथान्ना बोर्सेला ग्रान पिन्जि ।

ङिसरे दोना संचालन ताबा तालिमरि नेपाल तामाङ घेदुङला पासाङ मोक्तानसे सहजीकरण लामुबा ।

(छिगला अर्थः ग्युइल– कला, रिमठिम– संस्कृति, ख्युरछ्या– संरक्षण, ल्हेछ्या– प्रबर्धन, जोङ– जिल्ला, गेदुङ– संघ, साव्हाइ– लोकगीत, ह्रोल्ज्याङ– संगीत÷बाजागाजा, दिनिरे– आईतबार)