हेराङला स्योमिदा एआई, गुगल टुल्स थेन डुप्बा स्योनाम सम्बन्धी तालिम
हेराङ । डिजिटल मिडिया फाउन्डेशन थेन नेपाल स्योमि गेन्दुनछेन, हेराङ शाखासे संयुक्त ङ्योइसाङ लाबा डुप्बा स्योनाम, डिजिटल स्योनाम थेन एआई सम्बन्धी तालिम जिन्बा मुला । हेराङला हिमायलन होटलरि सुङरे ताबा तालिमरि जोङ्ला २५ म्हे सक्रिय स्योमिदा थे तालिम पिन्बा हिन्ना ।
थे दुइसाङरि गेताङला ग्रेनडोन्बो ओसेम च्याङ्नारि पारिश्रमिक निर्धारण समितिला चोहो संगीता खड्कासे प्रविधिला फेल्गेबातेन स्योमिला नोन प्राविधिक ग्युइ ताबारि जरुरी मुबा ताम थान्जि । चोहो खड्कासे तामासोर ब्रिबाला छ्याम डिजिटल प्रविधिला प्रयोग सम्बन्धित ग्युइ ताबारि जरुरी मुला बिसि पाङ्जि । प्रविधिला ग्युइसे तामसोर ह्रुप्बारि सहजता पिन्बा बिसि थेसे छार जेक्खे आहिन, खेबाः स्योमिकादेसे नोन प्रविधिला प्रयोग लासि तामसोरकक्षदा अझ प्रभावकारी स्होबारि खाम्सेला पाङ्जि ।
तालिमला प्रशिक्षक प्रवेश सुवेदी थेन उमेश श्रेष्ठ मुबा । थेन्से प्रविधिला प्रयोग, अनलाईन स्रोत थेन एआई प्रयोग खाराङ्लासि लासे बिबा सन्दर्भरि स्योमिकादेदा प्रशिक्षण पिन्जि । प्रशिक्षणला ताङरि प्रशिक्षक सुवेदीसे डुप्बा स्योनाम थेन दाते डिजिटल प्रविधि ओसेम थेला टुल्सफिरि स्योमिकादेदा जानकारी पिन्बा मुबा । थेसे स्योमिसे ग्रा किन्बा थेन पिन्बारि तिगा खाराङ्बा गुगल टुल्स प्रयोग लासे बिबा सन्दर्भरि स्योमिकादेदा जानकारी पिन्जि । थेह्राङ्नोन लासि डुप्बा स्योनामला लागि खाराङ्लासि नुर रेन्बा थेन नुप्बारि खाराङ्लासि दोसे बिबा सन्दर्भरि सुवेदीसे स्पष्ट लाजि ।
चुह्राङ्नोन लासि स्यान्दो प्रशिक्षक उमेश श्रेष्ठसे दातेला दुनियाँरि सोसि प्रविधिला प्रयोग लातोबा थेन प्रविधिदा ह्रोला लिरि किन्मा तामसोर ह्रुप्बा थेन तथ्य जाँचरि देबाः तासेला पाङ्जि ।
गेताङरि इन्टरनेशनल अलर्टला प्रतिष्ठा थापासे स्योनामदा प्रभावकारी स्होबारि ह्राङ्निसे तलिमरि ह्रो लाचिबा थेन न्हाङ्गारला रेरि नोन चुह्राङ्बा गेताङ लासेला पाङ्जि ।
नेपा स्योमि गेन्दुनछेन, हेराङ शाखाला चोहो रामहरी कार्कीसे डिजिटल मिडिया स्योनाम तालिमला कारण स्योनामला क्षमता ल्हेबाला छ्याम सामाजिक पोबारि स्योनामला भुमिका महत्वपुर्ण तासेला पाङ्जि । जोङरि क्रियाशील स्योमिदा डिजिटल प्रविधिफिरि छार नुरस्हेला फिरि जानकारी पिन्बाला लागि तालिमला ङ्योइसाङ लाबा थेला सेमताम मुबा । प्रविधिला फेल्गेबाला छ्याम यान्पाङस्हेग्याम थेन यान्पाङम्हि नोन थेनोन लिरि ङ्हाच्छा वाङ्तोबा वास्तविकतादा च्यासि वाङ्तोबा थेसे पाङ्जि ।
यरोपियन युनियनला न्होर ह्रो, इन्टरनेश्नल अलर्टला प्राविधिक ह्रोरि तालिम ताबा मुबा । गेताङरि बोकिन्बा स्योमिकादेसे कार्यशालालिच्छा ल्हानान प्राविधिक ग्युइ याङ्बा बिसि पाङ्बा मुबा ।
(छिगला अर्थः हेराङ– ललितपुर, स्योमि– पत्रकार, डुप्बा– खोज, स्योनाम– पत्रकारिता, गेन्दुनछेन– महासंघ, सुङरे– शुक्रबार, सुङरे– शुक्रबार, जोङ– जिल्ला, म्हे– जना, च्याङ्नारि– न्यूनतम, फेल्गेबा– विकास, खेबाः– पुरानो, ग्रा– सूचना, नुर– विषय, नुप्बा– गहिराई, देबाः– सहज/सजिलो, यान्पाङस्हेग्याम– संचारमाध्यम, यान्पाङम्हि– संचारकर्मी, न्होर– आर्थिक)
तपाईको प्रतिक्रिया दिनुहोस