खाइमा ङाला स्हुला केबा ताजि, ङाइ चुदा आउदिन सावधानी लासि न्हाजि ख्वाजि, ग्रेन चेगाइ थेन ज्याना लासि च्याजि ।
ओम, ङाला स्हु मुतेबा छोन्बो स्हेजुगुला ह्राङ ल्हेबारि चुजि, छोबा थेन जेबा तासि अनौठो आनन्दसे प्लिङ्बा ।
ङानि गिसेम गिलम चेगाइ लामुबा । ङाला स्हु थेन ङा ङान्ना ख्यारख्युरला जाम्बुलिङ्दा चेगाइ लामुबा तिल्दाबिसाम स्हुला सेमरि दया मुबा ओम ङाला सेमरि स्हुला लागि दया मुबा ।
खाइमागि ङानि ताम पाङ्मुबा– ङाला स्हु थेन ङा । ङान्ना खिम्जेजुगु ह्राङ्ला झ्यालजुगुरि चिसि ङान्ना ह्वाइ ङ्यान्मुबा तिल्दाबिसाम ङान्ना ह्वाइ समुन्द्र बिमा नुप्बा तामुबा ओम ङान्ना काइजुगु विचित्र डान्बाजुगुसे प्लिङ्बा मुबा ।
खाइमागि ङाला स्हु थेन ङा छ्याम नोन ब्रामुबा म्हिजुगुसे ङान्दा चेगाइ प्लिङ्बा दृष्टिसे च्यामुबा ओम आउदिन ज्याबा काइरि ताम लामुबा । थेह्राङ्बा म्हिजुगु नोन मुबा, थेन्से ङान्दा इष्यासे प्लिङ्बा दृष्टिसे च्यामुबा तिल्दाबिसाम स्हु याखारगि ज्याबा ताम मुबा ओम ङादा स्हुफिरि अभिमान मुबा ।
तासाइ लिच्छा ङाला स्हु सिजि, खाराङ्लासि छोन्बोस्हेजुगु सिला ओम दारे ङा सोच विचार लाबाला लागि गिक्खे ताबा मुला ।
तिन्हाङ्गार खाइमा ङाइ ह्राङ्ला ह्वाइ कोला, ङाला खिम्जेजुगु ङ्यान्बारि आखा ।
खाइमागि ङा सडकरि थोन्ना, ङादा खालाइसे आच्या ।
जेक्खे, ह्राङ्लान ङ्हुबारि ङाइ काइजुगु थेला, खाल्से दया उन्सि बिला, ‘स्हिगोम, उ थे म्हि, थेदा स्हु सिबा मुला ।’
(छिगला अर्थः स्हु– दुःख, खिम्जे– छिमेकी, नुप्बा– गहिरो ।)
तपाईको प्रतिक्रिया दिनुहोस