खाइमामि मधेस खाइमामि भोट
खाल्छेगा म्राङ्लाइ प्राङ्बोला चोट...।
‘साइलाबाको होटल’रि ब्लाङ्दार आले ह्राङ्लान सुररि ह्वाइ कोसि ताङ म्याप्चिमुबा । थेदा पुलिस खाबा नोन थाहा आतानि । खालाइसे ग्याप पट्टिसे हापहोप चुङ्जि । ओसो फ्लिक दोसि च्यामाम पुलिसगा चिम । तिल्दा थेदा चुङ्जि थेसे तिलाइ गोआखाम्नि । साबुनला फिज सोक्खे मुबा या ख्रुबारि बाङ लाबागेन मुबा, पुलिससे या फ्याङचुङ्सि डुइसि बोर्सि भेनरि युजि । दोप्त (सहु) दाए भेनरि युसि चौकीरि दोना लाजि ।
‘एला मिन तिला ?’ पुलिस अफिसरसे यारि काडि ल्हिक्पान ङ्योइजि ।
‘ब्लाङ्दार ब्लोन ।’ साबुनला बोप्स्या ज्याना आहार्चिबा या ङ्हि छ्यापबापन आलेसे पाङ्जि ।
‘बादर...?’ तामाङ छिक आगोबासे पुलिस अफिसरसे थेला मिनदा ज्याना लासि उच्चारण लाआखाम्नि ।
‘आहिन ब्लाङ्दार ।’ आलेसे या न्हाइसिकेन दोसि पाङ्जि ।
दोसिन थेला मिनदा पुलिस अफिसरसे ज्याना लासि उच्चारण लाआखाम्नि ।
‘दिङ कादे ?’
‘दिङ कु वाइगे लाजि ।’
‘एला होटलरि गे लाबा कादे ताजि ?’ बिजा बुमो उत्थान गेन्दुनला प्रतिनिधिसे होटल दोप्दादा ङ्योइजि ।
‘दिङ गि ।’
‘बिजा बुमोदा गेरि युला आदे बिबा थाहा आरे ?’ पुलिस अफिसरसे दोप्दादा काडिनाङ छेप्सिन ख्लाजि ।
‘माफ लाला स्हिगो । चाआम्याङ्बा लाइनु मुबा ।’ होटल दोप्दासे बिजि, ‘चुसेन क्रासि क्रासि गे ह्रिबा हिन्ना । ङाइ ज्यालारि ठगप लाबा आरे । ला सिमाइ दाङ्से पिन्बा लामुला । चाबा, क्वान्बारि नोन लेबाफेबा लाबा आरे ।’
‘बाल श्रम शोषण लासि ग्रेन ताम लाला ।’ बिजा बुमो उत्थान गेन्दुनला प्रतिनिधिसे मिल ग्लोङ्लाह्राङ लासि दोप्दादा च्याजि ।
‘हिन्बान दोप्दाला ख्योल्बा (गल्ति) आरे ।’ आलेसे बिन्ति न्हाजि, ‘चु साहु ङाला आपातेबान मुला ।’
‘कुटिसि चिउ...।’ पुलिस अफिसरतेन बिजा बुमो उत्थान गेन्दुनला प्रतिनिधिसे गिक्खे काइसे थेला ब्ला क्लोक चाजि, ‘जातुकु तासि....।’
दारे बिजा बुमोदा गेरि युसाम बाल श्रम शोषण अन्तरगत कानुनि कारबाहि लासेला ब्योहोराला कागजगरि सहिछाप लापुङ्सि होटल साहुदा चुपाल्छेदा तिर्याम माफि पिन्जि । होटल दोप्दा छोङ्खानरि दोजि ।
‘दारे ङा खान निसे ? तिला चासे ? खान म्हेर्से ?’ आलेसे ह्राङ्ला देन्बा स्हु (पिडा) ब्यक्त लाजि ।
‘दिमरि निउ ।’ पुलिस अफिसरतेन बिजा बुमो उत्थान गेन्दुनला प्रतिनिधिसे काइगिरि पाङ्जि ।
‘आपा आमा खालाइ आरे । ङा जाजा मुमान डोङ्बा ।’
‘दिम आरेसाम सडकरि निसि ह्रिसि चाउ । थेरिन म्हेर्गो ।’ पुलिस अफिसरसे बिजि ।
‘गे लासि चाबारिचा आताबा । बिजा याङ्ताम (बालअधिकार) हनन ताबा । ह्रिसि चाबारिचा ताबा ?’ आलेसे क्राबान ङ्योइजि ।
‘चु कानुनी ताम हिन्ना ।’ बिजा बुमो उत्थान गेन्दुनला प्रतिनिधिसे पाङ्जि ।
ब्लाङ्दार आले ठानाहेन्से थोन्सि गेम्हाइबारि निजि । जातुकु बिसि खालाइसे थेदा गे आपिन्नि । म्हेर्बा ग्ला, चाबा स्हे आयाङ्बासे दारे बोरा थोसि सडक सडक कोर्बा चुजि ।
तिलाइ रेलिच्छा हेन्से ह्राङ्ह्राङ्बान ह्रोजुगुला संगतरि सडक कुनिरि चिसि ड्रेनड्राइड प्लास्टिकला झोलारि युसि फुइबा चुजि । पुलिस अफिसर थेन बिजा बुमो उत्थान गेन्दुनला प्रतिनिधिसे थेदा कादे रेम म्राङ्साइ आम्राङ्माह्राङ लासि चु सडक ब्राचिजि ।
तपाईको प्रतिक्रिया दिनुहोस