थर्बु ४ नम्बर नाम्सा, थेरि स्ह्योला दिनि बाकादेरि टल्कप ताबारि दोमा मु पिङ ताबा जेक्खे आहिन, तिगाइ सेमकादे नोन ह्याल तामुबा । चुनोन ह्युलरि ब्रासिकेन डोबारि निमुबा दीप्ति– लोप्डा ब्रेला लोप्पोन, ब्लाबा सेम, कल्पनारि ताङ्बा ।
लोप्खाङला खेबा भवन, थेरि झ्यालसे बिमा म्रापसे ल्हाना ह्याल बाङ्ना लामुबा, थेन्हाङरि याखारगि केटो मुबा– बासु । लोप्डा ब्रेला लोप्पोन थोनोन । दीप्तिसे डोबारि ओते सेम आलामुबा तासाइ ग्योइकाइ छ्योइ, व्हाइखा थेन आङ्सि स्होबा तामरि नुप्बा सेम थान्मुबा । थेसे खाइमाइ म्हान्बा आरेमुबा कि खाजिबाइ रे थेसे ब्रिबा व्हाइखासे खालाइला केवारि चोदे नुप्बा प्रभाव पारतिसेला मुला ।
बासु बिसाम दीप्तिला ठीक लिसो– शान्त, गम्भीर थेन डोबारि अब्बल । थे याकार चिबा, च्याङ्ना ताम पाङ्बा थेन ल्हानाह्राङ्बा कापीरि तिगाइ न्हा तिगाइ ब्रिचिबा । थेला मिरि याखारगि तोसोला नुप्बा मुबा, थेसे दीप्तिला सेम डुइमुबा ।
ङ्यासे, दीप्ति मि चिमचिम लासि डायरीरि ब्रिचिबा मुबा–
‘थेला मौनता खाजिबाइ प्राबा सन्नटा आहिन,
ङाला सेमरि ङ्ह्याबा मधुर व्हाइ हिन्ना ।’
न्हाङ्गारदाङ्से नेपाली लोप्खेनसे लोप्डा गे पिनस्ह्युजि– ‘ङाला सेमला राप’ क्राछिगरि ब्रिताम ब्रिबारि । तासाइ, दीप्तिसे याखारगि जाजाबा व्हाइखा ब्रिजि, ‘छिगकादेला ज्याबाथाङसे प्लिङ्बा कागज ।’ थेरि थेसे खालाइला मौन उपस्थितिदा ह्राङ्ला सेमरि थान्बा मुला । थेसे थे ब्रिताम कापीला लिच्छाला पानारि ब्रिजि ओम थेनोन पाना बासुला कापीन्हाङरि थान्जि । तिगाइ आबिनि । तिगाइ अपेक्षा नोन आलानि ।
बासुसे नोन तिगाइ आबिनि । ह्रेङ्बा दुइदोना कुटिसि चिजि । तासाइ थेसे ङ्हीछा रे दीप्तिदा ह्राङ्लान यासे स्होबा जाजाबा कागजला म्हेन्दो पिन्बा मुबा– ताम आपाङ्ना पिन्बा चेगाइला गिक्छा चिन्ह ।
थेरि जाजाबा छिगरि ब्रिबा मुबा :
‘छिगरि चेगाइ आवाङ ताला तासाइ एसे ब्रिबा व्हाइखासे ङादा थुर्बा मुला ।
– बासु !’
थे रेकुनुहेन्से याखारगि फेबा मौनता बुजि थेनि ङ्हीला गुङरि । न्हा चेगाइ चलप ताजि, न्हा प्रस्ताव थान्जि । तासाइ, खाइमा दीप्तिसे बासुदा च्यामुबा, थेसे ह्राङ्ला सेम डोबा छोर्मुबा ।
दुइसे गाथा ब्रिचिजि ।
बोर्ड परीक्षा खाजि ओम थे अबोध चेगाइ ह्राङ्ह्राङ्ला ग्यालाम फेसि ब्राजि । दीप्ति शहररि निजि । बासु नाम्सारिन चिजि, लोप्खेन दोजि ।
दिङ्छा थाल्जि । दीप्ति दारे परिपक्व म्रिङ्कोला दोजिन्बा मुबा– लोप्खेनला लिरि ह्राङ्ला नामरि फुल्बा । तिरेकुनु, जोङ ग्युइसेर गेदिमग्याम थेदा याखारगि जाजाबा नाम्साला लोप्खाङरि सरुवा लाजि ।
‘मिरिक उच्चतर माध्यमिक लोप्खाङ ।’
लोप्खाङरि दोमा, खेबा भवन तिगाइ छार म्राङ्जि तासाइ तिगाइ स्हे ओस्बान मुबा– थे शान्त वातावरण ओम खेबा लोप्खाङ्ला ज्याबाथाङ ।
‘प्रिन्सिपल सर खानाङ मुस्ह्युला ?’ थेसे ङ्योइजि ।
याखारगि लोप्खेनसे ज्युमङेसि पाङ्जि, ‘उथेरि मुस्ह्युला ।’
थेसे म्राप ठ्वाङ्जि । प्रधानाध्यापकला कोठारि दोमा कुर्सिरि चिबा म्हि दाराप्चि– थे बासु मुबा ।
ङ्हीनोन ह्रेच्छाक अचम्मरि परतिजि तासाइ मिसे ङोसेबारि आम्लेनि ।
दिप्तिसे ङेसिकेन पाङ्जि, ‘एसे दातेनोन व्हाइखा ब्रिला ओम ?’
बासुसे काइ जाजाकि ल्हिबाह्राङ् लासि पाङ्जि, ‘थे एसे पिन्बा गिक्छा व्हाइखाह्राङ्बान... दातेनोन सेम न्हाङरि खानाङए सुरक्षित मुला ।’
ह्रेच्छाक मौनता ल्हेजि ।
दोसि बासुसे गोल्छेसे पाङ्जि, ‘एदा थाहा मुला ? थे व्हाइखा ङातेन दातेदोना मुला । एसे ब्रिबा गिक्छा चेगाइ ।’
दिप्ति ङेजि, ‘थे चेगाइमि थे दिङह्राङ्बान पालेआरेबा मुबा, आहिन ओम ?’
बासुसे झ्याल माङ्ग्यार च्यासि पाङ्जि, ‘पालेआरेबा स्हेनोन सायद क्योङ्बिमा नुप्बा तालाम्हाले, आहिन ओम ?’
दीप्ति ज्युमङेजि, ‘थे एसे पिन्बा कागजला म्हेन्दोह्राङ्बान म्हाबा तामतेन खानाङए लासि चिबा मुसिम ।’ चोदे बिसि दीप्तिसे काइ गम्भीर स्होसि पाङ्जि– ‘तिल्दाबिसाम थे ङाला गिक्छा चेगाइला डान्बा मुबा ।’
थे रेकुनुहेन्से लोप्खाङला गार्डेनरि दोसि गोरि ङ्ही क्रिप ब्राबारि चुजि– खाइमा व्हाइखा डोसिकेन, खाइमा कुटिसि दिनि दुसिकेन ।
केवा दोसि तिजि– थेन्ना मौनता नोन सम्वाद मुबा, छिगबिमा क्यार, तिङ्बिमा नुप्बा । छार दिङरि, खेबा सेमला छ्याम ।
मिरिक, दार्जिलङ, भारत ।
(छिगला अर्थः चेगाइ– माया/प्रेम, लोप्डा– कक्षा, लोप्पोन– विद्यार्थी, खेबा– पुरानो, आङ्सि– चित्र, नुप्बा– गहिरो, केवा– जीवन, याकार– एक्लै, तोसो– किसिम, प्राबा– चर्को, लोप्खेन– शिक्षक, लोप्डागे– कक्षा होमवर्क, राप– कथा, क्राछिग– शीर्षक, ब्रिताम– लेख, बुबा– पलाउनु, नाम– पेशा, फुल्बा– समर्पित । जोङ– जिल्ला, ग्युइसेर– शिक्षा, गेदिम– कार्यालय, लोप्खाङ– स्कूल÷विद्यालय, दिङ– उमेर, पालेआरेबा– निर्दोष)
दोःबा : यकिना अगाध
तपाईको प्रतिक्रिया दिनुहोस