ङाला आमासे खाइमा ख्राङ्गाला गाप्दारि
फोसि कारस्ह्युमुबा
आइराक तेस्ह्युमुबा
फापारला आलुम स्होस्ह्युमुबा
ख्राङ्गारि दाज्र्यु पोमुबा ।
थेलिच्छा
ल्होछार खामुबा
नाम्सा दिमरि फेबा ताङ्बा खामुबा
न्हानजुगुरि छामे ब्योनजुगु
डम्फुरि दोहोरी सेलो कोमुबा
आखे मामजुगु फापारे भाका कोमुबा
ह्राङ्ह्राङ्ला सेमला भावना देप्बा लामुबा
पोङरि जि आइराक तामुबा
कु ब्लासि स्यामुबा ।
खाइमा गोल्छेसे ल्होछार
नाम्साहेन्से याम्बुरि ताङ्बारि चुजि
केसिकेन निजि आधुनिक पेङ्दोर्जेजुगु
स्याम्बारि चुजि
बाहुराष्ट्रिय कम्पनीसे झिलिमिली ल्होछार ।
थेलिच्छा
म्लेजि
आमासे स्होस्ह्युबा साङाला आइराक
फापारला आलुम
रुस्लान थेन भोट्काला तालरि
नाम्साला चेगाइ बिमा
याम्बुला नाङ ज्याबा छोर्बारि चुजि
ह्राङ्ला ख्राङ्गारि पोबा लुङ्दार दाज्र्यु
टुँडिखेलरि पोबारि चुजि ।
म्लेजि
आखेसे कोबा फापारे भाका
पेङदोर्जेला तामाङ सेलो व्हाइ
म्लेजि
ह्राङ्ला ग्योइ, रिमठिम
केसिकेन निजि
आधुनिक माइच्याङ्जुगु
लुङ्गी थेन आङरेला बो
गाङ्साल डेबा गाउनरि ज्योबारि चुजि
ओम देःबान
म्हेपिन्जि
ह्राङ्ला सुसारे मामला राप
रिन्जेन दोर्जेआखेला काइरान
तिनि
डम्फु बिमा ल्हाना
ङ्ह्याबारि चुजि आधुनिक ड्रम सेटजुगु
थेलिच्छा स्याबारि चुजि
सेम छ्योदे
आधुनिक पेङ्दोर्जेजुगु
आधुनिक माइच्याङजुगु ।
दोःबा : यकिना अगाध
तपाईको प्रतिक्रिया दिनुहोस