प्रसिद्ध उद्योगपति धनबहादुर सेढाई कोभिडसे छोङ्नाम छापछोप न्होङ्माहेन्से सडकरि दोजि । थेसे थेलिच्छा नोन कोशिस आलाबा आहिन लाबा मुबा तासाइ नोन सफल ताबारि आखाम्नि ।

ताङसे कोला चाङ, जामे म्हाजुगु थारेङ ताबारि चुजि बिसाम म्रिङ्जासे नोन थेकुनु हेन्से थेदा अघोषित लिरि ख्लाजि । जामाकुनु धनबहादुरला गोर ङ्हिन उद्योग लिलामरि क्रेबा मुबा ।

खान्दामा ग्याम्सेन बहिस्कृत थेन तिरष्कृत तातोमाहेन्से धनबहादुरसे सिबा तोसो लासि नारायणी स्योङला चामरि निजि । जामाकुनु नारायणी स्योङरि ग्रेन होन खाबा मुबा । थे फल छेप्बारि चामला कुनिरिक्यार गोङ्मा ल्हेबाकेन लामा खालाइसे थेला ङ्हाच्छा खासि ग्यालाम काजि ।

‘ह्राङ धनबहादुर सेढाई आहिन ?’ गिक्खे सुटेड बुटेड म्हिसे ङ्योइजि । धनबहादुर तिगाइ दुइ कोल्जि । 
‘ङाइमि ह्राङ्दा ङोआसेनि ले !’ थेसे बिजि ।

‘ङा इन्स्योरेन्स कम्पनीला मार्केटिङ अफिसर रत्नदास श्रेष्ठ । ङान्छे ह्राङ्दा ल्हानान म्हाइजि, तासाइ आस्याप्नि । ह्राङ्ला मिनरि पचास लाखला चेक स्होबा मुला, किन्बारि ज्योन्गाउ होइ ।’ चोदे बिसि रत्नदास ह्राङ्ला ग्यालाम दाङ्जि ।

धनबहादुर ङ्हाच्छारिम आश्चर्यरि परतिजि तासाइ लिच्छा ह्राङ्से इन्स्योरेन्स लाबा डान्जि ।

थेलिच्छा सिबारि निबा धनबहादुर फ्लिकदोसि दिमरि खाजि । झोलारि क्वानतेन छ्याम तोबा मुतेबा स्हे युजि । इन्स्योरेन्स कम्पनीरि निसि चेक किन्जि ।

धनबहादुरसे पचास लाख चेक इन्स्योरेन्स कम्पनीग्याम किन्बा थाहा तामाहेन्से दिमम्हेसे थेदा म्हाइजि । कोला ङ्ही नोन आपासे कारोबार लाबा बैंकदोना दोजि । बैंक कर्मचारीसे धनबहादुर ङ्हीरे ङ्हाच्छा जेक्खे बैंकरि चेक युबारि खाबा गा पिन्जि ।

तासाइ धनबहादुर खानाङ नोन आस्याप्नि ।

२०८२/०२/१९
(छिगला अर्थः छोङ्नाम– व्यवसाय)

दोःबा : यकिना अगाध