याम्बु २८ तापा । नेपाल थेन फिह्युलरि मुबा थिङ तामाङ समुदायला गोछापाजुगुला उल्लेखनीय बोकिन्बारि थिङ थेमेला गिक्छा ग्याल्साङ छोबा याम्बुरि ऐतिहासिक स्ह्रुगरि स्योल्बा मुला । गेताङ ङ्हीरे दोना ताबा मुबा ।

चु छोबासे थिङ तामाङ समुदायदा साझा ङोसेबा, दोङराप, रिमठिम थेन वंशीय एकताला सूत्ररि खिसि गेन्दुनकि ल्हामला ऐतिहासिक गे चुबारि ह्रोलाबा आयोजकजुगुसे पाङ्बा मुला ।

साङ सेर्केम लासि गेताङ चुबा मुबा । गेताङ लाप्ताबा नारायण सिंह थिङ तामाङला ग्रेनडोन्बोरि ताबा मुबा । गेताङरि गिक्छा रेम ‘थिङ थेमे’ तामाङ व्हाइ सार्वजनिक लाबा मुबा । व्हाइसे थिङजुगुला ङोसेबा, रिमठिम थेन एकताला सशक्त सन्देश प्रवाह लाबान भावनात्मक स्होबा मुबा ।

गेताङरि वडाचोहो वीरबल तामाङसे थिङजुगु ठुङ्बा बोल्काङ थुमरि स्हेङ्गे लाबा थिङ ङार्दिमला दीर्घकालीन योजना प्रस्तुत लाबा मुबा । थेसे थिङ तामाङला दोङराप थेन ङोसेबादा गेन्दुनकि स्ह्रुगरि जगेर्ना लाबारि चु अभियान तोबा उल्लेख लाजि ।

तामाङ खेडोब प्रतिष्ठानला चोहो ओसेम समाजशास्त्री डा. मुक्त सिं लामासे प्रस्तुत लाबा प्रतिवेदन आन्सार तामाङ जात न्हाङरि दाते ११३ गोर ह्रुइ मुला । थे गुङ्ला मोक्कोन बिमा ल्हाना जनसंख्या थिङजुगुला मुबा थेन क्योङ तामाङ जनसंख्याला ९.८९ कारग्या हिस्सा थिङ ह्रुइला मुबा महत्वपूर्ण तथ्य सार्वजनिक लाबा मुबा ।

थिङ थेमेला ह्रोमि उदय थिङ तामाङसे थिङ थेमेला दोङराप, रिमठिम, परम्परा थेन वंशावली ब्रेल्चिबा दातेदोनाला अनुसन्धान थेन खाबा रेला खेडोब योजनाफिरि विस्तृत प्रस्तुति थान्बा मुबा । ब्रिखेन निष्णु थिङ तामाङसे प्रस्तुत लाबा अवधारणास्योसे गेन्दुनला लिउला छो स्पष्ट लाबा मुबा । ग्रेन्पो ख्युरछ्यापा सोम थिङ तामाङसे गेन्दुनला विधान प्रस्तुत लाबान संगठनात्मक संरचना थेन गेछो सार्वजनिक लाजि ।

छोबासे मिङमार थिङला चोहोदानरि ५१ ह्रोमिकि केन्द्रीय गेदाछोक क्योङ्डिक्सि स्होबा मुला । गेदाछोकला वरिष्ठ स्यानचोहोरि अमृत थिङ, स्यानचोहोजुगुरि काजीमान थिङ, डा. कमल बहादुर थिङ, शान्ति थिङ, सोम बहादुर थिङ मुला । ग्रेनगाउराइरि राजकुमार थिङ, स्यानग्रेनगाउराइरि सफलता थिङ मुला । गाउराइजुगुरि वीरबल थिङ, सृजना थिङ, रबिन्द्र थिङ मुला बिसाम न्होरचोहोरि जगत बहादुर थिङ मुला ।

छोबा लिच्छा चिबा केन्द्रीय गेदाछोक चिसाङसे अनुसन्धान थेन कानुनी दर्ता ब्रेल्चिबा गेन्दुनकि गेदा स्यानदाछोक स्होसि ह्रेवाकि रेमरि बोर्बा आप्ता लाबा मुला ।

थिङ थेमेसे तामाङ ग्योइ, हिगि, ज्योस्हेङ, ग्योइकाइ, गोइलो, रिमठिम–रिमठिमकि ऐतिहासिक ओसेम पुरातात्विक सम्पदाला म्हाइबा, ख्युरछ्या थेन ल्हेछ्या लासि थिङजुगुला सोह्रौँ प्रणाली, दस्तावेजीकरण, लिप्यान्तरण विधि ओसेम डारदिमला ख्युरछ्यारि विशेष ध्यान पिन्बा प्रतिबद्धता उन्पाङ्बा मुला । छ्यामरि, नेपाल थेन फिह्युलरि मुबा थिङजुगु गुङरि छ्यागे, समन्वय थेन एकताला चाम स्हेङ्बा दोन्ता व्यक्त लाबा मुला ।

आयोजक गेन्दुनसे छोबा सफल स्होबारि योगदान पिन्बा मुतेबा बोकिन्बा, कलाकार, विद्वान, ग्रोइपा ओसेम जाम्बुलिङनाङ मुबा थिङ थेमेदा थुजेछे फुल्बा मुला । 

(छिगकि दोनः ग्याल्साङ– राष्ट्रिय, छोबा– भेला, फिह्युल– विदेश, गोछापा– प्रतिनिधि, स्ह्रुग– रुप, स्योल्बा– सम्पन्न, गेन्दुनकि– संस्थागत, खेडोब– अध्ययण, गोर– वटा, कारग्या– प्रतिशत, ह्रोमि– सदस्य, ब्रेल्चिबा– सम्बन्धी, गेन्दुन– संस्था, लिउ– भावी, छो– दिशा, ग्रेन्पो– प्रमुख, ख्युरछ्यापा– संरक्षक, गेछो– कार्यदिशा, ह्रोमिकि– सदस्यीय, गेदाछोक– कार्यसमिति, स्यानचोहो– उपाध्यक्ष, दाछोक– समिति, ह्रेवाकि– व्यवहारिक, आप्ता– निर्णय, हिगि– लिपी, ज्योस्हेङ– कला, रिमठिमकि– सांस्कृतिक, ख्युरछ्या– संरक्षण, ल्हेछ्या– संबर्धन, उन्पाङ्बा– जनाएको, छ्यागे– सहकार्य, दोन्ता– उद्देश्य, ग्रोइपा– सल्लाहकार)