गेला ताङरि लिमासोल हेन्से पाफोसरिक्यार निबाकेन ।

छ्याम याखारिगि ह्रोनोन मुबा । निना निना कुल्चिबा गाडिला झ्यालग्याम तिगाइ रोपनी सा हाप्सि स्होबा दुर्साकादे म्राङ्जि । 

ङाइ थाहा मुना मुनान ह्रोला मिन थासि ङ्योइजि, ‘युरि थे तिगा होइ ?’

‘दुर्साकादे’ थेसे चोदे जेक्खे पाङ्जि ।

ओम !

थेलिच्छा ङाइ पाङ्जि, ‘तिगा म्हान्सि मुग्याम । छोन्बो मुदे गिसेम गि गुङरि छेसि केवा पुइजि । दाते च्यागोम मुतेबाम्हे कादे डिक्सि चिबा !’

ङाला तामसे थेला सेम छुजिम । थोम तासि ल्हानान दुइलिच्छा बिजि, ‘यस यु आर राईट ।’

थेसे चोदे बिसि ङाला लिरि प्लिक च्याजि ओम गाडि बाङ्से कुल्बारि चुजि ।

गे जिन्जि ।

थे थेला जाङरिक्यार निजि, ङा ङाला जाङरिक्यार वाङ्जि । चिबा ग्लारि दोमाहेन्से रेरि मोबाइलग्याम खिचतिबा फोटो प्ले लासि च्याजि । भिडियोरि थे दुर्साकादे नोन खाबाला चिम ।

‘दुर्सा’ ह्याङ्से याङ्बा लिच्छाला शाश्वत देन्बा डोङ्बाला प्रमाण हिन्ना बिला ङाइ । ङाइ बिबा ताम देन्बा तातोला बिबा ताम आरे ।

ल्हुइ कोठारि कुर्सीरि गुर्साइ नोन सेम रेरि म्राङ्बा दुर्सा वान कोर्बारि दोजि । कोर्जि, थे दुर्सान्हाङरि तिल्मादोना ङाह्राङ्नोन ताम पाङ्बा, ब्राबा लोभपापरि प्लुम निबा, गिसेम गिरि छेबा बाङ्बा लाबा म्हिकादेन मुबा ।

तिल्मादोना छेबाबाङ्बा, थाबातोबा लाबाकादे कादे ज्याना लासि सोझो लाइनरि कुटिसि म्हेर्चिबा मुला । राइ दोआतोबा, बु बुनआतोबा, ख्रेन्बाफुइबा खाइमाइ ल्हागआतिबा लासि ओम खाइमाइ आरेबा लासि म्हेर्चिबा मुला ।

खानाङचा म्रा फुइबा मुला । खानाङचा ताजा म्हेन्दोला फोलेकादे ङेचिबा मुला । खानाङचा म्रातेन म्हेन्दो फुइसि म्हेन्दो सारचिबा मुला । सेम छेमनिना कोर्चिबा मुबा ।

तिक्खुरि काइ खाजि– ‘खाला हिन्ना ए ?’

‘ङा खालाइ आहिन । जेक्खे म्हि हिन्ना । ङादा चु ग्ला छुग निजि । थेतासि च्याबारि खाबा हिन्ना ।’

‘ओम ह्राङ्जा खाला ओम ?’

‘ङा दुइ !’

‘ए !’

‘दुइसे नोन ताम पाङ्ला ओम ?’

जाकि छोर्सि– ‘ए सेम दोसिमाम कोर्बारि खाम्ला बिसाम ङा दुइसे ताम पाङ्बारि आखाम्बा ताला ?’

मौनता न्हान्जि । सेम ब्लाप्सि मुसिम । दोसि खाजि ह्राङ्लान ल्हुइ मुबा ग्लारिक्यार । दोलोदोना थर्काप लाबा दुइला बाम क्रेसिमाम ।

सेम–ल्हुइ छ्याम ताजि । केवातेन आफेना खाबा दुर्सा थेन चिसिकेन खाबा दिमकादेला क्योइका लाबारि चुजि । मेहनत थेन पौरखदा ल्याक्पा छेक्सिमाम । ब्यान्बा, छेङ्बा, लुबा लासि तोबा बिमा ल्हाना धन पोप्सि तिल्दा सिबाबाङ लाला म्हिकादे ? थाबाग्याङ्बा, सेबा लासि लुटतिबा धन आताबाचिम दुर्सावानरि । दुर्सा नाम्सा न्हा बैंक म्राङ्जि, न्हा सपिङ महल । जेक्खे कादे साइजला म्हि ताला ओते आकारला दुर्सा जेक्खे म्राङ्जि ।

(छिगला अर्थः हाप्बा– ओगट्नु, म्हे– जना, देन्बा– सत्य, वान– घारी, छेम– मजा, छुग– गज्जब, छेर्बा– झर्किनु, क्योइका– मुल्याङ्कन, सिबाबाङ– मरिहत्ते)

२७ ड्वाफ्रे, २०८२

दोःबा : यकिना अगाध