सिन्धुली २ गोने । बागमती प्रदेश सरकारला न्होरपाह्रोरि सिन्धुली जोङरि चु दिङ गोर ब्लि पक्की पुल स्होसि जिन्सि संचालनरि खाबा मुला । बागमती प्रदेश सरकारला न्होरपाह्रोरि जोङ्ला ग्रामीण थुमला न्हाङ्ला सडकला ल्होलो स्योङरि चु पुलला छ्याम दातेदोना १४ वटा पक्की पुल स्होजिन्बा मुला ।

निबा न्होरपा दिङ २०८१/८२ रि ठेक्का ल्हागाब तासि जिन्बा पक्की पुलरि कमलामाई नगरपालिका– २ चियाबारीला ग्वाङ्स्योङ पुल, घ्याङलेख गाउँपालिका २ ला ठाडीस्योङ पुल, सुनकोशी गाउँपालिका ५ ला सातबिसे भोटेस्योङ पुल थेन कमलामाइ नगरपालिका ४ कुमालफाँट थुइबा ग्वाङ्स्योङ पुल मुबा पुर्वाधार फेल्गेबा गेदिम सिन्धुलीसे ग्रा पिन्बा मुला ।

गेदिम ग्रेन्पो लक्ष्मीप्रसाद सापकोटासे गोर ब्लि पक्की पुल दिङ गिरिन ठेक्का ल्हागाब तासि पाङ्बा दुइबिमा ङ्हाच्छान स्होसि जिन्बा जानकारी पिन्जि । थेसे पाङ्जि, ‘स्होबाकेन लाबा घ्याङलेख गाउँपालिका ३ रि तामाजोरस्योङ थेन सुनकोशी गाउँपालिका ५ रि आरुबोटे स्योङ्ला पक्की पुल जिन्दाम्बा मुला । पुलग्याम गाडी संचालनरि खाजिन्बा मुला, तिगाइ गे जेक्खे लेङ्बा मुला ।’

ग्रामीण थुमला न्हाङ्ला सडकला ल्होलो स्योङरि बागमती प्रदेश सरकारला न्होरपा ह्रोरि पक्की पुल स्होबातेन यातायात संचालन देबाः तासिकेन थेसे पाङ्जि । गेदिमला आन्सार जोङ्ला ल्होलो स्योङरि दातेनोन गोर ब्लि पुल स्होबाकेन मुला । पक्की पुल आरेबासे लामा सेर्खारि जेक्खे यातायात संचालन ताबा ग्रामीण सडकरि पुल स्होबातेन दिङनाङ नोन यातायात संचालन ताबारि चुबा मुला । निबा न्होरपा दिङ गोरसोम पक्की पुल बहुवर्षीय पक्रियारि छार ठेक्का ल्हागाब ताबा मुला ।

निबा न्होरपा दिङ २०८१/८२ रि ठक्का ल्हागाब तासि जिन्बा पक्की पुल गुङ्ला कमलामाई नगरपालिका २ चियाबारीला ग्वाङस्योङला पुल ३ करोड ९० लाख रुपैयाँला लागतरि जिन्बा हिन्ना । चु पुल २०८१ बेल्बो २ गते सिद्धकाली/जीवन जेभीसे सम्झौता लासि स्होबा हिन्ना । घ्याङलेख गाउँपालिका २ ला ठाडीस्योङ पक्की पुल सिर्जना निर्माण सेवासे २०८१ ड्वाफ्रे १४ गते सम्झौता लासि छ्योआछ्यो ६ करोड रुपैयाँरि स्होबा हिन्ना ।

सुनकोशी गाउँपालिका ५ ला सातबिसे भोटेस्योङला पुल जीवन/दाहाल/जयगोरख जेभीसे निबा दिङ बेल्बोरि सम्झौता लासि ३ करोड ६० लाख रुपैयाँला लागतरि स्होबा हिन्ना । कमलामाई नगरपालिका ४ कुमालफाँट थुइबा ग्वाङस्योङ पुल जीवन÷दाहाल÷ जेभीसे निबा दिङ बेल्बोरिन सम्झौता लासि ३ करोड ८६ बुम रुपैयाँ लागतरि स्होसि जिन्बा हिन्ना ।

स्होसि जिन्सि संचालनरि खाबा स्यान्दो पक्की पुलरि कमलामाई नगरपालिका न्हाङ्ला मधुटार ग्वाङस्योङ पुल, कारागार ग्वाङस्योङला पुल, कमला स्योङ भिमान पुल, लुङ्गेलीटार बौलास्योङ पुल, गड्यौलीस्योङ पुल, हरिहरपुरगढी ७ ला क्यानस्योङ पुल, दुधौली नगरपालिकाला पित्लेभन्ज्याङ सडक न्हाङ्ला फेदी कुमराह पुल, तीनपाटन गाउँपालिकाला लङ्गुरस्योङ पुल, फिक्कल गाउँपालिकाला बाक्खुस्योङ पुल थेन सुनकोशी गाउँपालिकाला धोबाीस्योङ पुल मुला ।

स्होबाकेन लाबा पक्की पुलरि हरिहरपुरगढी गाउँपालिका २ थेन ४ दा थुइबा मरिणस्योङ पुल, सुनकोशी गाउँपालिका ६ ला आरुबोटेस्योङ पुल, गोलन्जोर गाउँपालिकाला बारा घोक्सिला पुल थेन घ्याङलेख गाउँपालिका ३ ला तामाजोरस्योङ पुल मुला । बहुबर्षीय प्रक्रियारि छार ठेक्का ल्हागतिबा पक्की पुलरि दुधौली नगरपालिकाला ठाकुरस्योङ पुल, फिक्कल गाउँपालिकाला पौतीस्योङ पुल थेन कमलामाई नगरपालिका १३ ला सुनखानी–मडाहा कमलास्योङ पक्की पुल मुला ।

स्रोत सुनिश्चित आताबा कारण हरिहरपुरगढी गाउँपालिकाला तीनकुने पक्की पुल, कमलामाई नगरपालिका ८ ला पुरानो करकरे सिन्दुरेटार पक्की पुल, हरिहरपुरगढी गाउँपालिका ५ ला चारस्योङ पक्की पुल, फिक्कल गाउँपालिका १ ला सिदालीस्योङ पक्की पुल थेन दुधौली नगरपालिका ५ ला रानीस्योङ पक्की पुल ठेक्का ल्हागतिबारि खाम्बा आरे ।  

(छिगला अर्थः सुङरे– शुक्रबार, न्होरपाह्रो– आर्थिक सहयोग, फेल्गेबा– विकास, ग्रा– सूचना, ग्रेन्पो– प्रमुख, देबा:– सजिलो, बुम– लाख)