याम्बु १६ गोने । बागमती प्रदेश सरकार न्हाङ्ला सानाम थेन पशुज्याबि फेल्गेबा ब्लोन्खाङसे न्होरपा दिङ २०८१/८२ ला गेडिक्लाबा विवरण सार्वजनिक लाबा मुला । ब्लोन्खाङसे २ अर्ब ५० करोड ६४ बुम ६६ तोङ्जा च्योच्योला क्योङ बजेटगुङ्ला ६७.२९ प्रतिशत कार्यान्वयन लाबा पाङ्बा हिन्ना ।

चु दिङ सानाम थेन पशुज्याबि थुमरि ल्हानान संरचनागत सुधार, सानाम्पा लक्षित गेताङ थेन नोइ नियन्त्रण अभियान प्रभावकारी लिरि संचालन लाबा ब्लोन्खाङसे उल्लेख लाबा मुला । प्रदेशला सानाम फेल्गेबा सम्बन्धरि तयार विधेयक २०८० बागमती प्रदेश सभाग्याम पारित ताजिन्बा थेन दाते प्रमाणिकरण लिच्छाला थुमरि मुबा ब्लोन्खाङसे ग्रानाङ पिन्बा मुला ।

चु विधेयक कार्यान्वयनरि खाबातेन मुतेबा दिङ गेग्युलुइ स्होबा झन्झट म्हाबा थेन गेताङ कार्यान्वयनरि देबाः खाबा पाङ्बा मुला । ब्लोन्खाङसे चालु दिङरि २३ वटा छार थेन याखारगि खेबाः गेग्युलुइ डिक्लाबा स्वीकृत लाबा मुला ।

चुतेन साप्तो प्रवाहला पहुँच ल्हेना लाबा ताङरि सानाम थेन पशु साप्तो गेदिम आरेबा जोङजुगुरि साप्तो उइ स्हेङ्बा मुला । निबा दिङहेन्से संचालनरि बाबबा ‘याकार वडा याकार उत्पादन’ गेताङदा काप्सि ल्हेना लासि ब्लोन्खाङसे चु न्होरपा दिङरि २५ वडादा काप्सि ह्रुप्सिकेन क्योङ ७० वडादोना दोना लाबा मुला । 
समुदायरि दानःमुबा खेती प्रणालीग्याम्से वडादा सानाम उत्पादनरि स्होबा दोखाङला छ्याम मुतेबा वडारि ४० बुम रुपैयाँ च्योच्योला साझेदारी ह्रो लापिन्बा ब्लोन्खाङसे ग्रानाङ पिन्बा मुला । पशुज्याबि ओसेम तारङा थुमरि प्राकृतिक थेन गैरप्राकृतिक विपद्ग्याम क्षति ब्योहोरतिबा ३३० म्हे सानाम्पा थेन गोरडु फार्मदा १ करोड २२ बुम रुपैयाँबिमा ल्हाना राहत रकम बोलाबाला छ्याम पशु ल्हुइथाङला थुमरि नोन उल्लखनीय गे ताबा ब्लोन्खाङसे ग्रानाङ पिन्जि ।

पीपीआर नोइ नियन्त्रणला लागि १३ वटान जोङरि सप्ताहनाङ खोप अभियान संचालन लासिकेन १५ बुम बिमा ल्हाना ग्युरादा खोप पिन्बा मुला बिसाम लम्पी स्किन डिजिज लिब्रो ७२ तोङ्जा म्हेमुइरि निशुल्क खोप ल्हागाब लाबा बागमती प्रदेश सानाम थेन पशुज्याबि फेल्गेबाब्लोन प्रकाश श्रेष्ठसे ग्रानाङ पिन्जि । पशुज्याबि नोइ अन्वेषण थेन अनुसन्धानला उद्देश्यसे चितवनला सानाम थेन ह्रि विज्ञान विश्वविद्यालय, रामपुररि ‘बायो सेफ्टी लेभल टु प्लस’ प्रयोगशाला स्हेङ्बा गे स्योल्सि विश्वविद्यालयदा पिन्बा मुला । प्रयोगशाला संचालनरि खाजिन्बा थेन चुसे पशुज्याबिला ल्होलो नोइकादेला सटीक निदानरि ह्रो तानालाबा उल्लेख लाबा मुला ।

चुह्राङ्नोन लासि हेटौंडारि स्हेङ्सि जिन्बा ङ्हे पाउडर प्लान्ट संचालनला तयारी लिच्छाला रेमरि दोबा मुला  । थे प्लान्टसे रेदाङसे ६० तोङ्जा लिटर ङ्हे प्रशोधन लाबा क्षमता थान्ना । दाते डेरि फेल्गेबा गेन्दुनग्याम चुला परीक्षण संचालन ताचिबा मुला । छ्यामरि हेटौंडा ११ रि स्हेङ्सि जिन्बा प्रादेशिक सानाम थोक बजार नोन खाबा गोने १८ गते औपचारिक लिरि पिन्सेला सानामब्लोन प्रकाश श्रेष्ठसे पाङ्जि ।

खाबा न्होरपा दिङ २०८२/८३ ला लागि ब्लोन्खाङसे झान महत्वकांक्षी गेताङजुगु ङ्हाच्छा बाबा मुला । सानाम थुमरि लगानी ल्हेछ्याला लागि १० करोड रुपैयाँ छे सुरक्षण कोष, ५ करोडला सहुलियतपुर्ण ब्याज अनुदान, स्मार्ट सानाम फार्म थेन स्मार्ट पशुज्याबि फार्म स्हेङ्बा, आधुनिक बधशाला स्हेङ्बा थेन जैविक सार कारखानाला निरन्तरह्राङ्बा गेताङ ङ्हाच्छा बाबा मुला । पशुज्याबि थेन तारङा छोङनामदा ल्हेछ्या लाबारि स्टार्टअप ग्रान्टग्याम्से २० करोडला बजेट बिनियोजन लाबा मुला बिसाम सानामदा राहत, छोङ्पा खेती ल्हेछ्या, स्यामो थेन म्हेन्दो स्याम्बा खेती, सानाम बजार ग्रा प्रणाली थेन आधुनिक ग्रिन हाउस स्हेङ्बा ह्राङ्बा गेताङ नोन ङ्हाच्छा बाबा मुला ।

(छिगदोनः सानाम– कृषि,  छिगदोनः शब्दार्थ, ल्हेछ्या– प्रबर्धन, छे– कर्जा/ऋण, ज्याबि– पन्छी, फेल्गेबा– विकास, ब्लोन्खाङ– मन्त्रालय, न्होरपा– आर्थिक, गेडिक्लाबा– कार्य सम्पादन, बुम– लाख, तोङ्जा– हजार, क्योङ– कुल, सानाम्पा– कृषक/किसान, नोइ– रोग, ग्रानाङ– जानकारी, गेग्युलुुइ– कार्यविधि, खेबाः– पुरानो, देबाः सहजता, डिक्लाबा– संशोधन, साप्तो– सेवा, जोङ– जिल्ला, उइ– केन्द्र, दानः– आधार, दोखाङ– लक्ष्य, म्हे– जना, ल्हुइथाङ– स्वास्थ्य, स्योल्बा– समापन, गेन्दुन– संस्था, सानामब्लोन– कृषिमन्त्री, सार– मल, छोङनाम– व्यवसाय, छोङ्पा– व्यवसायी, स्याम्बा– सजावट, ग्रा– सूचना)