याम्बु २४ गोने । यान्पाङ थेन ग्रा प्रविधिब्लोन पृथ्वीसुब्बा गुरुङसे एआईला प्रयोग खाराङ्लासि लाला बिबा तामसे न्हाङ्गारला आदिवासीला लिउ निर्धारण तासेला पाङ्जि । जाम्बुलिङ ग्रा प्रविधिला योनायोना फेल्गेबासे आर्टिफिसियल इन्टेलिजेन्स (एआई)ला फेल्गेबा थेन चर्चा ताबा सन्दर्भरि ब्लोन गुरुङसे चुह्राङ्बा सेमताम थान्बा हिन्ना ।

३१ छा विश्व आदिवासी दिङ्साङला सन्दर्भरि नेपाल आदिवासी जनजाति गेन्दुनछेन (नेफिन)से तिनि याम्बुरि आयोजना लाबा विशेष मुल समारोहदा सम्बोधन लासिकेन दुइआन्सार आदिवासीसे ह्राङ्ला सन्तानदा जाम्बुलिङरि चर्चारि मुबा नुरला खेडोब अनुसन्धनरि ल्हागाब लातोबा पाङ्जि ।

थेसे पाङ्जि, ‘पोसिकेन निबा प्रविधिला फेल्गेबारि ह्याङ्से ह्याङ्ला सन्ततिदा ल्हागाब लातोला ।’

आदिवासीला ङोसेबा बिबा ग्योइ, संस्कार, रिमठिम, गोइलो, थेनिन्हाङ्ला ठिम हिन्ना बिबान चुला ख्युरछ्या आतासाम आदिवासीला ङोसेबा म्हासिनिसेला पाङ्जि । ‘ह्राङ्ला ङोसेबारि गर्व लास्ह्युगो । ह्राङ्ला दिमरि जाजामेदा ग्योइ लोपस्ह्युगो । कादेह्राङ्बा ठिममि दातेदोना स्होबा आरे’, ब्लोन गुरुङसे पाङ्जि, ‘ह्याङ्से आदिवासीला याङ्तामला लागि फेबा ब्लोखाङ, फेबा लोप्खाङतेङ ह्रिजि तासाइ बिमाह्राङ सरकारसे ह्रिबाला सम्बोधन लाबा आरे ।’

गेताङरि आदिवासी जनजाति गेन्दुनछेनला चोहो गोल्जे लामा शेर्पासे ग्रेन आयोजना खाबारि चुमाहेन्से नेपालरि आदिवासीजुगु विस्थापित ताबा दुइ खाबा ताम थान्जि । ‘ह्याङ्ला चौंरी खर्क, ग्यु खर्कजुगुग्याम आदिवासी विस्थापित तातोजि‘, चोहो शेर्पासे पाङ्जि, ‘ख्युरछ्याबा थुम, ग्याल्सा निकुन्जला मिनरि ग्याल्सासे आदिवासीला सा ब्यान्जि । आदिवासी ह्राङ्ला बाप्सा ख्लासि विस्थापित ताबारि बाध्य ताजि ।’

चोहो शेर्पासे याङ्ताम याङ्बाला लागि दोसि मोक्कोन आदिवासी गिक्खे तासि रेतोबा ताम थान्जि ।

गेताङरि ङ्हाच्छाला ब्लोनजुगु शेरबहादुर तामाङ, सीता गुरुङ, थममाया थापामगर, सांसदजुगु सुरेश आलेमगर, दुर्गा राई, नेफिनला ङ्हाच्छाला चोहो पासाङ शेर्पा, ह्युलठिमजोम्नाला ह्रोम्हि जिपछिरिङ लामा, सुनुवार साप्तो समाजला चोहो अमृत सुनुवारतेन स्यान्दो डोन्बोजुगुसे आदिवासीला याङ्तामला लागि गिक्खे तातोबा पाङ्जि ।

चु दुइसाङरि चुननुब्री गाउँपालिका चोहो निमा लामा थेन आदिवासी जनजाति वकिलजुगुला छोक्पा (लाहुर्निप)दा विशेष डेन लाबा मुबा ।

गेताङरि नेफिनला वरिष्ठ स्यानचोहो बुद्ध घर्ती भुजेलसे गेताङला बारेरि ग्रादाङ उन्पाङ्बा मुबा बिसाम ग्रेनगाउराइ दिवस राई थेन स्यानग्रेनगाउराइ रामकृष्ण लामा ब्लोनसे गेताङला सहजीकरण लाबा मुबा ।

मुल समारोह तिबा ङ्हाच्छा आदिवासी समुदायला ल्होलो जातजातिसे ल्होलो झाँकीला छ्याम र्याली उन्बा मुबा ।

(छिगदोनः छा– औं, जाम्बुलिङ– विश्व, लिउ– भविष्य, यान्पाङ– संचार, ग्रा– सूचना, फेल्गेबा– विकास, ब्लोन– मन्त्री, गोने– साउन, खेडोब– अध्ययण, गेन्दुनछो– महासंघ, ङोसेबा– पहिचान, ख्युरछ्या– संरक्षण, याङ्ताम– अधिकार, ब्लोनखाङ– मन्त्रालय, लोप्खाङतेङ– विश्वविद्यालय, ख्युरछ्याबा– संरक्षित, ख्युरछ्याबा– संरक्षित, ग्याल्सा– राज्य, बाप्सा– थातथलो, ह्युलठिमजोम्ना– संविधानसभा, ह्रोमि– सदस्य, साप्तो– सेवा, छोक्पा– समुह, स्यानचोहो– उपाध्यक्ष, ग्रादाङ– जानकारी, उन्पाङ्बा– जनाएको, स्यानग्रेनगाउराइ– उपमहासचिव)