याम्बु ३ ख्रेला । नेपाली कांग्रेस पार्टीला भातृ गेन्दुन नेपाल तामाङ गेन्दुन, याम्बु जोङ गेदाछोकसे मन्जुश्री सम्बत् २८६२ छाला ता ल्हो सोनाम ल्होछारला ज्याबाम्हान्बा किन्बापिन्बा गेताङ भव्य स्ह्रुगरि स्योल्ना लाबा मुला ।

गेताङला ग्रेनडोन्बो नेपाली कांग्रेस पार्टीला केन्द्रीय ह्रोमि ओसेम आदिवासी जनजाति विभाग ग्रेन्पो दिलमान पाख्रिन मुबा बिसाम डोन्बोछेन नेपाल तामाङ गेदुङला केन्द्रीय ह्रोमिगाउराइ बिलाम मुक्तान मुबा । गेताङरि तामाङ गेदुङला स्हेङ्खेन कृष्णबहादुर लामा, ग्रेनदाछोक ह्रोमि शारदा लामा, पार्टीला भातृ गेन्दुनला नेताकार्यकर्ता, तामाङ जातीय लामा, बोन्बो, अग्रज अगुवा, गान्बा ज्योज्योआले ओसेम नानाआङाजुगुसे उल्लेखनीय बोकिन्बा मुबा । गेताङ ल्होलो रिमठिमकि प्रस्तुतिला छ्याम सफलतापूर्वक स्योल्बा मुबा ।

गेताङदा सम्बोधन लाबान ग्रेनडोन्बो दिलमान पाख्रिनसे तामाङ जातिला ल्होछार परम्परागत स्ह्रुगरि ख्रेला शुक्ल ङ्ह्या ओसेम माघे संक्रान्तिरि दाङ्बा लाबा डान्ना लाबान दाते ग्युइ, विज्ञान थेन प्राविधिक दाःनरि चि आन्सार दाङ्मा तिथि–मिति फेबारि दोबा पाङ्जि । थेसे तामाङ समुदायला प्रिबाला लागि ग्याल्साङसे पिन्बा तिरेला बिदा तोतेबा आताबा उल्लेख लाबान स्यान्दो प्रिबा च्योच्यो सार्वजनिक बिदाला डिछ्या तातोबा ह्रिजि । छ्यामरि, नेपाली कांग्रेस पार्टीला दातेला नाछालफिरि चर्चा लाबान पार्टी न्हाङरि तिगाइ अन्तरद्वन्द्व म्राङ्साइ नोन पार्टीला चुनाव चिन्ह कोङ्ह्राबा मुबा स्पष्ट लाजि ।

नेपाल तामाङ गेदुङला केन्द्रीय ह्रोमि–गाउराइ बिलाम मुक्तानसे ङ्हाउरि च्याङ्ना छोक्बासे  लासि दाङ्बा सोनाम ल्होछार तिनि ह्युलला गुगुदोना ग्याल्साला स्रोत–साधन प्रयोग लासि भव्य स्ह्रुगरि दाङ्सिकेन खाबा थेन फिह्युलरि सुताइ तामाङ कलाकारजुगुदा ङ्योइसाङ लासि रिमिठिमकि गेताङ आयोजना ताचिबा पाङ्जि ।

स्हेङ्खेन ह्रोमि कृष्णबहादुर तामाङसे नेपाली कांग्रेस पार्टी न्हाङरि तामाङ गेदुङदा भातृ गेन्दुनला स्ह्रुगरि तेन्बा पिन्बारि २०५४÷०५५ सालहेन्से निरन्तर काइ रेन्बा थेन २०६३ सालरिक्यार प्रक्रिया चुसि २०६६ सालरि औपचारिक तेन्बा याङ्बा ग्रादाङ पिन्जि थेसे तामाङ समुदायसे मुतेबा थुमरि दातेनोन ल्हानान संघर्ष लातोबा नाछाल मुबा उल्लेख लाजि ।

ग्रेनदाछोक ह्रोमि शारदा लामासे ह्राङ क्याम्पस खेडोबा लाचिमा बसन्तपुररि ताबा तामाङ समुदायला ग्रेन छोबाग्याम डोङ्बा नेता गिरिजाप्रसाद कोइरालाग्याम तामाङ गेदुङदा भातृ गेन्दुनला स्ह्रुगरि कापाङ लाबा थाहा याङ्बा डान्बान तिनि थेनोन गेन्दुनला गेताङरि डोन्बो दोसि बोकिन्बारि म्याङ्मा ताङ्बा व्यक्त लाजि ।

गेताङरि डोन्बोजुगु फुलमाया तामाङ, जोङ न्होरचोहो राजेन्द्र बुढाथोकी, राणाबहादुर तामाङला छ्याम ल्होलो नेताजुगुसे सोनाम ल्होछारला ज्याबाम्हान्बा व्यक्त लाबा मुबा ।

(छिगकि दोनः गेन्दुन– संस्था, गेदुङ– संघ, किन्बापिन्बा– आदन प्रदान, जोङ– जिल्ला, गेदाछोक– कार्यसमिति, स्ह्रुग– रुप, स्योल्बा– सम्पन्न, ह्रोमि– सदस्य, ग्रेन्पो– प्रमुख, डोन्बोछेन– विशेष अतिथि, ग्रेनदाछोक– महासमिति, रिमठिमकि– सांस्कृतिक, ख्रेला– माघ, दाःन– आधार, चि– पात्रो, ग्याल्साङ– राष्ट्रिय, डिछ्या– व्यवस्था, नाछाल– अवस्था, कोङ्ह्राबा– सुरक्षित, ह्रोमि–गाउराइ– सदस्य सचिव, ङ्हाउ– विगत, छोक्बा– समूह, फिह्युल– विदेश, रिमठिमकि– सांस्कृतिक, गेन्दुन– संस्था, तेन्बा– मान्याता, ग्रादाङ– जानकारी, नाछाल– अवस्था, खेडोब– अध्ययण, छोबा– भेला, कापाङ– घोषणा)