याम्बु ९ म्हेनिङ । बौद्धनाथ थुम फेल्गेबा दाछोकसे खास्योर थुमला सडक डिछ्याना सहज स्होबाला लागि ट्राफिक प्रहरी वृत्त खास्योरदा ट्राफिक बार्बु ह्रोलाबा मुला । नारे बौद्धनाथ थुम फेल्गेबा दाछोकला चोहो राजकुमार लामासे ग्यार्जा ङ्ही गोर ट्राफिक कोण थेन रिट्र्याक्टेबल बार ट्राफिक प्रहरी वृत खास्योरला गेदिम ग्रेन्पो प्रहरी निरीक्षक शेखरजंग थापादा पिन्बा मुला ।

जेनजी ङ्योलोकला ताङरि खास्योर थुमला सडकरि सडक डिछ्यानाला लागि थान्बा ट्राफिक बार्बु ट्राफिक लाईट छ्यामला बार्बुरि मेदिबा थेन बोफोबाला ङ्यान्दि नष्ट ताबा मुबा ।

ग्यालामरि कुल्बा सवारीजुगुला सहजता, दुर्घट्ना च्याङ्ना लाबा थेन सचेतनाला लागि थे बार्बु पिन्बा बौद्धनाथ थुम फेल्गेबा दाछोकला चोहो राजकुमार लामासे ग्रादाङ लाबा मुला । थेसे थे ट्राफिक डिछ्याना बार्बु ट्राफिक नियमला ङ्यान्बारि ह्रो तानालाबा थेन ट्राफिक जाम ओसेम दुर्घट्ना च्याङ्ना लाबारि ह्रो ताना लासेला विश्वास व्यक्त लाबान पिन्बा बार्बुला उचित प्रयोग लाबारि म्होइजेन लाबा मुबा । बौद्धनाथ थुम फेल्गेबा दाछोकसे खाबा रेरि नोन प्रहरी वृत्त खास्यारतेन यामालो लासिकेन ङ्हाच्छा वाङ्सेला पाङ्जि ।

जेनजी ङ्योलोकला ताङरि ट्राफिक बार्बु ट्राफिक लाइट छ्यामल बार्बुरि मेदिबा थेन बोफोबा ङ्यान्दि नष्ट तामा ट्राफिक डिछ्याना लाबारि असहज तासिकेन खाबा मुबा ।

ट्राफिक प्रहरी खास्योरला गेदिम ग्रेन्पो प्रहरी निरीक्षक शेखरजंग थापासे ह्रालाबादा थुजेछे पिन्बा मुबा । गेताङरि बौद्धनाथ थुम फेल्गेबा दाछोकला गेकाठाक्पा मोहनकुमार तामाङ, दाछोकला ह्रोमिजुगु जानुका भण्डारी श्रेष्ठ, सुरज लामा रुम्बा, पशुपतिनाथ खतिवडातेन ट्राफिक प्रहरीजुगुला राप्किन्बा मुबा ।

गेताङरि ट्राफिक प्रहरी वृत्त खास्योररि सरुवा तासि खाबा प्रहरी उपरीक्षक सन्तोष रोक्कादा डेन लाबा मुबा ।

(छिगकि दोनः थुम– क्षेत्र, फेल्गेबा– विकास, बार्बु– सामाग्री, दाछोक– समिति, नारे– बिहीबार, ग्रेन्पो– प्रमुख, ङ्योलोक– आन्दोलन, ङ्यान्दि– कारण, ग्रादाङ– जानकारी, डिछ्याना– व्यवस्थापन, गेकाठाक्पा– कार्यकारी निर्देशक, ह्रोमि– सदस्य, राप्किन्बा– उपस्थिति)