हेराङ ४ ख्रेला । हेराङला बागमती गाउँपालिका वडा नम्बर–४, प्युटारला खयरघारी थुमकि क्लाङ पाङ्ग्यालरि सोमछा वडाचोहो कप वडा स्तरीय फुटबल प्रतियोगिता ताबा मुला । २८६२ छा सोनाम ल्होछारला दुइसाङरि वडा नम्बर–४, प्युटारला आयोजनारि ख्रेला २ गतेहेन्से चुबा प्रतियोगिता ४ गतेदोना सञ्चालन लाबा मुबा । 

स्थानीय स्तररि क्लाङ्छ्योङला फेल्गेबा लासि बिजाबुमो ओसेम छारिब्योनजुगुदा क्लाङ व्हना आकर्षित लाबा दोन्तासे चु प्रतियोगिता आयोजना लाबा हिन्ना । चु प्रतियोगितारि बागमती गाउँपालिकाला ७ वडा गुङ्ला ६ वडाला टिमजुगुसे बोकिन्बा मुबा । प्युटार यु १४ टिमला छ्याम क्योङ १२ टिमसे बोकिन्बा मुबा । प्रतियोगितासे गाउँपालिका न्हाङरि क्लाङ्छ्योङला वातावरण स्हेङ्बान छारिब्योनजुगुला प्रतिभादा डेन थेन हौसला पिन्बालाछ्याम गिसेमगिरि सद्भाव थेन भाइचाराला फेल्गेबारि टेवा पिन्सेला विश्वास किन्बा मुला । च्याङ्ना बजेटरिन प्रभावकारी थेन ग्रेन गेताङ लाबारि खाम्ला बिबा सन्देश पिन्बारि प्रतियोगिता आयोजना लाबा वडा गाउराइ सरिता तामाङसे ग्रादाङ पिन्जि ।

यु १४ दिङ छोक्बा न्हाङरि सञ्चालन लाबा प्रतियोगितारि प्युटार पी, प्युटार वाइ, वाइार यु, प्युटार टी, माल्टा एफसी, घुसेल एफसी, इकुडोल एफसी थेन गिम्दी एफसी, आश्राङ लासि ल्होलो वडाला टिमजुगुसे बोकिन्बा मुबा ।

प्रतियोगिताला फाइनल क्लाङरि प्युटार फुटबल टिम यु गिक्छा ताबान रु.५५,०००÷– नगदला छ्याम ट्रफी, मेडल थेन प्रमाणस्यो डाबा मुबा । घुसेल फुटबल टिम एफसी ङ्हीछा ताबान रु.३०,०००÷– ओसेम ट्रफी, मेडल थेन प्रमाणस्यो डाबा मुबा ।

माल्टा फुटबल टिम एफसीसे सोमछा ताबान रु.१५,०००÷– छ्यामरि ट्रफी, मेडल थेन प्रमाणस्यो डाबा मुबा ।

व्यक्तिगत विधाव्हना कृष्ण घलान उत्कृष्ट स्ट्राइकर थेन दिपेन्द्र संजेल उत्कृष्ट गोलकिपर घोषित ताबा मुबा । थेन्छे म्हिदाङ्से रु.५,०००÷– नगद पुरस्कार याङ्बा मुबा । घुसेल फुटबल टिम एफसीसे अनुशासित टिमला उपाधि डाबान रु.५,०००÷– नगद पुरस्कार याङ्बा मुबा । 

गेताङ बागमती प्रदेशला ङ्हाच्छाला क्लाङ्छ्योङ ब्लोन मिनकृष्ण महर्जनला ग्रेनडोन्बोरि ताबा मुबा । थेसे बागमती गाउँपालिका क्लाङ्छ्योङ सम्भावनासे प्लिङ्बा थुम ताबा उल्लेख लाबान चुग्याम ग्याल्साङ क्लाङमि उत्पादन तातोबा ताम थान्जि । ‘खानाङ क्लाङमि उत्पादन ताला, थेरिन ख्युरछ्या आतामा प्रतिभा म्हाबा नाछाल म्राङ्ला’, थेसे पाङ्जि ।

विशेष डोन्बो जोङ समन्वय दाछोक, हेराङ्ला ऋषिदेव फुयालसे च्याङ्ना बजेटरि नोन वडा स्तरग्याम क्लाङमिला सेम ल्हेना लाबारि उल्लेखनीय गे ताबा पाङ्जि । लो हेराङ्ला छारिब्योनजुगुला म्हाङ थोबा गिक्खे फुटबल पाङ्ग्याल फेगेल्सिकेन निबा उल्लेख लाबान खाबा रेरि नोन ह्रो लासेला प्रतिबद्धता उन्पाङ्जि ।

गेताङला वडाचोहो रामकुमार लामादा चोहोदानरि ताबा मुबा । थेसे ह्राङ्ला वडान्हाङरि लासि चिबा छारिब्योनजुगुला प्रतिभा ङोसेसि पी, वाइ, यु, टी, ए, आर लासि ६ गोर टिमला ९६ म्हे क्लाङमिदा व्यक्तिगत व्हनाग्याम क्लाङ्छ्योङ गोइलो (युनिफर्म) बोठाजि । छ्यामरि, यु १३ दिङ दाछोकला क्लाङमिजुगुदा प्रोत्साहन लिस्ह्रुग म्हिदाङ्से रु.३,०००÷– नगद पुरस्कार पिन्जि । थेसे चुह्राङ्बा गेताङ निरन्तर जारी चिसेला प्रतिबद्धता व्यक्त लाजि ।

गेताङरि बागमती गाउँपालिका चोहो वीरबहादुर लोप्चान, जोङ समन्वय दाछोक ह्रोमि दिनेश घोरासाइँने, वडा नम्बर–२ माल्टाला वडा चोहो रामबहादुर ब्लोन, वडा नम्बर–३ भट्टेडाँडाला वडा चोहो नमराज खड्कातेन स्यान्दोकादे दाराप्बा मुबा ।

गेताङरि थुछापा दिपक लामासे प्रतियोगिता सफल स्होबारि ह्रोलाबा क्योङ तिलोदा थुजेछे व्यक्त लाबान प्रतियोगितासे वडा न्हाङ्ला ल्होलो दिङला क्लाङमिजुगुला क्षमता ङोसेसि लिउरि उत्कृष्ट क्लाङमि उत्पादनरि महत्वपूर्ण योगदान पिन्सेला विश्वास व्यक्त लाजि ।

(छिगकि दोनः हेराङ– ललितपुर, ख्रेला– माघ, थुमकि– क्षेत्रीय, क्लाङ– खेल, पाङ्ग्याल– मैदान, क्लाङ्छयोङ– खेलकुद, फेल्गेबा– विकास, बिजाबुमो– बालबालिका, व्हना– तर्फ, दोन्ता– उद्देश्य, ग्रादाङ– जानकारी, छोक्बा– समूह, ब्लोन– मन्त्री, ग्याल्साङ– राष्ट्रिय, क्लाङमि– खेलाडी, ख्युरछ्या– संरक्षण, नाछाल– अवस्था, दाछोक– समिति, ग्रेन्पो– प्रमुख, लो– दक्षिण, उन्पाङ्जि– जनाए, गोर– वटा, म्हे– जना, लिस्ह्रुग– स्वरुप, ह्रोमि– सदस्य, दाराप्बा– उपस्थिति, थुछापा– संयोजक, तिलो– पक्ष, लिउ– भविष्य)