कास्की । नेपाल आदिवासी जनजाति स्योमि गेन्दुनछेन (फोनिज) ला संघीय दाछोकला सोमछा क्योङ चिसाङ कास्की जोङ्ला कालाबाङ होमस्टेरि स्योल्जि । लक्की चौधरीला चोहोदानरि २०८२ तापा ४ गतेहेन्से ङ्हीरेदोना चलतिबा चिसाङसे ११ बुँदे कापाङस्यो जारी लाबान नेपाल स्योमि गेन्दुनछेनलिब्रो ह्युलनाङ ङ्योलोक लाबा तयारी लाबा मुला ।
चिसाङसे नेपाल स्योमि गेन्दुनछेनला छेजोमछेनसे पिन्बा म्यान्डेट आन्सार स्हेङ्खेन चोहो सत्यनारायणबहादुर श्रेष्ठ ब्रेल्चिबा नुररि तोच्चास्तरीय खेडोब दाछोक आस्हेङ्बा ओसेम स्हेङ्खेन कापाङ आलाबाफिरि गम्भीर आपत्ति उन्पाङ्बा मुला । थे प्रक्रिया तत्काल ङ्हाच्छा आबोर्साम रेमदाङ्से ह्युलनाङ ङ्योलोकरि थोन्सेला चेतावनी फोनिजसे पिन्बा मुला ।
चिसाङसे फोनिजकर्मीला लागि ग्याल्साङ कार्यशाला, जोङ चोहोजुगुला ग्याल्साङ छोबा, आमाग्योइ स्योनाम ब्रेल्चिबा स्यानह्युल जोम्नाछेन, स्योमि क्षमता अभिवृद्धि गेताङ ओसेम फेलोसिप गेताङला छ्याम ल्होलो गेताङ सञ्चालन लाबा आप्ता सुताइ लाबा ग्रेनगाउराइ समीर बलामीसे पाङ्जि ।
दाते फोनिजला ह्युल ओसेम फिह्युलरि लासि ९७ गोर दाछोक मुला बिसाम क्योङ ४ तोङ्जा ५ ग्यार्जा ६४ म्हे स्योमि फोनिजरि आवद्ध मुला ।
फोनिजला संघीय दाछोकला चिसाङसे तापा ४ थेन ५ गते गण्डकी प्रदेशग्याम जारी लाबा कापाङस्यो :
१. निबा यान्दे २३ थेन २४ गते जेनजी छारिब्योन पुस्ताला ङ्योलोकला ताङरि यान्पाङ स्हेग्याम थेन यान्पाङमिफिरि ताबा आक्रमण दुःखद मुला । ह्राङ्बाङ प्रेसफिरि चुह्राङ्बा घटना नुब्ना लासि प्रेसफिरि जिम्मेवार दोबारि क्योङतिलोतेन चु चिसाङ आग्रह लाला ।
२. २०८२ तापाग्रेन १९ गते रिपोर्टिङला ताङरि तेह्रथुम जोङ म्याङलुङ –८ फोनिज तेह्रथुम जोङ चोहो बबीता राईफिरि ताबा आक्रमण थेन खाजिबाइ स्योमिफिरि ताबा आक्रमणफिरि चु चिसाङ भत्र्सना लाला । आक्रमण लाबाफिरि छानबिन लासि बोकिन्बादा हदैदोना कारबाहीला लागि प्रशासनतेन ह्रिला । स्योमिदा निर्वाद तामसोर ब्रिबा वातावरण स्हेङ्बा थेन क्योङ प्रेस ह्राङ्बाङकिला सुनिश्चित्ताला लागि सोम नोन तहला सरकार ङोन्छाङ चु चिसाङ आग्रह लाला ।
३. श्रमजीवी स्योमिला लागि निर्धारण लाबा च्याङ्ना पारिश्रमिक मोक्कोन यान्पाङ गेन्दुनजुगुरि लागू लाबा थेन श्रमजीवी स्योमिसे लाबा स्वरोजगारमूलक मिडियाला ख्युरछ्या, ल्हेछ्या थेन फेल्गेबारि ठोस योगदान लाबारि सोमनोन तहला सरकार ङोन्छाङ चु चिसाङ ह्रिला ।
४. आमाग्योइरि तेबाः ओसेम प्रसारित यान्पाङ स्हेग्यामला नाछाल दयनीय मुबासे यान्पाङ स्हेग्याम ओसेम थेरि गेलाचिबा आमाग्योइला स्योमिला क्षमता ल्हेना, यान्पाङस्हेग्यामला न्होरकि ल्हेछ्याला लागि सरकारतेन चु चिसाङ ह्रिला ।
५. प्रेस काउन्सिल नेपालसे लाबा स्योस्यो वर्गीकरण मूल्याङ्कनरि आदिवासी जनजाति समुदायसे सञ्चालन लाबा स्योस्योला वर्गीकरणरि लेबाफेबा आलाबारि चु चिसाङ ध्यानाकर्षण लाला । थेह्राङ्बा लेबाफेबादा योनान डिक्लाबारि चु चिसाङ ह्रिला ।
६. ह्रोमि संख्या थेन संगठनला हिसाबसे नेपाललान ग्रेन स्योमिला संगठन हिन्ना फोनिज । नेपाल सरकारला यान्पाङ ओसेम ग्रा प्रविधि ब्लोनखाङग्याम्से स्योमिखिबा गेदुङ गेन्दुनदा बेनान दिङ पिन्बा अनुदान रकमरि फोनिजदा तेन्बा ह्रेवा थेन डिछ्या लाबारि चिसाङ ह्रिला ।
७. नेपालला ह्युलठिम २०७२ से आदिबासी जनजातिला हकहितला लागि सुनिश्चित लाबा डिछ्या–संघीयता, क्योङ समावेशीता, समानुपातिक डिछ्या, धर्म निरपेक्षता, स्वायत्तता, विशेष थुम, ख्युरछ्याबा थुमला कार्यान्वयनला लागि कानुन स्होसि लागू लाबारि चु चिसाङ ह्रिला ।
८. प्रदेश १ रि जारी ङोसेबा ङ्योलोक, मुकुमलुङ थेन खुवालुङ काक्ता वार्ता थेन संवादला स्हेग्यामग्याम समाधान म्हाइबारि सरकार थेन सम्बद्ध तिलोतेन चु चिसाङ आग्रह लाला ।
९. नेपाल स्योमि गेन्दुनछेनला स्हेङ्खेन चोहो सत्यनारायणबहादुर श्रेष्ठ मुबा तथ्य स्पष्टन मुला । गेन्दुनछेनला छेजोमछेनसे कार्यदल स्होसि खेडोब लासि निष्कर्षरि दोसेला बिसाइ नोन दातेदोना प्रगति ताबा आम्राङ्बासे छेजोमछेनला म्यान्डेट आन्सार योनान खेडोब टोली स्होसि काक्ता छिम्बारि गेन्दुनछेनतेन चु चिसाङ आग्रह लाला । आहिन्साम फोनिज ताङ्खिसि ङ्योलोकरि निबा कापाङ लाला ।
१०. गण्डकी प्रदेश न्हाङ्ला पोखरा महानगरला पोखरा कोरुवा दिङ २०२५ सफल ताजिन्बा मुला । खाबा रेरि नोन चुह्राङ्नोन लासि चु थुमला निरन्तर पर्यटकीय फेल्गेबा ल्हेछ्याला लागि चुर्ला पर्यटकीय, धार्मिक, रिमठिमकि फेल्गेबाला छ्याम कालावाङ ओम होमस्टे, ल्हथुम पर्यटकीय फेल्गेबाला ल्हेछ्या लाबारि सोम नोन तहला सरकारतेन चु चिसाङ ह्रिला ।
११. नेपाल आदिवासी जनजाति स्योमि गेन्दुनछेन (फोनिज) ला सोमछा संघीय क्योङ चिसाङदा सफल ताना लाबारि ह्रोलाबासे गण्डकी प्रदेश सरकार, पोखरा महानगरपालिका, फोनिज गण्डकी प्रदेश दाछोक, कास्की जोङ दाछोक, कालाबाङ घरेडी सामुदायिक होमस्टेतेन स्यान्दोदा चु चिसाङ थुजेछे फुल्ला ।
(छिगकि दोनः कापाङस्यो– घोषणापत्र, स्योमि– पत्रकार, गेन्दुनछेन– महासंघ, दाछोक– समिति, तापा– पुष, ङ्योलोक– आन्दोलन, छेजोमछेन– महाधिवेशन, ब्रेल्चिबा– सम्बन्धी, नुर– विषय, खेडोब– अध्ययण, उन्पाङ्बा– जनाउनु, रेमदाङ्से– क्रमबद्ध, ग्याल्साङ– राष्ट्रिय, स्योनाम– पत्रकारिता, स्यानह्युल– अन्तर्राष्ट्रिय, जोम्नाछेन– सम्मेलन, आप्ता– निर्णय, यान्पाङ– संचार, स्हेग्याम– माध्यम, यान्पाङमि– संचारकर्मी, तिलो– पक्ष, ह्राङ्बाङ– स्वतन्त्र, ह्राङ्बाङकि– स्वतन्त्रता, ख्युरछ्या– संरक्षण, ल्हेछ्या– संबर्धन, फेल्गेबा– विकास, नाछाल– अवस्था, न्होरकि– आर्थिक, ह्रोमि– सदस्य, डिछ्या– व्यवस्था, ह्रेवा– व्यवहार, ब्लोनखाङ– मन्त्रालय, ह्युलठिम– संविधान, काक्ता– समस्या, छिम्बा– समाधान)
तपाईको प्रतिक्रिया दिनुहोस