काभ्रे । बनेपा नगरपालिका वडा नं. ४ नाला भुइचालो गाङरि ३० फिट नोबा बुद्धला कु स्हेङ्बा मुला । माङ्ग्यार थेन न्हाङ्ला पर्यटन ल्हेछ्याला लागि बुद्धला कु स्हेङ्बा हिन्ना ।
नाबिङरे थे बुद्धला कुरि ह्राप्ने लाबा थेन ठ्वाङ्सेन लाबा हिन्ना । बनेपा नगरपालिका वडा नं. ४ ला वडाचोहो श्यामसुन्दर श्रेष्ठसे कुदा गाप्बा क्वान तेसि ठ्वाङ्सेन लाबा हिन्ना । बौद्ध धर्मआन्सार लामासे कुला ह्राप्ने लाबा मुबा ।
चु कु स्होबा गेरि वाङ्बा सत्यमान लामाला आन्सार कु स्हेङ्बाला लागि ४० लाखते न्होर खर्च ताबा मुला । चु न्होर चन्दा ह्रिसि ह्रुप्बा थेसे पाङ्जि । पर्यटकीय ग्ला नगरकोटला टारि पर्यटक आकर्षण लाबाला लागि कु स्हेङ्बा थेसे पाङ्जि । ‘छ्यामरि अवतार च्युइला ब्रम्हाला क्योङकदला कु सुताइ मुबासे धार्मिक सहिष्णुता ताला बिसि बुद्धला कु स्हेङ्बा हिन्ना’, थेसे पाङ्जि ।
भुइचालो गाङदा धार्मिक पर्यटनला हब स्होतोला बिबा सेमसे ब्रम्हाला कुतेन बुद्धला कु नोन स्होबा स्थानीय तुलप्रसाद दाहालसे पाङ्जि । चु थुमला विकासला लागि स्थानीय सरकारग्याम तिसाइ नोन दाते प्रदेश सरकार थेन संघीय सरकारसे सुताइ चासो किन्बारि चुबा थेसे पाङ्जि ।
बुद्धला कु मुबा ग्लारि थेरापी पार्क स्होसेला समाजसेवी गणेश मोक्तानसे ग्रा पिन्जि । पार्क स्होबाला लागि बागमती प्रदेश सरकारग्याम करोड गिसे ६५ लाख बजेट याङ्बा थेसे पाङ्जि । चु ग्लादा गोल्छेसे पर्यटकीय ग्लाला लिरि विकास लासिकेन निसेला थेला सेमताम मुला ।
थे ग्लारि तिगाइ दिङ ङ्हाच्छा एसियालान गिक्छा ब्रम्हायणीला क्योङ कदला कुला छ्याम ब्रम्हायणी पार्क स्होजिन्बा मुला ।
(छिगला अर्थः कु– मुर्ति, ल्हेछ्या– पवर्धन, ह्राप्ने– प्राण प्रतिष्ठा, ग्रा– जानकारी, सेमताम– भनाइ)
तपाईको प्रतिक्रिया दिनुहोस