याम्बु । उपत्यका प्रहरी गेदिमला प्रमुख एआईजी टेकबहादुर तामाङला ग्रेनडोन्बोरि याम्बु उपत्यका प्रहरी गेदिमसे ङ्योइसाङ लाबा लागूऔषध लिब्रोला ग्रेनगेरेम गेताङ न्हाङ्ला ‘लागूऔषध दुव्र्यसन आरेबा दिम गेरेम’ सम्बन्धी गेताङ ताजि । गेताङ मध्यपुर ठिमी नगरपालिका शंखधर पाटी प्यालेस, खोपोङरि दिनिरेकुनु ताबा हिन्ना ।

लागूऔषध दुव्र्यसनला तथ्याङ्क दाते रेदाङसे ल्हेसिकेन निबा मुला । चुला लागि समाजला मुतेबा सरोकालवालाकादे सक्रिय तातोबा दुइ खाबा प्रहरीला सेमताम मुला । याम्बु उपत्यका प्रहरी गेदिमसे लागूऔषध लिब्रोला ग्रेनगेरेम गेताङ निबा बेने १७ गते गृहलोन्पो रमेश लेखकला ग्रेनडोन्बोरि नेपाल पुलिस क्लब भृकुटीमण्डपरि याखारगि गेताङ स्होसि तिबा मुबा ।

थे दुइसाङरि एआईजी टेकबहादुर तामाङ थेन मध्यपुर ठिमी नगरपालिका प्रमुख सुरेन्द्र श्रेष्ठ गुङरि लागूऔषध लिब्रो गिसेमगि ह्रोलाबा, समन्वय थेन ह्रोगे सम्बन्धी समझदारीस्यो किन्बा पिन्बा सुताइ ताबा मुबा ।

गेताङरि एआईजी टेकबहादुर तामाङसे मुतेबा समाजला साझा काक्ताला लिरि म्राङ्बा लागूऔषध दुव्र्यसनसे शान्ति सुरक्षा थेन अमन चयनरि असर लाबा मुला बिसि पाङ्जि । थेसे चुदा रोकथाम थेन नियन्त्रणला लागि प्रहरी, स्यान्दो सरोकारवाला निकाय थेन ह्युल्बा समाज गुङरि समन्वय थेन ह्रोगे लासि ङ्हाच्छा वाङ्तोबा तामरि बाङ लाजि ।

‘अपराध रोकथाम थेन नियन्त्रण लाबारि नेपाल प्रहरीला गिक्खे बाङग्याम जेक्खे सम्भव आताबासे लामा स्थानीय ह्युल्बाला सुताइ भुमिका महत्वपूर्ण मुला ।’ तामाङसे पाङ्जि, ‘नागरिकला ग्रा थेन ह्रोगेसे जेक्खे समाजरि शान्ति, सुरक्षा थेन अमन चयन ताबारि खाम्ला ।’

(छिगला अर्थः ग्रेनगेरम– महाअभियान, खोपोङ– भक्तपुर, दिनिरे– आईतबार, गेदिम– कार्यालय, सेमताम– भनाई, बेने– फागुन, गिसेमगि– आपसी, ह्रोगे– सहकार्य, काक्ता– समस्या)