थेनिकादे सप्ताह चुबातेन गिक्छा रेरि
या यारि कलश थोसि थोन्बा भक्तजन आहिन
कि थेनिकादे कृष्ण झुला कोसिकेन ब्रागाइ ।
थेनिकादे बोल बमला लागि थोन्बा नोकोर नोन आहिन
च्यामा ओस्बा ओस्बान म्राङ्साइ नोन
थेनिकादेतेन आराधना आता ।
थेनिकादे बिश्वकर्मा बाबादा ब्योङ्बारि
डि आइ, टाटा मोबाइलरि
स्याबान, कोबान ब्राबा भक्त नोन आहिन
तासाइ थेनिकादे– खालाइदा ब्योङ्बारि थोन्बा बिसाम पक्कान हिन्ना ।
जुलुसतेन थेह्राङ्बा खास हतियार तिगाइ आता
टुबाक, बारुद, मिसाइल...
जुलुसतेन हतियार जेक्खे ताला– बुलन्ध लिब्रो काइ ।
थेनिकादेतेन ताला
तिगाइ थान पम्प्लेट
जोडि गि कोङ्बा कुन्दुर
सडक लेप्ना लाखाम्बा छेप्बा ।
थेनिकादेला या व्हा थोबोरि म्लाङ फेटा ताबारि खाम्ला ।
थेनिकादेतेन याखारगि पुत्ला ताबारि खाम्ला
खालाइला यारि मुगु ताबारि खाम्ला
थेनिकादेला पाम्प्लेटरि कोन्ज्योसोमला फोटो आता ।
दारे ह्राङ्से पाङ्खाम्स्ह्युला–
थे या व्हा थोबोला फेटादा– च्याद्दर
थेनिकादेतेन मुबा पुत्लादा– ह्राङ्ला ग्रेन लिस्ह्रुग
याला मुगुदा– छ्योमि
म्राङ्स्ह्यु खाम्ला पाम्प्लेटला फोटोरि ह्राङ
ओम पाङ्स्ह्युखाम्ला– थेनिकादेला काइदा भजन ।
ह्राङ ख्योल्बा पाङ्स्ह्युबाकेन मुला !
थे पुत्ला दानवला हिन्ना
थे तिगाइ दुइरि माईतीघररि ख्राङ्बाकेन मुला ।
थे फेटा दारे कासे च्युर्सेला मुला ओम
छार युगदा न्हान्सेला मुला
थे मुगुरि क्रोसेला मुला पम्प्लेट ओम,
खाबा युगदा ग्यालाम उन्सेला मुला ।
चोत्ते गोउ–
जुलुससे भजन आको !
(छिगकि दोनः नेकोर– तिर्थालु, मुगु– मसाल, लिस्ह्रुग– स्वरुप, छ्योमि– दियो, ख्योल्बा– गलत)
दोःबा : यकिना अगाध
तपाईको प्रतिक्रिया दिनुहोस