ह्याङ्लान ग्ला, ह्याङ्लान दिम
ह्राङ्लान दिमरि बास माइतोबा चिम
सिमान्तिकरण, बहिष्करणरि मुबा तिल्मा
सेम क्रोबा ल्हानान आमा
कादेन का, सा निसाइनोन खाइमादाम्मान हक म्हाइसि चितोमा ।
ह्युलठिम, कानूनरि ब्रितोबान मुला ल्हानान ताम
कात्ते मुला थे सुताइ ब्याङ्गे लामा
ह्याङ्लाकादे आदोजि थे ग्लारि
दोबासे ताम आलामा
चु ङ्योलोक दातेइ कादे लादोबा ?
ङ्योइजि ह्राङ्निदा,
विधि विधानरि विश्वास लाबा ङादा
बाध्य ताना लाजि, ङ्हाच्छा चिबारि,
समुदाय, ह्युलला लागिरि सिसाइ सिदोमा ।
खबरदार होइ म्हिकादे
ङान्ना दोङराप, ङोसेबा म्हाना लाबारि आम्हाइगो
एन्छे लाबा अन्याय म्लेबा आरे
ङान्ना सा मुदे आहाम ऐेन्छे
व्यर्थ ताला एन्ना प्रयत्न
ङानिकादेदा थुम्ना लाबारि आम्हाइगो
समानुपातिक निर्वाचन प्रणालीला दुरुपयोगला
लिब्रोरि मुला
चु लिब्रो खाइमादाम्मान ताजिला एन्ना आहिन्बा गेरि
सामसुम तासिनिला आम्हान्गो
खबरदार ! ङान्ना हित लिसो निआहाम एनि
ङान्ना क्षमता आरे आम्हान्गो ।
ह्याङ्लान ग्ला, ह्याङ्लान दिम
ह्राङ्लान दिमरि बास म्हाइतोबा चिम
सिमान्तिकरण, बहिष्करणरि मुबा तिल्मा
सेम क्रोबा ल्हानान आमा
कादेन का, सा निसाइनोन खाइमादाम्मान हक म्हाइसि चितोमा
ओ ज्योज्यो ! ओ आले ! ह्याङ मोक्कोन गि ताइले
चु बहिष्करणदा मोक्कोन डिक्सि जिन्ना लाइले ।।
(छिगकि दोनः ह्युलठिम– संविधान, ङ्योलोक– आन्दोलन, दोङराप– इतिहास, ङोसेबा– पहिचान, लिब्रो– विरोध, लिसो– विपरति)
तपाईको प्रतिक्रिया दिनुहोस