चरिकोटला वैतेश्वर गाउँपालिका थेन छोङ्नापा भक्तबहादुर तामाङला न्होरपा ह्रोरि एम्बुलेन्स
चरिकोट ५ गोने । वैतेश्वर गाउँपालिका थेन पर्यटन छोङ्नापा भक्तबहादुर तामाङला न्होरपा ह्रोरि १ नम्बर वडादा एम्बुलेन्स पिन्बा मुला । एम्बुलेन्स गाउँपालिकाला वडा नं. १ रि मुबा गैरीमुदी ल्हुइथाङ चौकीदा पिन्बा हिन्ना ।
वैतेश्वर गाउँपालिका थेन पर्यटन छोङ्नापा भक्तबहादुर तामाङला न्होरपा ह्रोरि याङ्बा बजेटग्याम ग्लुबा एम्बुलेन्सला चाबी गाउँपालिका चोहो छबि लामासे वडाचोहो भीमबहादुर तामाङदा पिन्बा मुबा । गेताङरि चोहो लामासे वडा थेन ल्हुइथाङ चौकीला लागि एम्बुलेन्स आरेबा म्राङ्सि एम्बुलेन्स बाबाला लागि महत्वपुर्ण भुमिका क्लाङ्बा भक्तबहादुर तामाङदा थुजेछे पिन्जि । थेसे डिछ्याना तोसोसे एम्बुलेन्स संचालन लाबारि वडादा काठाक्बा पिन्जि ।
छोङ्नापा तामाङसे फिरग्याप ह्युल्पा ह्रोजुगुतेन चन्दा ह्रिसि पोप्बा १५ बुम रुपैयाँरि गाउँपालिकासे १० बुम काप्सि नेपाल सरकारला राजश्व छुटरि सुविधा मुबा ख वर्गला एम्बुलेन्स ग्लुबा हिन्ना ।
गैरीमुदी ल्हुइथाङ चौकीला ल्हुइथाङ इन्चार्ज अमित यादवसे वडारि एम्बुलेन्स आरेमा चुबिमा ङ्हाच्छा चुर्ला नाबादा स्यान्दो ग्लारि रेफर लाबारि सवारी ससाधन म्हाइतोबा बाध्यता मुबा पाङ्जि । ह्राङ्लान एम्बुलेन्स तामाहेन्से विशेष लासि गर्भवती म्रिङ्कोला थेन नाबासे एम्बुलेन्स आरेबासे दुइरिन क्योन्बा याङ्बाग्याम वन्चित तातोबा बाध्यता म्हासेला ताम थान्जि ।
(छिगला अर्थः छोङ्नापा– व्यवसायी, न्होरपा– आर्थिक, ल्हुइथाङ– स्वास्थ्य, डिछ्याना– व्यवस्थित, तोसो– तरिका, काठाक्बा– निर्देशन, बुम– लाख, नाबा– बिरामी, क्योन्बा– उपचार)
तपाईको प्रतिक्रिया दिनुहोस