थेनि तिरे
चुर्से खासि
‘ङा एलान हिन्ना ।’ बिजि

थेनि स्यान्दो रे
क्यार्से निसि
‘ङा एलान हिन्ना ।’ बिजि

देन्बारि थेनि खालाइला आरेमुबा ...!

ख्योल्बा ह्याङ्लान हिन्ना
ह्याङ ह्याङ्ला आतानि
थेन्ना नोन आतानि ।

दाते थेनि–
ह्याङ्दा मेफ्रा दोना लाबारि ल्हागतिचिमुला
ह्याङ्ला ह्रिला बास ब्रान्सि स्यान्दो रामायण च्याबारि म्हाइबाकेन मुला

(...कैकयी स्होसि आमादा डामतिबारि म्हाइचिबा मुला
दशरथ स्होसि आपादा विवश ताना लाबाकेन मुला
चुरि,
शकुनि मुतेबा रेम पासा फ्लिङ्सोचिमुला...

मुबाम मुला चुरि–
...लक्ष्मण ह्राङ्बा आलेह्रो
सीता ह्राङ्बा ल्हुइह्रो 
लवकुश ह्राङ्बा तान्बा...

तासाइ च्याबारि लेङ्बा मुला
...भरत ह्राङ्बा आले मुला व्हा आरे ?
राम ह्राङ्बा ज्योज्यो मुला व्हा आरे ?

सम्पत्तिला घमण्डसे बोबा रावणमि खान्दामान मुला...)

थेन्दा थाह मुला ख्योल्बा तिगा हिन्ना / खाल्ला हिन्ना ?
तासाइ कुटिसि चिबा मुला थेनि....
बिले–
अत्याचार लामा ट्रम्पसे– पुटिन कुटिसि चिला

थाह मुला ह्याङ्दा
ह्याङ्ला ख्योल्बा आरे
तासाइ लाचार मुला ह्याङ
बिले–
प्यालेस्टाइनला लाइनुसे लिच्छाला बु बुन्मा
चुर्ला लाइनु उला !

थेन्छे गोतोबा हिन्ना
– ग्याल्सा
–समाज
ह्या,
– ङेङ्गोर
तिगादाम्मान मुगाइ–
कमजोरला तिलोरि तातोला !

तासाइ,
अहँ 
चुरि चुह्राङ्बा ताचिबा आरे ...
ख्योल्बा आरेबादा ख्योल्बा उन्सि
– ग्याल्सा डोजर चलप लाला
– समाज अपमान चलप लाला
– ङेङ्गोर ताम चलप लाला

तिरेकुनु चु मोक्कोन पर्दाफास ताबा रे 
थेनि दोसि ङिच्च तासि ङामरि खाला
ओम लुबा मिख्लि ताइना लाला
ङानि एलान मुबा / हिन्ना बिला

ग्याल्सा ह्राङ्लान मुबादा– ग्याल्सा हाप्सि चिबा चेबो
समाजरि हैकम छ्याना लाबादा– स्यान्दो हैकमी चेबो 
दिम मुबादा– स्यान्दो दिम चेबो

तिल्दा थे ब्यान्सि किन्बा ग्याल्सा आतागाइ
तिल्दा थे धम्क्याप लासि चलप लाबा समाज आतागाइ
तिल्दा थे ठगतिसि स्होबा दिम आतागाइ

तिनि खाल्खाल्छे खाल्खाल्दा ह्रो पिन्साइ नोन
न्हाङ्गार पर्दा ठ्वाङ्सि ह्याल खामा
खाला खाला ह्याल च्याबारि आखाम्ना मि च्युम्सेला मुला
थेनि हिन्ना चु दुइला ‘झेली...!’

दोःबा : यकिना अगाध

(छिगकि दोनः ख्योल्बा– गल्ती, फ्लिङ्सोचिबा– पल्टाइरहेको, बोबा– फुलेको, उला– निस्सासिन्छ, ग्याल्सा– राज्य, तिलो– पक्ष, लुबा– झुठो, हाप्सि– ओगटेर, चेबो– प्यारो)