याम्बु १६ गोने । खास्योर थुम फेल्गेबा समितिसे चु दिङहेन्से आचार्य पद्यसम्भव (गुरु रेन्पोछे)ला केवाकाप्तोन दाङ्बा निर्णय लाबा मुला । केवाकाप्तोन गोने १९ गते याम्बुरि भव्य लिरि दाङ्बारि समितिसे तयारी लाबा चुबा ग्रानाङ पिन्बा मुला ।

केवाकाप्तोन गेताङ लाबाफिरि समितिसे तिनि चुरि स्योमि जोम्नाछेन लासि ग्रानाङ पिन्बा हिन्ना । स्योमि जोम्नाछेनरि पिन्बा ग्रा आन्सार १९ गते स्ह्योरि महांकाल, तीनचुली, घ्योइलिसाङ पोखरीरि छ्योकु लाबा गेताङ मुबा समितिला गेकाठाक्पा मोहनकुमार तामाङसे ग्रानाङ पिन्जि ।

थेला आन्सार थेकुनु रेला २ः३० ङ्ह्यामा गुरु रिन्पोछे शोभाल्हाम तेबा, ४ ङ्ह्यामा गुरु छेङ्गे छ्याम दाङ्बा, ३ः३० ङ्ह्यामा औपचारिक गेताङ लाबा तयारी लाबा गेकाठाक्पा तामाङसे ग्रानाङ पिन्जि । गेताङला ठोङ्सेन रिमठिम, पर्यटन थेन नागरिक उड्डयनब्लोन बद्रीप्रसाद पाण्ड्यसे लासेला मुला ।

समितिला चोहो राजकुमार लामासे मुर्त थेन अमुर्त रिमठिम सोना लाबा थेन गुरु रिन्पोछेला डेनला लागि गिक्छारेम ह्रोला केवाकाप्तोन दाङ्गे लाबा तयारी लाबा पाङ्जि । गेताङ सफल ताना लाबारि ल्होला ९ वटा स्यानसमिति स्हेङ्बा तयारी चुबा थेसे ग्रा पिन्जि ।

थेनोन आन्सार गोने २७ गते लामा गुरुजुगु, बज्राचार्य गुरुजुगु ओसेम बामानकादेग्याम महाकालला छ्योकु लासेला चोहो लामासे पाङ्जि । थे दुइसाङरि छ्योकु लिच्छा महाकालला प्रतिमादा खटरि थान्सि महाकालहेन्से रामहिटी, तीनचुली तासि खास्योर कोरो लासि टुसाल, चुच्चेपाटी तासिकेन दोसि महाकालरि बोर्सि स्योल्सेला गेताङ मुबा थेसे पाङ्जि । रिन्पोछेदा ङ्हीछा बुद्धला लिरि ङोसेमुला ।

(छिगदोनः केवाकाप्तोन– जन्मोत्सव, खास्योर– बौद्धनाथ, फेल्गेबा– विकास, दाङ्बा– मनाउनु, ग्रानाङ– जानकारी, स्योमि– पत्रकार, जोम्नाछेन– सम्मेलन, गेकाठाक्पा– कार्यकारी निर्देशक, ग्रा– सूचना,  स्योल्बा– समापन)