याम्बु १७ गोने । जम्बुलिङ फिल्मस थेत्माइला ङ्योइसाङरि म्हेन्दोमाया प्रतियोगिता ताइलाबा ग्रा गेताङला थुछापा प्रकाश वाईबा तामाङसे ग्रानाङ पिन्बा मुला । प्रतियोगिता गोने २३ गते रुपच्येत थेन गोने २४ गते सिङल्हारि तासेला मुला । गेताङ नुवाकोट, धादिङ थेन रसुवा छ्याल्बा ग्ला सिङल्हारि स्हेङ्बा मुला ।
गेताङला डिछ्याबा लोकेन्द्र तामाङला आन्सार ग्ला ङ्हीलान गेताङ स्ह्योला १० ङ्ह्यामाहेन्से चुसेला मुला ।

प्रतियोगितारि डासिमाम गिक्छा ताबासे २५ तोङजा, ङ्हीछा ताबासे १५ तोङ्जा थेन सोमछा ताबासे १० तोङ्जा नगद पुरस्कारला छ्याम प्रमाणस्यो याङ्सेला मुला ।  

न्हुपला तामाङरि म्हेन्दोमाया व्हाइ थेन स्याबा चर्चित मुला । चु व्हाइसे चुर्ला तामाङजुगुला ग्योइ, ज्योस्हेङ, रिमठिम, गोइलो, चिबाचाबा, पेठिमदा थोबा मुला ।

धार्मिक, ह्राङ्ज्युङ्पा ओसेम सांस्कृतिक दृष्टिसे आउदिन महत्वपुर्ण तेन्बा सिङल्हा म्हाने प्रचारप्रसाररि बाबारि चुग्लारि ब्लिछा म्हेन्दोमाया प्रतियोगितादा ङ्योइसाङ लाबा ङ्योइसाङ थेत्माइसे पाङ्बा मुला । गोने ङ्ह्याला दुइसाङरि बोम्बो मेला नोन ताबासे चु ग्लादा दाम्बा हिन्ना ।  

चु ङ्हाच्छा म्हेन्दोमाया ज्योस्हेङमि छोक्बाला गेन्दुनगत पहलरि तासिकेन खाबा मुबा । चुरेम बिसाम जम्बुलिङ फिल्म्स थेत्माइसे स्हेङ्बा हिन्ना ।

(छिगदोनः थेत्माइ– परिवार, ग्रा– सूचना, थुछापा– संयोजक, ग्रानाङ– जानकारी, गोने– साउन, डिछ्याबा– व्यवस्थापन, गिक्छा– प्रथम, तोङ्जा, न्हुप– पश्चिम, ज्योस्हेङ– कला, ह्राङ्ज्युङपा– प्राकृतिक, ज्योस्हेङमि– कलाकार, छोक्बा– समुह, गेन्दुनगत– संस्थागत)