याम्बु २२ गोने । नेपाल रिमठिम थेन धर्म, संस्कारला फ्युक्पो हिन्ना । थे नोन रिमठिम, धर्म, संस्कारदाा ह्रावा लाबारि गाईजात्थार थेन रोपाँईजात्थार मुल समारोह गेन्दुनला ङ्योइसाङरि २२ गते स्योमि जोम्नाछेन ताजि । गेताङ बौद्ध तामाङ कल्याण गुठीला थुछापारि ओम काठमाडौं महानगरपालिका–०६ वडाला ह्रोरि ताइ लाबा स्योमि जोम्नाछेनरि ग्रापिन्जि ।  

जोम्नाछेनरि ङामरिन खाबा जात्थार तेन्बारि का.म.न.पा. वडा नं. ६ खास्योरला वडाचोहो भुवन लामासे ह्राङ्से खाम्बा ह्रोलाला पाङ्जि ।

गाईजात्थार थेन रोपाँईजात्थार मुल समारोह गेन्दुनला थुछापा जयमंगल लामासे जात्थारदा ज्याना लासि दाङ्बारि ल्होलो ल्होलो स्यानदाछोककादे स्होसि प्रचार प्रसारला गे लाचिबा सेमताम थान्जि ।

गोने २५ गते घिनतिङनाका जात्थार गेताङ ताला बिसाम २६ गते १२ ङ्ह्यामा हिन्छे  ग्रेन साँस्कृतिक गेताङ तासेला मुला । छ्यामरि रोपाई जात्थार थेन पुरस्कार बोठाबा गेताङ तासेला ग्रा मुला ।

जात्थार ह्याङ्ला अमुर्त साँस्कृतिक सम्पदा हिन्ना । सांस्कृतिक ह्युल्ला गौरव नोन हिन्ना । गोनेरि ताबा चु प्रिबादा तामाङसे ‘गोने’, ‘घोनाइ’ पाङ्बा लामुला । गोने प्रिबा गोने ङ्ह्या हिन्छे चुसि गाइजात्थार थेन रोपाइँजात्थार दाङ्माहेन्से थुम्बा मुला ।

गोनाइ ङ्ह्याकुनु गुम्बा, लाथान थेन बुरि क्वाँटी थेन च्यानच्यान छावा लामुला । दिमदिमरि क्वाँटी चाबा लामुला ।

बाइसे गाई जात्थरदा ‘सापारु’ पाङ्मुला । गाई जात्थार विशेष लासि बाइजुगुसे दाङ्वा लामुला । गाई जात्थार सिबाम्हावाला मिनरि दाङ्बा प्रिबा हिन्ना ।

रोपाइ जात्थार बेल्बो लासि रोपाँईला गे जिन्छि फुर्सद ताबा गेनामजुगुसे दाङ्बा प्रिबा हिन्ना । जामाकुनु रोपाइदा डान्सि रोपार, बाउसे थेन हलीला गोइलो क्वान्सि स्याबा लामुला ।

(छिगदोनः खास्योर– बौद्ध, प्रिबा– पर्ब, स्योमि– पत्रकार, जोम्नाछेन– सम्मेलन, ह्रावा– रक्षा, थुछापा– संयोजक, स्यानदाछोक– उपसमिति)