हेटौंडा, १९ दुगु । हेटौंडा उपमहानगरपालिकाला मेयर मीनाकुमारी लामासे क्लाङ्छ्योङ थुमरि ह्युलला जामेकोला फुटबल टिमसे महत्वपूर्ण उपलब्धी किन्खाम्बा बिसि पाङ्जि । थेसे स्यानह्युल स्तररि ह्युलदा ङोसेना लाबारि जामेकोला फुटबल क्लाङ्म्हिला महत्वपूर्ण भुमिका मुला बिसि पाङ्जि ।

मकवानपुर जोङ फुटबल छेनला ङ्योइसाङरि सुङरे तिबा मकवानपुर जामेकोला गोल्डकप ठ्वाङ्सेन समारोहदा सम्बोधन लाबान मयर लामासे जामेकोला फुटबलला छ्याम क्लाङ्खेन थुमला गेन्दुनगत विकासरि ङ्हाच्छा वाङ्तोबा बिसि पाङ्जि । क्लाङ थुमला विकास थेन ल्हेछ्याला लागि संरचनागत सुधार लासिकने क्लाङम्हि प्रोत्साहनला नीति किन्तोबारि थेसे बाङ लाजि ।

थेला आन्सार तोतेबा क्लाङ पूर्वाधार आरेबासे लासिचिबा (लुकेर बसेको) प्रतिभाजुगु प्रस्फुटन ताबारि खाम्बा आरे । थेसे क्लाङ थुमला विकासला छ्याम क्लाङम्हि केना लाबाला लागि गुणस्तरीय क्लाङ्छ्योङ पूर्वधार स्हेङ्बा थेन प्रशिक्षण केन्द्र स्हेङ्तोबा दातेला आवश्यकता हिन्ना बिसि पाङ्जि ।

हेटौंडा उपमहानगरपालिका क्लाङ्छ्योङ थुमला विकास थेन ल्हेछ्याला लागि प्रतिबद्ध मुबा थेसे पाङ्जि । क्लाङ्म्हि केना लाबा थेन प्रोत्साहनरि हेटौंडा उपमहानगरपालिकासे बजेट गेताङग्याम सम्बोधन लाबा थेन प्रतियोगिता स्याङ्बाला लागि ह्रोलासिकेन खाबा मुला बिसि थेसे पाङ्जि ।

उपमहानगरपालिकाला मुख्य प्रयोजनरि मुबा सुङरे तिबा थे मकवानपु जामेकोला गोल्डकप (सहिद स्मृति स्थानीय तह मकवानपु जामेकोला गोल्डकप) दुगु २५ गतेदोना संचालन तासेला मुला ।

प्रतियोगितारि ङ्योइसाङला छ्याम गोरब्रे थेत्माइसे बोकिन्बा मुला । थेरि विभागीय टिम सशस्त्र प्रहरीला एपीएफ, नेपाल पुलिसला छ्याम मकवानपुर, रौतहट, चितवन जोङला थेत्माइला छ्याम वीरगन्ज युथ एकेडेमी, संकटा थेन नवजनजागृती युवा क्लबसे बोकिन्बा मुला ।

प्रतियोगितारि डाबासे ५ लाख रुपैयाँ, स्यानडाबासे ३ लाख रुपैयाँ न्होरला छ्याम सिल्ड, मेडल थेन प्रमाणस्यो याङ्सेला मुला । सर्वोत्कृष्ट क्लाङ्म्हिसे स्कुटर याङ्सेला मुला ।

(छिगला अर्थः क्लाङ्छ्योङ– खेलकुद, स्यानह्युल– अन्तर्राष्ट्रिय, क्लाङ्म्हि– खेलाडी, जोङ– जिल्ला, छेन– संघ, सुङरे– शुक्रबार, ल्हेछ्या– प्रबद्र्धन, दुगु– बैशाख, स्यानडाबा– उपविजेता)