याम्बु । बागमती प्रदेश सरकारसे तिनि प्रदेश ग्योइ दिङ्साङ रेला दुइसाङरि प्रदेश राजधानि हेडौंडारि बिशेस गेताङ स्हेङ्जि । बागमति प्रदेश रिमठिम थेन पर्यटन मन्त्रलायसे नेपाल तामाङ घेदुङ थेन नेवा दय दवुला ह्रोरि ‘प्रदेश ग्योइ दिङ्साङ रे– २०८२’ स्हेङ्बा हिन्ना ।

मुख्यलोन्पो थेन लोन्पोपरिषदला गेदिमरि स्हेङ्बा गेताङरि तामाङ थेन बाइ ग्योइ कार्यन्वयनला अवस्थाथोरि डोन्बोकादेसे ल्हेङमो थान्बा मुबा ।

मुख्यलोन्पो बहादुरसिंह लामाले प्रदेशरि तामाङ थेन बाइ ग्योइ कार्यन्वयनला ताङरि मुबासे चुदा प्रभावकारी लिरि कार्यन्वयन लाबारि गेकादे योना योना लासेला प्रतिवद्धता लाजि ।

रिमठिम थेन पर्यटन लोन्पो बिमल ठकुरिसे नोन प्रदेश सरकारि ग्योइ लागु लाबारि लेङ्बा गेकादे लासि ङ्हाच्छा निबा प्रतिवद्धता लाजि ।

गेताङरि रिमिठिम थेन पर्यटन मन्त्रालयसे लासोमरि तिरेम तेबा तामाङ ग्योइथेन बाइ ग्योइला बुलेटिन थेन स्मारिकाला विमोचन विचोन लाबा मुबा । 

गेताङरि बाइ ग्योइरि योगदान पिन्बा मल्लके सुन्दर थेन तामाङ ग्योइ थेन लिपिरि गेलाबा अजितमान तामाङदा डेन लामुबा । 
गेताङ तिबा ङ्हाच्छा हेटौंडाला ह्रुप्राचे ग्याम लामा, ताम्बा, बोम्बो थेन बाइ ह्युल्बाला धिमे ह्रोल्ज्याङ छ्यामला र्याली तेबा मुबा ।

ग्योइ दिङ्साङ रेला दुइसाङरि याम्बुरिन तिनि स्ह्योरि गेताङ स्हेङ्जि । नेपाल तामाङ घेदुङ थेन नेवा दय दवुसे याम्बुला शान्ति बाटिकाग्याम वसन्तपुर दोना ग्योइ कार्यन्वयनरि दबाब पिन्बारि बिबान प्लेकार्ड थेन ब्यानर ओन्बा गेताङ स्हेङ्बा हिन्ना ।