बुद्धला केवासाङ दाङ्बारि बौद्धनाथ क्षेत्र विकास समितिसे स्होजि मूल समारोह समिति
याम्बु । ‘बौद्ध महाचैत्य ग्याम बुद्ध सन्देश जाम्बुलिङ नाङ’ बिबा नाराला छ्याम २५६९ छा बुद्धला केवासाङ दाङ्बारि बौद्धनाथ क्षेत्र विकास समितिसे मूल समारोह समिति स्होबा मुला । चु समितिसे बुद्धला केवासाङ ग्रेन थेन ऐतिहासिक लिरि दाङ्सेला मुला ।
नाबिङरे समितिला सभाहलरि स्योमि जोम्ना लासि बौनाथ क्षेत्र विकाससे ह्राङ्ला संयोजनरि ल्होलो गेन्दुनकादेदा बोकिनपुङ्सि मुल समारोह समिति स्होसि गेताङ ङ्योइसाङ लाइ लाबा ग्रा पिन्बा हिन्ना ।
बुद्धला केवासाङला दुइसाङरि बौद्धनाथ थुमरि ङ्योइसाङ लाबा गेताङसे शान्ति, करुणा थेन अहिंसाला सन्देश जाम्बुलिङनाङ ल्हेना लाबा दोखाङ थान्बा समितिला गेकाठाक्पा मोहनकुमार तामाङसे ग्रा पिन्जि ।
जामाकुनु स्ह्योरि ८ः४५ ङ्ह्यामा महाकाल पाङ्ग्याल ग्याम तिसेला शान्ति र्याली तिनचुली ताबान बौद्धनाथ महाचैत्यदा कोरो लासि ह्यात ख्राङ्गारि दोसि थुम्ला बिसि थेसे पाङ्जि । र्यालीरि नेपाली रिमठिम ङोसेबा झाँकीकादे उन्सेला मुला ।
चुह्राङ्नोन लासि कोरोरि प्रहरी ब्यान्ड, ह्रोल्ज्याङ थेन ल्होलो जातजातिसे परम्परागत गोइलोरि बोकिन्सेला मुला ।
ह्यातला ख्राङ्गारि ताबा औपचारिक गेताङ बागमती प्रदेशला मुख्यलोन्पो बहादुरसिंह लामाला ग्रेनडोन्बोरि तासेला मुला । छ्यामरि, निधिपति नाम्खा रिन्पोछे थेन क्याब्जे ज्याटुल रिन्पोछे ह्राङ्बा विशिष्ट गुरुकादेसे बोकिन्सेला मुला ।
गेताङरि मोलम, ज्याबाम्हान्बा, सांस्कृतिक प्रस्तुती, बुद्धला ग्युइसेररि देनः मुबा प्रवचनकादे तासेला मुला ।
(छिगला अर्थः नाबिङरे– बुधबार, स्योमि– पत्रकार, जोम्ना– सम्मेलन, गेकाठाक्पा– कार्यकारी निर्देशक, ह्रोल्ज्याङ– बाजागाजा, ग्युइसेर– शिक्षा, देनः आधारित)
तपाईको प्रतिक्रिया दिनुहोस