बागमती–गोदावरी मेयर कप फुटबलग्याम माङग्यार ताजि, महालक्ष्मीसे गिक्छा डाजि
हेराङ । बागमती गाउँपालिका उपत्यकानाङ पालिका न्हाङ्ला गोदावरी मेयर कप फुटबल प्रतियोगिता ग्याम माङग्यार थोन्बा मुला ।
हेराङला च्यासल चेरि नाबिङरे महालक्ष्मी नगरपालिकातेन ५–१ गोल फेबारि ब्रोसिकेन बागमती गाउँपालिका प्रतियोगिताग्याम माङ्ग्यार थोन्बा गिक्छा टोली दोबा मुला ।
बागमती प्रतियोगिताग्याम माङग्यार थोन्साइ नोन गिक्छा डाबाला छ्याम महालक्ष्मी नगरपालिकासे सेमिफाइनलरि दोबा संभावना छोन्बोन थान्बा मुला । महालक्ष्मीला डाबारि सिद्धान्त अधिकारीसे गोल ङ्ही लाजि बिसाम रामकृष्ण चौधरी, अमृत चन्द थेन सनम धितालसे च्योच्यो काकार गोल लाजि । बागमतीला लागि दिलिप घलानसे गोल दोजि ।
क्लाङला ३६छा मिनेटरि रामकृष्णला गोल ग्याम्से महालक्ष्मी ङ्हाच्छा वाङ्बा मुबा । ४६ छा मिनेटरि अमृतसे टोलीदा दोब्बर ङ्हाच्छा बोर्जि ।
सनमसे ६७ छा मिनेटरि गोल लामा महालक्ष्मी ३–० से ङ्हाच्छा दोजि । सिद्धान्तसे ७७ छा मिनेटरि पेनाल्टीग्याम टोलीला लागि ब्लिछा गोल लाजि ।
दिलिपसे ७९ छा मिनेटरि बागमतीला लागि गोल दोजि । इन्जुरी दुइरि सिद्धान्तसे व्यक्तिगत ङ्हीछा गोल लामा महालक्ष्मी ५–१ से ङ्हाच्छा वाङ्जि ।
इन्जुरी दुइरिन आयुश लामा पेनाल्टीरि ख्योल्मा बागमतीसे गाल फेबा च्याङ्ना लाबा मौका म्हाना लाजि । गिक्छा क्लाङरि ङ्योइसाङ गोदावरी नगरपालिकातेन ६–१ से ब्रेबा महालक्ष्मीसे दारे हेराङ महानगरपालिकातेन क्लाङ्बारि लेङ्बा मुला ।
ङ्हाच्छाला क्लाङरि हेराङ महानगरतेन ७–३ गोल फेबासे ब्रेबा बागमतीसे दारे समुह रेमला लिच्छाला क्लाङरि गोदावरी नगरपालिकातेन प्रतिस्पर्धा लाबारि लेङ्बा मुला ।
समुह ‘ए’रि गोदावरी, हेराङ महानगर थेन महालक्ष्मीला च्योच्यो ३–३ बो मुला । तासाइनोन गोल फेबाला देनरि याखारगि जेक्खे क्लाङ क्लाङ्बा गोदावरी ङ्हाच्छा मुला । हेराङ महानगरसे नोन याखारगि जेक्खे क्लाङ क्लाङ्बा मुला ।
नारे तासेला क्लाङ
गोदावरी मेयर कप फुटबलरि नारे ३ वटा क्लाङ तासेला मुला ।
गोदावरी बहुउद्देश्यीय रंगशालाला झ्यालुन्टार चेरि नारे स्ह्यो सवा ८ ङ्ह्यामा याम्बु महानगरपालिका थेन मध्यपुर ठिमी नगरपालिका गुङरि प्रतिस्पर्धा तासेला मुला ।
चुह्राङ्नोन लासि रेरि सवा १२ ङ्ह्यामा चन्द्रागिरी नगरपालिका थेन कागेश्वरी मनोहरा नगरपालिका गुङरि क्लाङ तासेला मुला ।
चुह्राङ्नोन लासि रेरि साँढे ३ ङ्ह्यामा गोदावरी नगरपालिका थेन हेराङ महानगरपालिका गुङरि प्रतिस्पर्धा तासेला मुला ।
छिगला अर्थः हेराङ– ललितपुुर, ख्योल्मा– चुक्नु, बो– अंक, नारे– बिहीबार,
तपाईको प्रतिक्रिया दिनुहोस