याम्बु ३ ड्वाफ्रे । तामाङ चलचित्र छेनसे कामरेकुनु बौद्धला सेकुवा जक्सनरि डेन थेन काठुइ गेताङ स्हेङ्जि । गेताङ गैर आवासीय नेपाली संघ (एनआरएनए)ला छार निर्वाचित ग्रेनगाउराइ बीआर लामाला ग्रेनडोन्बोरि ताबा मुबा ।

ग्रेनडोन्बो लामासे ङोसेबा ह्रिबा स्हे आताना ह्राङ्से स्होबा स्हे हिन्ना बिसि पाङ्जि । ‘कुलमानसे ङोसेबा आह्रिनि, ह्राङ्सेन स्होजि ।’ थेसे पाङ्जि, ‘ङोसेबा स्होबारि दुइ खर्च लाइ ।’

थेसे चलचित्र छेनसे रिमठिम थोबा सिनेमा स्होसि रिमठिमदा छार पुस्तारि दोनालातोबा ताम थान्जि ।

गेताङरि स्यानह्युल तामाङ परिषदला ग्रेनगाउराइ टासी लामासे सांस्कृतिक ङोसेबा थोबा तामाङ सिनेमा जाम्बुलिङनाङ प्रचार प्रसार लाबारि ह्राङ तयार मुला बिसि पाङ्जि ।

गेताङरि तामाङ समाज जापानला चोहो कार्साङ तामाङसे दारेला दिङ ङ्ही लिच्छा स्यानह्युल तामाङ जोम्ना जापानरि तासेला ग्रा पिन्जि ।

तामाङ समाज कतारला संरक्षक शंखलाल तामाङसे प्रवासरि तामाङ चलचित्र चलप लाबारि गाह्रो ताबा ताम थान्जि । थेसे खाबा पुस्तादा खाराङ्लासि तामाङ ग्योइला सिनेमारि आकर्षण लासे बिबा तामरिन समस्या मुबा ताम थान्जि ।

वाईबा समाजला चोहो विगेन्द्र वाईबासे सिनेमा विधा ग्योइ थेन रिमठिमला सवालरि प्रभावकारी स्हेग्याम तासेला ताम थान्जि ।

तामाङ कलाकार छेनला ह्रोचोहो अमर लामासे दाते तामाङ सिनेमा कमजोरी दुइरि दोबा ताम थान्जि । ‘ह्याङ न्हाङरि एकता आरे ।’ थेसे बिजि, ‘गिभ जेक्खे ताजि टेक आतानि । तामाङ सिनेमा सिबा च्योच्यो ताबा मुला ।’

गेताङरि तामाङ स्योमि छेनला चोहो नेत्र तामाङ, तामाङ कलाकार छेनला चोहो विशाल काल्तान, तामाङ चलचित्र छेन कोशीला चोहो भीम लामातेन स्यान्दो डोन्बोकादेसे सेमताम थान्बा मुबा ।

गेताङरि एनआरएनएला ग्रेनगाउराइ बीआर लामातेन गोर ब्लि म्हेदा डेन लाबा मुबा ।

(छिगला अर्थः छेन– संघ, ङोसेबा– पहिचान, स्यानह्युल– अन्तर्राष्ट्रिय, स्योमि– पत्रकार,)