याम्बु ९ ड्वाफ्रे । प्रेस काउन्सिल नेपालसे तामाङ ग्योइला छ्याम ल्होलो गोरङ्हा आमाग्योइरि दोःसि स्योमि ह्रिकरुप सार्वजनिक लाबा मुला । चुतेन नेपाली मिडियारि ल्होलो गोरब्रे आमाग्योइला ह्रिकरुप प्रयोगरि खाबा मुला ।

सुङरे काउन्सिल चोहो बालकृष्ण बस्नेत, ग्योइ आयोगला चोहो डा. गोपाल ठाकुर थेन राष्ट्रिय तामसोर समितिला चोहो धमेन्द्र झासे तामाङ, राई बान्तवा, भोजपुरी, डोट्याली, लिम्बु ग्योइरि दोःबा स्योमि ह्रिकरुप सार्वजनिक लाबा मुला । चु ङ्हाच्छा काउन्सिलसे बाइ, मैथिली थेन थारु ग्योइरि दोःबा ह्रिकरुप सार्वजनिक लाजिन्बा मुला ।

गेताङरि ग्योइ आयोगला चोहो डा. गोपाल ठाकुरसे स्थानीयज्यो आताबा थेन माउलिकता ख्लाजि बिसाम आमाग्योइ सोबारि आखाम बिसि पाङ्जि । थेसे आमाग्योइला ख्युरछ्या लातोबा तामरि बाङ्पिन्जि ।

‘ब्रिबा ताङरि आरेबा ग्योइला ख्युरछ्याला लागि प्रेस काउन्सिलतेन ग्योइ आयोग गुङरि ह्रोगे लाबारि तयार मुला ।’ डा. ठाकुरसे पाङ्जि, ‘काउन्सिलसे आमाग्योइरि स्योमि ह्रिकरुपदा दोःबा गे साहसिक गे हिन्ना । ग्योइ याखारगि ग्याम स्यान्दोरि दोःबा ह्राङरिन छार सिर्जना हिन्ना, चु याखारगि एड्भेन्चर हिन्ना ।’

प्रेस काउन्सिलला चोहो बालकृष्ण बस्नेतसे ह्युलला ल्होलो लुङरि पाङ्बा आमाग्योइला ल्हेछ्यारि स्योनामला महत्वपूर्ण योगदान ताला बिसि पाङ्जि । थेसे यान्पाङ्ला मोक्कोन बिमा ङामला ओम गोबा ग्योइ नोन आमाग्योइ ताबासे चुला ल्हेछ्याला लागि काउन्सिलसे गेलाबा बिसि पाङ्जि ।

‘आमाग्योइ यान्पाङ स्हेगुङ नेपाली स्योनामला जेबा थेन राज्यला वैधव हिन्ना । थेतासि चुला ल्हेछ्या लाबारि काउन्सिले ल्होलो रचनात्मक गे लासिकेन खाबा मुला’, बस्नेतसे बिजि ।

गेताङरि राष्ट्रिय तामसोर समितिला चोहो धमेन्द्र झा, सार्वजनिक सेवा प्रशारण संचालक समिति ह्रोम्हि फुलमान बल, गोरखापत्रला महाप्रबन्धक लाल ऐरीसे ह्राङ्ला सेमताम थान्बा मुबा ।

गेताङरि ब्रिखेन/स्योमि डा. कृष्णराज सर्वहारी, तामाङ डाजाङला तेःपा अर्जुनबहादुर तामाङ, नृपेन्द्रलाल श्रेष्ठ, पुष्कर माथेमा, पदम राई, अमर अमर तुम्याहाङ, विष्णुमाया सिङगक, गणेश राई, बुनु थारु, मनोज वर्मा, वीणा सिन्हा, धनबहादुर मगरसे ग्योइगत स्योनामला दुइ थेन अनुभव थान्बा मुबा ।

गेताङला सहजीकरण काउन्सिलला मुख्य अधिकृत झबिन्द्र भुसालसे लाबा मुबा ।

(छिगला अर्थः ह्रिकरुप– आचारसंहिता, स्योमि– पत्रकार, ड्वाफ्रे– जेठ, सुङरे– शुक्रबार, रुप– संहिता, स्योनाम– पत्रकारिता, ख्युरछ्या– संरक्षण, ह्रोगे– सहकार्य, लुङ– भेग/भू–भाग, ल्हेछ्या– प्रबर्धन, यान्पाङ– संचार, स्हेगुङ– माध्यम)